khudaa ki aankh hain aankhein hamaari — Yasir Tahsin

haae vo shokh sandali qaamat
jis ne mujh be-niyaaz ko maaraa

chal diye hain bol kar vaapas na lauTeinge kabhi
chal diye hain ik daf'a phir lauT aane ke liye

tum jo kahte ho chuum loge hamein
karne vaale kahaa nahin karte

us ne din jaldi Dhalne ki khvaahish ki
dharti ne raftaar baDhaa di gardish ki

pahle tu ik jhuTe gham mein miT jaane kaa naaTak rach
phir duniyaa ko jaa jaa kar batlaa tu kitne dukh mein hai

aisi tanhaa raaton mein hi aati hai
ek ghazal jo shaa'ir ko khaa jaati hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

ret par ik nishaan hai shaayad
ye hamaaraa makaan hai shaayad

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

pyaaso raho na dasht mein baarish ke muntazir
maaro zamin pe paanv ki paani nikal paDe

aasmaan jhaank rahaa hai 'khaalid'
chaand kamre mein mire utraa hai

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai