Zafar Kamali

pople munh se chane khaanaa nahin mumkin huzur
aa nahin sakti javaani lauT ke maajun se

nigaahon mein jo manzar ho vahi sab kuchh nahin hotaa
bahut kuchh aur bhi pyaare pas-e-divaar hotaa hai

ye rishvat ke hain paise din mein kaise luun musalmaan huun
main le saktaa nahin sar apne ye ilzaam roze mein

jo baiThaa hai bagulaa bhagat ki tarah
vahi ham ko asli shikaari lage

siyaasat mein aisi uchhal-kud hai
ki har ek netaa madaari lage

jo chaahtaa hai ki ban jaae vo baDaa shaaer
vo jaa ke dosti gaanThe kisi mudir ke saath

khabar kar do mohalle mein agar chheDaa kisi ne bhi
usi dam main machaa saktaa huun qatl-e-aam roze mein

vo masjid ho ki mandir ho adab ho yaa siyaasat ho
vahi hai jang kursi ki vahi dastaar kaa jhagDaa

is zamaane ki ajab tishna-labi hai ai 'zafar'
pyaas us ki sirf bujhti hai hamaare khuun se

vafur-e-ishq ke jazbe se ho gai sarshaar
nikal paDi hai muridan jadid piir ke saath

jo apnaa bhaai hai rahtaa hai vo paanv ki Thokar mein
magar joru kaa bhaai to gale kaa haar hotaa hai

shauharon se bibayaan laDti hain chhaapa-maar jang
raabta un kaa bhi kyaa kashmir ki vaadi se hai