abhi lataafat-e-urdu zabaan baaqi hai — Kaleem Jazil

"masti-bhari vo shaam suhaani uThaa ke laa jaa mai-kade se meri javaani uThaa ke laa dil ki umang vasl ki khushbu ke vaaste baagh-e-vafaa se raat ki raani uThaa ke laa baatil se tujh ko maarka karnaa hai gar yahaan chhoDi hui salaf ki nishaani uThaa ke laa ai bulbul-e-chaman tujhe shohrat jo chaahiye jaa us ke lab ki shokh-bayaani uThaa ke laa divaar-e-dil ki shaan baDhaane ke vaaste tasvir us ki koi puraani uThaa ke laa mahfil mein hongi teri paziraaiyaan bahut 'jaazil' tu apni guzri kahaani uThaa ke laa"

"chaman ki taazgi phulon ki dil-kashi le kar tire dayaar mein aaya huun zindagi le kar jo kar rahaa hai ikaTThaa mataa-e-hasti to vahaan na jaaegaa sun le tu ek bhi le kar ragon mein dauD rahi hai siyaahi nafrat ki chale bhi aao mohabbat ki raushni le kar navaaz deinge to ehsaan aap kaa hogaa main TuuTi phuTi yahaan aaya shaaeri le kar zamaana dekhne lagtaa hai shak ki nazron se koi nikaltaa nahin lab pe ab hansi le kar kisi se kuchh nahin kahtaa hai apne dil ki baat bhaTak rahaa hai vo honTon pe khaamushi le kar andhere paanv pasaareinge kis tarah 'jaazil' mohabbaton ki main niklaa huun chaandni le kar"

"ye sahraa-e-mohabbat hai yahaan saaya nahin koi guzarte jaa rahe hain sab magar ruktaa nahin koi tumhin se meri vaabasta bahaar-e-zindagaani thi tumhaare baad in aankhon mein ab jachtaa nahin koi chalo chal kar nai duniyaa koi aabaad karte hain ki mazlumon ki fariyaadein yahaan suntaa nahin koi mohabbat kab kisi ko is jahaan mein raas aai hai tumhaari bevafaai kaa mujhe shikva nahin koi bayaabaan ki tarah lagti hain jab khaamosh rahti hain chhalak jaae to in aankhon saa phir dariyaa nahin koi vatan pe jaan-nisaari kaa to daavaa log karte hain kisi mein jaan luTaane kaa magar jazba nahin koi sabhi aasuda rahte hain sukun ki niind sote hain hamaare shahr mein 'jaazil' abhi bhukaa nahin koi"

"aankhon mein intizaar ki ghaDiyaan liye hue baiThaa huun dil mein kitne hi armaan liye hue pal-bhar mein phuuT saktaa hai jazbon kaa ik hujum aaghosh mein hubaab hai tufaan liye hue hasrat-bhari nigaah se bas dekhtaa rahaa niklin jab us ko saath mein sakhiyaan liye hue maanaa ki meri zindagi mushkil mein hai magar chaltaa huun phir bhi khushiyon kaa saamaan liye hue 'jaazil' bahut hi naaz thaa jab ishq par tujhe kyon phir rahaa hai chaak garebaan liye hue"

"na ye badlaa na vo badlaa na ye dil kaa jahaan badlaa agar badlaa yahaan kuchh to faqat vo mehrbaan badlaa tumhein bhi chain ki nindein yahaan sone nahin deingi agar ajdaad kaa tum ne zaraa saa bhi nishaan badlaa zamaane mein bahut aaya taghayyur dosto lekin zamin jaisi ki taisi hai na rang-e-aasmaan badlaa abhi tak log qaaem hain unhin jhuTi rivaayat par tumhaari haq-bayaani se koi aakhir kahaan badlaa hamesha jis ke honTon par mohabbat ki rahin baatein khudaa jaane ki kyon us kaa hai andaaz-e-bayaan badlaa qadam aage baDhaataa hi rahaa main sakht raahon par na himmat hi miri TuuTi na ye azm-e-javaan badlaa hai un ko aaj bhi 'jaazil' vafaadaari pe shak lekin na ham ne shaakh-e-gul chhoDi na ham ne aashiyaan badlaa"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"jis din se meraa khvaab suhaanaa badal gayaa us din se zindagi kaa fasaana badal gayaa sunne lagaa huun jab se nasihat baDon ki main jaari thaa jo labon pe taraana badal gayaa pahchaan kaa havaala bhi baaqi nahin rahaa chehre ke saath aaina-khaana badal gayaa uThti nahin hai aankh bhi ab aasmaan ki samt jab se gali kaa chaand puraanaa badal gayaa tahzib jin ke ghar ki 'alaamat thi kal talak afsos aaj un kaa gharaanaa badal gayaa 'azmat kaa taaj sar pe hai 'akhilesh' ke sajaa aisi havaa chali ki zamaana badal gayaa itni sharaafaton mein kami aa gai hai aaj pahle thaa jo libaas puraanaa badal gayaa ahl-e-vafaa ne jis ki thi taarikh ki raqam 'faaruq' 'ishq kaa vo fasaana badal gayaa"

