Taimur Hasan

phir jo karne lagaa hai tu vaada
kyaa mukarne kaa phir iraada hai

miri tavajjoh faqat mire kaam par rahegi
main khud ko saabit karungaa daavaa nahin karungaa

ham duniyaa se jab tang aayaa karte hain
apne saath ik shaam manaayaa karte hain

safar mein hoti hai pahchaan kaun kaisaa hai
ye aarzu thi mire saath tu safar kartaa

zindagi jang hai aasaab ki aur ye bhi suno
ishq aasaab ko mazbut banaa detaa hai

main ne bakhsh di tiri kyuun khataa tujhe ilm hai
tujhe di hai kitni kaDi sazaa tujhe ilm hai

zindagi bhar ki riyaazat miri be-kaar gai
ik khayaal aayaa thaa badle mein vo kyaa detaa hai

ye jang jiit hai kis ki ye haar kis ki hai
ye faisla miri TuuTi kamaan se hogaa

utaar lafzon kaa ik zakhira ghazal ko taaza khayaal de de
khud apni shohrat pe rashk aae sukhan mein aisaa kamaal de de

tujhe main apnaa nahin samajhtaa isi liye to
zamaane tujh se main koi shikva nahin karungaa

suraj ke us jaanib basne vaale log
aksar ham ko paas bulaayaa karte hain

khushi zarur thi 'taimur' din nikalne ki
magar ye gham bhi sivaa thaa ki raat biit gai