Asar Lakhnavi

jo aap kahen us men ye pahlu hai vo pahlu
aur ham jo kahen baat men vo baat nahin hai

tumhara husn ara.ish tumhari sadgi zevar
tumhen koi zarurat hi nahin banne sanvarne ki

zindagi aur zindagi ki yadgar
parda aur parde pe kuchh parchha.iyan

bhulne vaale ko shayad yaad va.ada aa gaya
mujh ko dekha muskuraya khud-ba-khud sharma gaya

ye sochte hi rahe aur bahar khatm hui
kahan chaman men nasheman bane kahan na bane

idhar se aaj vo guzre to munh phere hue guzre
ab un se bhi hamari be-kasi dekhi nahin jaati

palkein ghaneri gopiyon ki Toh liye hue
raadhaa ke jhaankne kaa jharoka ghazab ghazab

aaj kuchh mehrbaan hai sayyaad
kyaa nasheman bhi ho gayaa barbaad

karam par bhi hotaa hai dhokaa sitam kaa
yahaan tak alam-aashnaa ho gae ham

baat khote jo iltijaa karte
ai dil-e-naa-muraad kyaa karte

jo sazaa diije hai bajaa mujh ko
tujh se karni na thi vafaa mujh ko

qaasid payaam un kaa na kuchh der abhi sunaa
rahne de mahv-e-lazzat-e-zauq-e-khabar mujhe