Shakeb Jalali

ye ek abr ka TukDa kahan kahan barse
tamam dasht hi pyasa dikha.i deta hai

log dete rahe kya kya na dilase mujh ko
zakhm gahra hi sahi zakhm hai bhar ja.ega

mujhe girna hai to main apne hi qadmon men girun
jis tarah saya-e-divar pe divar gire

rahta tha samne tira chehra khula hua
paDhta tha main kitab yahi har class men

'shakeb' apne ta.aruf ke liye ye baat kaafi hai
ham us se bach ke chalte hain jo rasta aam ho jaa.e

koi bhula hua chehra nazar aa.e shayad
a.ina ghaur se tu ne kabhi dekha hi nahin

aalam mein jis ki dhuum thi us shaahkaar par
dimak ne jo likhe kabhi vo tabsire bhi dekh

dil saa anmol ratan kaun kharidegaa 'shakeb'
jab bikegaa to ye be-daam hi bik jaaegaa

rote hain dil ke zakhm to hanstaa nahin koi
itnaa to faaeda mujhe tanhaaiyon se hai

khud apni aag se shaayad gudaaz ho jaaein
paraai aag se kab sang-dil pighalte hain

ham-safar rah gae bahut pichhe
aao kuchh der ko Thahar jaaein

jo motiyon ki talab ne kabhi udaas kiyaa
to ham bhi raah se kankar sameT laae bahut