Mael Lakhnavi

mohabbat aur 'maail' jald-baazi kyaa qayaamat hai
sukun-e-dil banegaa iztiraab aahista aahista

main ne dekhe hain dahakte hue phulon ke jigar
dil-e-binaa mein hai vo nuur tumhein kyaa maalum

sailaab-e-ishq gharq-kun-e-aql-o-hosh thaa
ik bahar thaa ki shaam-o-sahar garam-josh thaa

nazar aur vusat-e-nazar maalum
itni mahdud kaaenaat nahin

yaad aur un ki yaad ki allaah-re mahviyat
jaise tamaam umr ki fursat kharid li

nigaah-e-naaz ki pahli si barhami bhi gai
main dosti ko hi rotaa thaa dushmani bhi gai

daavaa-e-insaaniyat 'maail' abhi zebaa nahin
pahle ye socho kisi ke kaam aa saktaa huun main