sailaab-e-ishq gharq-kun-e-aql-o-hosh thaa — Mael Lakhnavi

nazar aur vusat-e-nazar maalum
itni mahdud kaaenaat nahin

yaad aur un ki yaad ki allaah-re mahviyat
jaise tamaam umr ki fursat kharid li

nigaah-e-naaz ki pahli si barhami bhi gai
main dosti ko hi rotaa thaa dushmani bhi gai

daavaa-e-insaaniyat 'maail' abhi zebaa nahin
pahle ye socho kisi ke kaam aa saktaa huun main

mohabbat aur 'maail' jald-baazi kyaa qayaamat hai
sukun-e-dil banegaa iztiraab aahista aahista

main ne dekhe hain dahakte hue phulon ke jigar
dil-e-binaa mein hai vo nuur tumhein kyaa maalum

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

pichhaa kisi tarah ye miraa chhoDtaa nahin
haathon se ishq ke koi jaave kahaan nikal

niind ke ghar mein hain khvaab aane lage
'ishq hai naachtaa aankh ke sahn mein

ishq ki choT kaa kuchh dil pe asar ho to sahi
dard kam ho yaa ziyaada ho magar ho to sahi

naqsh-e-qadam hain raah mein farhaad-o-qais ke
ai ishq khinch kar mujhe laayaa idhar kahaan