"tirgi shama bani raahguzar mein aai saaat ik aisi bhi kal apne safar mein aai jis jagah chehra hi meyaar-e-vafaa Thahraa hai khaak hi khaak vahaan dast-e-hunar mein aai teri nazron mein thi duniyaa to yahi kyaa kam thaa hashr ye hai ki tu duniyaa ki nazar mein aai baar-haa yaaron ne saahil se kahaa thaa ham hain baar-haa naav magar apni bhanvar mein aai zindagi samjhun ise yaa ki ise maut kahun vo jo mehmaan ki surat mire ghar mein aai yuun bhi taarikh ki taarikh raqam hoti hai nikli taarikh mahal se to khanDar mein aai khvaab hi khvaab ki taabir huaa to jaanaa zindagi kyuun kisi aankhon ke asar mein aai shama jalte hi bujhi aur dhuaan aisaa uThaa lazzat-e-shaam yahaan khvaab-e-sahar mein aai zindagi kuchh hai 'ataa' sher-o-adab hai kuchh aur ye do-rangi ki vabaa kaisi hunar mein aai"

"khaamushi ke batn se ye guftani paidaa hui main ba-zaahir chup huaa aur shaaeri paidaa hui is tarah saabit huaa gham aur khushi kaa imtizaaj hanste hanste us ki aankhon mein nami paidaa hui jurm ki paadaash mein ham khaak par pheinke gae so yahaan par intiqaaman zindagi paidaa hui khauf ne hi maslahat ki raah bhi ijaad ki main andheron se Daraa aur raushni paidaa hui dil mein kab utri kisi ke be-maaani guftugu baat karne se to bas aavaaz hi paidaa hui"

"zindagi bojhal hui aazaar se jism jhuktaa jaa rahaa hai baar se doston ne is qadar dhoke diye aur raghbat baDh gai aghyaar se zindagi kaa ik nayaa imkaan huaa ik daricha khul gayaa divaar se ab bayaan kaise karun rudaad-e-gham kaam mushkil hai dil-e-naa-chaar se hijr ki raaton mein bahtaa hi rahaa ek naala chashm-e-dariyaa-baar se misl-e-majnun regzaaron mein rahe sar paTakte ret ki divaar se ham asiraan-e-mohabbat hain yahaan uljhe hain ab gesu-e-khamdaar se 'qalb' teri ghazlein yuun shaadaan karein dard nikle hai tire ashaar se"

"zindagi dushvaar hogi ye kabhi sochaa na thaa vo bagule gham ke uTThe jin kaa andesha na thaa saamne tum aa gae ho to bataa duun jaan-e-jaan jaise dil dhaDkaa thaa ab ki vaise dil dhaDkaa na thaa ye iraada kar liyaa thaa ham na bichhDeinge kabhi TuTeinge ik pal mein rishte ye kabhi sochaa na thaa yaad-e-maazi miT rahi hai vaqt ki raftaar se ab tasavvur mein hamaare koi bhi chehra na thaa sakht hairat ho rahi hai dekh kar apnaa vajud dhuup mein the sab ke saaye par miraa saayaa na thaa shauq-e-manzil dekh meri dekh meraa hausla shahr-e-dil ke raaston mein main kabhi Thahraa na thaa 'qalb' ko sahraa-navardi raas kyaa aati bhalaa vo kabhi aavaargi mein dar-ba-dar bhaTkaa na thaa"