jo sazaa diije hai bajaa mujh ko — Asar Lakhnavi

tumhaaraa husn aaraaish tumhaari saadgi zevar
tumhein koi zarurat hi nahin banne sanvarne ki

idhar se aaj vo guzre to munh phere hue guzre
ab un se bhi hamaari be-kasi dekhi nahin jaati

zindagi aur zindagi ki yaadgaar
parda aur parde pe kuchh parchhaaiyaan

ishq se log manaa karte hain
jaise kuchh ikhtiyaar hai apnaa

bhulne vaale ko shaayad yaad vaada aa gayaa
mujh ko dekhaa muskuraayaa khud-ba-khud sharmaa gayaa

sanaa teri nahin mumkin zabaan se
maaani duur phirte hain bayaan se

us ko fursat bhi nahin mujh ko tamannaa bhi nahin
phir khalish kyaa hai ki rah rah ke vafaa DhunDhti hai

tabiat ki mushkil-pasandi to dekho
hasinon se tark-e-vafaa chaahtaa huun

main khaandaan ki paabandiyon se vaaqif thi
khudaa kaa shukr hai us shakhs ne vafaa nahin ki

tum ne har zarre mein barpaa kar diyaa tufaan-e-shauq
ik tabassum is qadar jalvon ki tughyaani ke saath

haar hi jiit hai aain-e-vafaa ki ru se
ye vo baazi hai jahaan jiit ke haare saare

vahin pe TuTne lagtaa hai aitabaar-e-vafaa
jahaan yaqin zyaada dilaae jaate hain