ab tak ilaaj-e-ranjish-e-be-jaa na kar sake — Abu Mohammad Sahar

"har khauf har khatar se guzarnaa bhi sikhiye jiinaa hai gar aziiz to marnaa bhi sikhiye ye kyaa ki Duub kar hi mile saahil-e-najaat sailaab-e-khun se paar utarnaa bhi sikhiye aisaa na ho ki khvaab hi rah jaae zindagi jo dil mein Thaaniye use karnaa bhi sikhiye bigDe bahut kashaakash-e-naaz-o-niyaaz mein ab us ki anjuman mein sanvarnaa bhi sikhiye hotaa hai pastiyon ke muqaddar mein bhi uruuj ik mauj-e-tah-nashin kaa ubharnaa bhi sikhiye auron ki sard-mehri kaa shikva bajaa 'sahar' khud apne dil ko pyaar se bharnaa bhi sikhiye"

"khvaabon kaa nashsha hai na tamannaa kaa silsila ab rah gayaa hai bas gham-e-duniyaa kaa silsila aabaad duur duur hain viraan se kuchh maqaam ye bastiyaan hain yaa koi sahraa kaa silsila gardish mein jaan-o-dil hon to kyunkar mile sukun yaaro nahin ye saaghar-o-minaa kaa silsila do hi qadam chale the kisi ki talaash mein phir mil sakaa na naqsh-e-kaf-e-paa kaa silsila insaan ko silsilon se milegi najaat kyaa duniyaa ke baad hai abhi uqbaa kaa silsila apne vajud se bhi gile par huaa tamaam itnaa baDhaa shikaayat-e-bejaa kaa silsila ik shahr-e-tishna-kaam mein jiite hain yuun 'sahar' aataa hai roz khvaab mein dariyaa kaa silsila"

"kho ke dekhaa thaa paa ke dekh liyaa har tarah dil dikhaa ke dekh liyaa phir khule ibtidaa-e-ishq ke baab us ne phir muskuraa ke dekh liyaa yaad kuchh bhi rahaa na us ke sivaa ham ne us ko bhulaa ke dekh liyaa zindagi ne khushi ke dhoke mein rabt gham se baDhaa ke dekh liyaa aise bichhDe ki phir mile na kabhi khuub daaman chhuDaa ke dekh liyaa khvaab mubham khayaal be-maani ranj-e-duri uThaa ke dekh liyaa kitne biite dinon kaa gham thaa 'sahar' aaj jis ne rulaa ke dekh liyaa"

"ishq ki sai-e-bad-anjaam se Dar bhi na sake ham tiri chashm-e-inaayat se utar bhi na sake tu na miltaa magar allaah re mahrumi-e-shauq jiine vaale tiri ummid mein mar bhi na sake barq se khelne tufaan pe hansne vaale aise Duube tire gham mein ki ubhar bhi na sake husn khud husn-e-mujassam se pashimaan uTThaa aaina le ke vo baiThe to sanvar bhi na sake tishna-lab baiThe hain mai-khaana-e-hasti mein 'sahar' dil vo TuuTaa huaa paimaana ki bhar bhi na sake"

"chaand kaa raqs sitaaron kaa fusun maangti hai zindagi phir koi andaaz-e-junun maangti hai muddatein guzrin ki yakh-basta hue qalb-o-jigar ghairat-e-ishq magar soz-e-darun maangti hai faiz-e-mausam thaa parinde hue aazaad magar khu-e-sayyaad vahi said-e-zabun maangti hai fasl-e-gul ke liye kyaa jaan pe khele koi ab to har mauj-e-havaa tohfa-e-khun maangti hai kuchh to ai yurish-e-aalaam-o-havaadis dam le gardish-e-vaqt bhi thoDaa saa sakun maangti hai khubi-e-fan nahin parvarda-e-aavurd 'sahar' ruh-e-takhliq dam-e-kun-fa-yakun maangti hai"

