Yasir Tahsin

pahle tu ik jhuTe gham mein miT jaane kaa naaTak rach
phir duniyaa ko jaa jaa kar batlaa tu kitne dukh mein hai

tiri yaad siine se rukhsat hui
ye buDhiyaa baDe din se bimaar thi

chal diye hain bol kar vaapas na lauTeinge kabhi
chal diye hain ik daf'a phir lauT aane ke liye

tum jo kahte ho chuum loge hamein
karne vaale kahaa nahin karte

us ne din jaldi Dhalne ki khvaahish ki
dharti ne raftaar baDhaa di gardish ki

jo tum na hogi to dil haveli saraae hogi
saraae jis mein hasin chehre rukaa kareinge

barson kaaT liye ye kah kar
kal ko vasl huaa jaataa hai

aamad hui thi main ne hi dhutkaar di ghazal
ye kah ke dusraa koi shaa'ir talaash kar

aansu kareinge ek bhi zaae' na aankh se
dariyaa ko paaT kar yahaan sahraa banaaeinge

ham donon kaa 'ishq mukammal honaa mushkil lagtaa hai
tu jins-e-jinnaat ki paidaa aur main beTaa aadam kaa

khudaa ki aankh hain aankhein hamaari
khudaa in se hi duniyaa dekhtaa hai

ik din har manzar kaalaa ho jaaegaa
suraj us ki zulfon mein kho jaaegaa