Shafqat Kazmi

tere har jaur pe yaan shukr-e-khudaa hai ai dost

تیرے ہر جور پہ یاں شکر خدا ہے اے دوست کہ یہی مسلک ارباب وفا ہے اے دوست ہم کو اس عہد وفا سے تھیں امیدیں کتنی تجھ کو جو عہد وفا بھول چکا ہے اے دوست تیری جانب سے نہ لائی کوئی پیغام کبھی میری فریاد بھی صحرا کی صدا ہے اے دوست تیرے آنے کی دوبارہ جو کوئی آس نہیں کتنی سنسان مرے دل کی فضا ہے اے دوست تیری یادوں سے بھی تسکین تمنا نہ ہوئی وقت ہم پر کبھی ایسا بھی پڑا ہے اے دوست کیا عجب ہے کہ تری رنجش بے جا کے سبب تیرے شفقتؔ کو سر ترک وفا ہے اے دوست

har ghaDi karb-e-musalsal mein kaTi jaati hai

ہر گھڑی کرب مسلسل میں کٹی جاتی ہے زندگی اپنے گناہوں کی سزا پاتی ہے یاد آؤں کہ نہ آؤں مری قسمت لیکن ان سے امید ملاقات چلی جاتی ہے یوں مرے بعد ہے دنیا پہ اداسی طاری جیسے دنیا مرے حالات کا غم کھاتی ہے جب بھی آتا ہے تصور ترے انسانوں کا ایک فریاد مرے منہ سے نکل جاتی ہے خوش رہو دشت تمنا کی ہواؤ کہ مجھے تم سے بچھڑے ہوئے یاروں کی مہک آتی ہے زندگی میں کئی ایسے بھی ملے تھے ساتھی روح اب جن کے تصور سے بھی گھبراتی ہے غور کرتا ہوں جو شفقتؔ کبھی تنہائی میں اپنے حالات پہ تا دیر ہنسی آتی ہے