arz kuchh karnaa thaa fursat ho agar — Ajmal Siddiqui

"khul ke barasnaa aur baras kar phir khul jaanaa dekhaa hai ham se puchho!! un aankhon kaa ek zamaana dekhaa hai tum ne kaise maan liyaa vo thak kar baiTh gayaa hogaa tum ne to khud apni aankhon se vo divaanaa dekhaa hai manzil tak pahunchein ki na pahunchein raah magar apni hogi tu rahne de vaaiz teraa raah bataanaa dekhaa hai dhuul kaa ik zarra na uDe aavaaz kare parchhaain bhi maut bhi aa kar marti nahin thi vo viraana dekhaa hai gulshan se ham siikh na paae vaqti khushiyon ko jiinaa jabki ham ne fasl-e-gul kaa aanaa jaanaa dekhaa hai dil to saada hai teri har baat ko sachchaa maantaa hai aql ne baatein karte teraa aankh churaanaa dekhaa hai lafz davaa hai lekin is ke saath hi kuchh parhez bhi hai lafz ke baais pal mein khonaa pal mein paanaa dekhaa hai"

"na nazar se koi guzar sakaa na hi dil se malba haTaa sakaa na vo dar bachaa na vo ghar bachaa tere baad koi na aa sakaa na vo his kisi mein na taab hai miraa gham to khair uThaae kaun vo jo misra gham kaa thaa tarjumaan koi us ko bhi na uThaa sakaa kabhi khauf thaa tire hijr kaa kabhi aarzu ke zavaal kaa rahaa hijr-o-vasl ke darmiyaan tujhe kho sakaa na main paa sakaa mire dil mein tukhm-e-yaqin rakh de lachak tu shaakh-e-mizaaj ko vo chaman khilaa mire baaghbaan jo chaman koi na khilaa sakaa mire saath su-e-junun chal mire zakhm khaa miraa raqs kar mire sher paDh ke milegaa kyaa pataa paDh ke ghar koi paa sakaa? jo likho ibaarat-e-ishq tum to anaa kaa koi na pech ho jo lab-e-davaat pe jhuk gayaa vo qalam hi naqsh banaa sakaa"

"zindagi roz banaati hai bahaane kyaa kyaa jaane rahte hain abhi khel dikhaane kyaa kyaa sirf aankhon ki nami hi to nahin mazhar-e-gham kuchh tabassum bhi jataa dete hain jaane kyaa kyaa khaTkein is aankh mein to dhaDkein kabhi us dil mein dar-ba-dar ho ke bhi apne hain Thikaane kyaa kyaa bol paDtaa to miri baat miri hi rahti khaamushi ne hain diye sab ko fasaane kyaa kyaa shahr mein rang jamaa gaanv mein faslein ujDin hashr uThaayaa binaa mausam ki ghaTaa ne kyaa kyaa khvaab o ummid kaa haq, aah kaa fariyaad kaa haq tujh pe vaar aae hain ye tere divaane kyaa kyaa"

"dukhe dilon pe jo paD jaae vo tabib nazar to baagh-e-dil mein bhi aa jaaein andalib nazar har ek subh vazu karti hain miri aankhein ki shaayad aaj to aa jaae vo habib nazar isi tarah se rah-e-yaar ko take jaanaa had-e-nazar ko giraa degi an-qarib nazar tu intizaar se chhuT kar hai khush magar mujh ko ghaDi judaai ki aane lagi qarib nazar bujhaa do sham-e-mohabbat jalaa do gulshan-e-ishq Daraa sakegi na aashiq ko ye muhib nazar jamaal-o-husn ke qaael hain us ke sab 'ajmal' bas ek tum hi yahaan rakhte ho ajiib nazar"