"ye to nahin ki baadiya-paimaa na aaegaa ai dasht-e-aarzu koi ham saa na aaegaa chalnaa nasib-e-zist hai yuun hi chale chalo is raaste mein shahr-e-tamannaa na aaegaa raah-e-vafaa mein qatra-e-shabnam bhi hai bahut jis se bujhegi pyaas vo dariyaa na aaegaa khud ho sake to apne andhere ujaal lo ab koi saahab-e-yad-e-baizaa na aaegaa ai ahl-e-dil khamosh ki ye jaa-e-sabr hai dukh to yunhi raheinge masihaa na aaegaa gaahe vufur-e-shauq to gaahe hujum-e-yaas sab kuchh to aaegaa hamein jiinaa na aaegaa baiThe rahein 'sahar' yunhi divaar o dar liye apnaa jise kahein koi aisaa na aaegaa"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"jis din se meraa khvaab suhaanaa badal gayaa us din se zindagi kaa fasaana badal gayaa sunne lagaa huun jab se nasihat baDon ki main jaari thaa jo labon pe taraana badal gayaa pahchaan kaa havaala bhi baaqi nahin rahaa chehre ke saath aaina-khaana badal gayaa uThti nahin hai aankh bhi ab aasmaan ki samt jab se gali kaa chaand puraanaa badal gayaa tahzib jin ke ghar ki 'alaamat thi kal talak afsos aaj un kaa gharaanaa badal gayaa 'azmat kaa taaj sar pe hai 'akhilesh' ke sajaa aisi havaa chali ki zamaana badal gayaa itni sharaafaton mein kami aa gai hai aaj pahle thaa jo libaas puraanaa badal gayaa ahl-e-vafaa ne jis ki thi taarikh ki raqam 'faaruq' 'ishq kaa vo fasaana badal gayaa"

"tirgi shama bani raahguzar mein aai saaat ik aisi bhi kal apne safar mein aai jis jagah chehra hi meyaar-e-vafaa Thahraa hai khaak hi khaak vahaan dast-e-hunar mein aai teri nazron mein thi duniyaa to yahi kyaa kam thaa hashr ye hai ki tu duniyaa ki nazar mein aai baar-haa yaaron ne saahil se kahaa thaa ham hain baar-haa naav magar apni bhanvar mein aai zindagi samjhun ise yaa ki ise maut kahun vo jo mehmaan ki surat mire ghar mein aai yuun bhi taarikh ki taarikh raqam hoti hai nikli taarikh mahal se to khanDar mein aai khvaab hi khvaab ki taabir huaa to jaanaa zindagi kyuun kisi aankhon ke asar mein aai shama jalte hi bujhi aur dhuaan aisaa uThaa lazzat-e-shaam yahaan khvaab-e-sahar mein aai zindagi kuchh hai 'ataa' sher-o-adab hai kuchh aur ye do-rangi ki vabaa kaisi hunar mein aai"

"khaamushi ke batn se ye guftani paidaa hui main ba-zaahir chup huaa aur shaaeri paidaa hui is tarah saabit huaa gham aur khushi kaa imtizaaj hanste hanste us ki aankhon mein nami paidaa hui jurm ki paadaash mein ham khaak par pheinke gae so yahaan par intiqaaman zindagi paidaa hui khauf ne hi maslahat ki raah bhi ijaad ki main andheron se Daraa aur raushni paidaa hui dil mein kab utri kisi ke be-maaani guftugu baat karne se to bas aavaaz hi paidaa hui"

"zindagi bojhal hui aazaar se jism jhuktaa jaa rahaa hai baar se doston ne is qadar dhoke diye aur raghbat baDh gai aghyaar se zindagi kaa ik nayaa imkaan huaa ik daricha khul gayaa divaar se ab bayaan kaise karun rudaad-e-gham kaam mushkil hai dil-e-naa-chaar se hijr ki raaton mein bahtaa hi rahaa ek naala chashm-e-dariyaa-baar se misl-e-majnun regzaaron mein rahe sar paTakte ret ki divaar se ham asiraan-e-mohabbat hain yahaan uljhe hain ab gesu-e-khamdaar se 'qalb' teri ghazlein yuun shaadaan karein dard nikle hai tire ashaar se"

"zindagi dushvaar hogi ye kabhi sochaa na thaa vo bagule gham ke uTThe jin kaa andesha na thaa saamne tum aa gae ho to bataa duun jaan-e-jaan jaise dil dhaDkaa thaa ab ki vaise dil dhaDkaa na thaa ye iraada kar liyaa thaa ham na bichhDeinge kabhi TuTeinge ik pal mein rishte ye kabhi sochaa na thaa yaad-e-maazi miT rahi hai vaqt ki raftaar se ab tasavvur mein hamaare koi bhi chehra na thaa sakht hairat ho rahi hai dekh kar apnaa vajud dhuup mein the sab ke saaye par miraa saayaa na thaa shauq-e-manzil dekh meri dekh meraa hausla shahr-e-dil ke raaston mein main kabhi Thahraa na thaa 'qalb' ko sahraa-navardi raas kyaa aati bhalaa vo kabhi aavaargi mein dar-ba-dar bhaTkaa na thaa"