apnaa dukhDaa kahte hain — Gauhar Hoshiyarpuri

"saman-baron se chaman daulat-e-numu maange havaa-e-daaman-e-gul gesuon ki bu maange taraaz-e-shokhi-e-paa hai gyaah-e-sabz ki maang khiraam-e-naaz kaa andaaz aab-ju maange bikharti zulf se TuuTe ghurur-e-shab kaa tilism sahar kaa husn fusun-e-rukh-e-niku maange varaq varaq gul-e-tar mauj mauj baad-e-sahar badan kaa lams tire pairahan ki bu maange shigaaf-e-koh na thaa tesha-e-vafaa ki talab ye ju-e-shir abhi aur kuchh lahu maange shikasta-e-shisha-e-pindaar ki sadaa bhi sun karam ki bhiik jab us sang-dil se tu maange kahaan vo shokh magar apnaa nutq-o-lab 'gauhar' usi kaa zikr pae-zeb-e-guftugu maange"

"ik saaya-e-shaam yaad aayaa khushbu kaa khiraam yaad aayaa dhoyaa huaa saat paaniyon mein kyaa naam thaa naam yaad aayaa lahje mein shaguftagi gulon ki ik shusta kalaam yaad aayaa achchhaa huaa gor tak to pahunche yaaron ko salaam yaad aayaa ai mauja-e-baad kyaa huaa hai kyaa taaza payaam yaad aayaa kuchh aur zamin mein gaD gae ham jab apnaa maqaam yaad aayaa maqtal se muD aae ghar ko 'gauhar' shaayad koi kaam yaad aayaa"

"yahaan kaun is ke sivaa rah gayaa zamaana gayaa aaina rah gayaa vo husn-e-saraapaa vo husn-aafrin magar har koi dekhtaa rah gayaa chalo kyaa huaa raushni hi to thi yahaan dekhne ko bhi kyaa rah gayaa hamaari kuchh apni rivaayat bhi thi kitaabon mein likkhaa huaa rah gayaa khudaai ko bhi ham na khush rakh sake khudaa bhi khafaa kaa khafaa rah gayaa muqaddar kahin kaj-kulaahi kare koi ghar mein mahv-e-duaa rah gayaa kahin ek chup bhi rasaa ho gai koi boltaa boltaa rah gayaa"

"sar par koi aasmaan rakh de ik munh mein magar zabaan rakh de aa sulh nahin salaam to le ye tiir chaDhi kamaan rakh de itnaa bhi na be-lihaaz ho jaa thoDaa saa to khush-gumaan rakh de tujh ko tiri hikmatein mubaarak ik haath pe ik jahaan rakh de phir ham ko gadaa-e-rah banaa kar rah mein koi imtihaan rakh de tafsil kahin garaan na paD jaae ik harf mein daastaan rakh de ab dhyaan ki baat chhiD gai to kuchh is se alag bhi dhyaan rakh de"

"dariyaa mein ye naav kis taraf hai paani kaa bahaav kis taraf hai ye raah kidhar ko muD rahi hai logon kaa lagaav kis taraf hai manzil kahaan taakte hain raahi takte hain paDaav kis taraf hai taasir kahaan gai sukhan se jazbon kaa alaav kis taraf hai aavaaz kahin bulaa rahi hai yaaron kaa rijhaav kis taraf hai tasvir dikhaa rahi hai kyaa kuchh rangon kaa rachaao kis taraf hai khoe hue tum kahaan ho 'gauhar' dil kaa ye khichaao kis taraf hai"

"jaati rut se pyaar karoge kar lo baat udhaar karoge tab mil kar ehsaan kiyaa thaa ab mil kar isaar karoge jitne khvaab utni taabirein kitne daagh shumaar karoge ai inkaar ke khugar logo aur bhi koi vaar karoge us ke naam ko naav banaa kar pyaason ko sarshaar karoge farz karo ham mar na sake to jiine se inkaar karoge farz karo ham haar gae to qabr kahaan tayyaar karoge"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"