"itraataa garebaan par thaa bahut, rah-e-ishq mein kab kaa chaak huaa vo qissa-e-aazaadaana-ravi, us zulf ke haathon paak huaa kyaa kyaa na paDhaa is maktab mein, kitne hi hunar sikhe hain yahaan izhaar kabhi aankhon se kiyaa kabhi had se sivaa bebaak huaa jis din se gayaa vo jaan-e-ghazal har misre ki surat bigDi har lafz pareshaan dikhtaa hai, is darja varaq namnaak huaa khush rahiyo sun ai baad-e-sabaa kahin aur tu apne naaz dikhaa tu jis ke baal uDaati thi vo shakhs to kab kaa khaak huaa"

"ro ro ke bayaan karte phiro ranj-o-alam khuub haasil nahin kuchh bhi jo na ho rang-e-qalam khuub baazaar mein ik chiiz nahin kaam ki mere ye shahr miri jeb kaa rakhtaa hai bharam khuub manzil to kisi khaas ko hi milti hai, varna dekhe to sabhi ne hain mire naqsh-e-qadam khuub ye Thiik hai rishte mein bandhaa rahtaa hai ab dil is kaa'be mein hotaa thaa kabhi jashn-e-sanam khuub"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"Tuut kar ab sanvar gayaa huun main is tarah se bikhar gayaa huun main jo tire naam ki gali hai vo us gali se guzar gayaa huun main yaadein teri sameT laayaa huun aaj jab se udhar gayaa huun main khud mukarnaa sikhaa diyaa us ne phir kahaa ki mukar gayaa huun main kal talak jo na kar sakaa thaa main aaj vo kaam kar gayaa huun main yuun kahin main nahin Thahartaa par tere dar par Thahar gayaa huun main"

"bistar-e-karb pe jab niind jalaai main ne tab kisi khvaab ki buniyaad uThaai main ne zakhm aise the ki har shakhs ke aage rakkhe baat aisi thi ki khud se bhi chhupaai main ne hurmat-e-gham ke liye khud ko aziyyat bakhshi phir usi dard se taskin bhi paai main ne main ne zakhmon ko kuredaa unhein taaza rakkhaa tab kahin dasht mein ki naghma-saraai main ne apni khiDki se yunhi khud ko pukaaraa kal shab aur phir khud ko vo aavaaz sunaai main ne jaane vaale se rag-e-jaan kaa bhi rishta thaa 'samir' ye samajhne mein bahut der lagaai main ne"

"zindagi dushvaar hogi ye kabhi sochaa na thaa vo bagule gham ke uTThe jin kaa andesha na thaa saamne tum aa gae ho to bataa duun jaan-e-jaan jaise dil dhaDkaa thaa ab ki vaise dil dhaDkaa na thaa ye iraada kar liyaa thaa ham na bichhDeinge kabhi TuTeinge ik pal mein rishte ye kabhi sochaa na thaa yaad-e-maazi miT rahi hai vaqt ki raftaar se ab tasavvur mein hamaare koi bhi chehra na thaa sakht hairat ho rahi hai dekh kar apnaa vajud dhuup mein the sab ke saaye par miraa saayaa na thaa shauq-e-manzil dekh meri dekh meraa hausla shahr-e-dil ke raaston mein main kabhi Thahraa na thaa 'qalb' ko sahraa-navardi raas kyaa aati bhalaa vo kabhi aavaargi mein dar-ba-dar bhaTkaa na thaa"

"jahaan-e-dard-o-gham hai aur main huun tiraa naqsh-e-qadam hai aur main huun kisi ki aankh nam hai aur main huun vufur-e-shauq kam hai aur main huun mujhe hai daulat-e-kaunain haasil mire rab kaa karam hai aur main huun main apne aap ko pahchaantaa huun miraa apnaa bharam hai aur main huun yahi kyaa kam hai duniyaa-e-vafaa mein mujhe ehsaas-e-gham hai aur main huun kisi ki yaad kaa ehsaan hai mujh par sukun-e-dil baham hai aur main huun mujhe 'mahmud' koi Dar nahin hai miraa apnaa qalam hai aur main huun"