barsar-e-ta'aaruf the ehtiyaat ke saae — Haneef Kaifi

"banaa ke toDti hai daaere charaagh ki lau bahaa ke le gai mujh ko kahaan shu'ur ki rau banaa chukaa huun adhure mujassame kitne kahaan vo naqsh jo takmil-e-fan kaa ho partav vo moD mere safar kaa hai nuqta-e-aaghaaz fareb-khurda-e-manzil hue jahaan rah-rau larazte hain miri mahrum-e-khvaab aankhon mein bikhar chuke hain jo khvaab un ke muntashir partav bhaTak na jaaun main tashkik ke andheron mein laraz rahi hai miri sham-e-etaqaad ki lau shab-e-daraaz kaa hai qissa mukhtasar 'kaifi' hui sahar ke ujaalon mein gum charaagh ki lau"

"hai raah-rau ke hue haadsaat ki divaar giraae kaun ye gard-e-hayaat ki divaar sahar hamaare muqaddar se duur hoti gai buland hoti gai roz raat ki divaar miTe jo ye hadd-e-faasil to aap tak pahunchein hamaare biich mein haail hai zaat ki divaar anaa anaa ke muqaabil hai raah kaise khule taalluqaat mein haail hai baat ki divaar na jaane kaun se jhonke mein gir paDe 'kaifi' shikasta hone lagi hai hayaat ki divaar"

"tamaam aalam se moD kar munh main apne andar samaa gayaa huun mujhe na aavaaz de zamaane main apni aavaaz sun rahaa huun tazaad-e-hasti kaa falsafa huun uruuj o pasti kaa aainaa huun uThaa huaa ik ghurur-e-sar huun miTaa huaa ek naqsh-e-paa huun ho kyaa taayyun miri hadon kaa shumaar kyaa meri vusaton kaa hazaaron aalam base hain mujh mein main behad-o-be-karaan khalaa huun azaab-e-ehsaas-o-aagahi ke vo dil-shikan khvaab-paash lamhe hazaar aaine TuTte hain main jab bhi aaina dekhtaa huun main naa-shunida sadaa-e-sahraa banungaa aavaaz-e-vaqt 'kaifi' zabaan-e-aalam pe aaungaa kal main aaj ik harf-e-naarsaa huun"

"kyaa moD 'ajab aayaa ye rishton ke safar mein main khud se judaa ho gayaa is raahguzar mein main ne hi ubhaare hain khutut us ke badan ke ik nuqta-e-mauhum huun main jis ki nazar mein baiThaa pas-e-divaar main ye soch rahaa huun kab rauzan-e-divaar badal jaataa hai dar mein gum kasrat-e-afraad mein ho jaate hain chehre insaan ki pahchaan ho kis tarh nagar mein aai na sahaare ko ik aavaaz-e-shanaasaa main Duub gayaa apni sadaaon ke bhanvar mein masrur huun yuun tark-e-jahaan kar ke main 'kaifi' duniyaa hi simaT aai hai goyaa mire ghar mein"

"bikhar ke ret hue hain vo khvaab dekhe hain miri nigaah ne kitne saraab dekhe hain sahar kahein to kahein kaise apni subhon ko ki raat ugalte hue aaftaab dekhe hain koi bhi rut ho mili hai dukhon ki fasl hamein jo mausam aayaa hai us ke itaab dekhe hain main bad-gumaan nahin huun magar kitaabon mein tumhaare naam kai intisaab dekhe hain kabhi ki ruk gai baarish guzar chukaa sailaab kai ghar ab bhi magar zer-e-aab dekhe hain koi hamaari ghazal bhi mulaahiza karnaa tumhaare ham ne kai intikhaab dekhe hain panaah DhunDte guzri hai zindagi 'kaifi' jhulasti dhuup mein saae ke khvaab dekhe hain"

"har ik kamaal ko dekhaa jo ham ne ru ba-zavaal sisak ke rah gai siine mein aarzu-e-kamaal ham apni Dubti qadron ke saath Duub gae milegi ab to kitaabon mein bas hamaari misaal hue anaa ke dikhaave se log sar afraaz anaa ne sar ko uThaa kar kiyaa hamein paamaal zaraa si umr mein kis kis kaa hal talaash karein khaDe hain raasta roke hue hazaar savaal mire khulus kaa yaaron ne aasraa le kar kiyaa hai khuub miri dosti kaa istehsaal bujhaa bujhaa saa yahi dil hai is shabaab ki raakh ragon mein dauD rahi thi jo aatish-e-sayyaal mile vo lamha jise apnaa kah sakein 'kaifi' guzar rahe hain isi justuju mein maah-o-saal"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"Tuut kar ab sanvar gayaa huun main is tarah se bikhar gayaa huun main jo tire naam ki gali hai vo us gali se guzar gayaa huun main yaadein teri sameT laayaa huun aaj jab se udhar gayaa huun main khud mukarnaa sikhaa diyaa us ne phir kahaa ki mukar gayaa huun main kal talak jo na kar sakaa thaa main aaj vo kaam kar gayaa huun main yuun kahin main nahin Thahartaa par tere dar par Thahar gayaa huun main"

"bistar-e-karb pe jab niind jalaai main ne tab kisi khvaab ki buniyaad uThaai main ne zakhm aise the ki har shakhs ke aage rakkhe baat aisi thi ki khud se bhi chhupaai main ne hurmat-e-gham ke liye khud ko aziyyat bakhshi phir usi dard se taskin bhi paai main ne main ne zakhmon ko kuredaa unhein taaza rakkhaa tab kahin dasht mein ki naghma-saraai main ne apni khiDki se yunhi khud ko pukaaraa kal shab aur phir khud ko vo aavaaz sunaai main ne jaane vaale se rag-e-jaan kaa bhi rishta thaa 'samir' ye samajhne mein bahut der lagaai main ne"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"jahaan-e-dard-o-gham hai aur main huun tiraa naqsh-e-qadam hai aur main huun kisi ki aankh nam hai aur main huun vufur-e-shauq kam hai aur main huun mujhe hai daulat-e-kaunain haasil mire rab kaa karam hai aur main huun main apne aap ko pahchaantaa huun miraa apnaa bharam hai aur main huun yahi kyaa kam hai duniyaa-e-vafaa mein mujhe ehsaas-e-gham hai aur main huun kisi ki yaad kaa ehsaan hai mujh par sukun-e-dil baham hai aur main huun mujhe 'mahmud' koi Dar nahin hai miraa apnaa qalam hai aur main huun"

"raakh ke Dher pe kyaa shoala-bayaani karte ek qisse ki bhalaa kitni kahaani karte husn itnaa thaa ki mumkin hi na thi khud-nigari ek imkaan ki kab tak nigaraani karte shola-e-jaan ko bujhaate yunhi qatra qatra khud ko ham aag banaate tujhe paani karte phuul saa tujh ko mahaktaa huaa rakhte shab bhar apne saanson se tujhe raat ki raani karte naddiyaan dekhein to bas sharm se paani ho jaaein chashm-e-khun-basta se paidaa vo ravaani karte sab se kahte ki ye qissa hai puraanaa saahab aah ki aanch se tasvir puraani karte dar-o-divaar badalne mein kahaan ki mushkil ghar jo hotaa to bhalaa naql-e-makaani karte koi aa jaataa kabhi yunhi agar dil ke qarib ham tiraa zikr pae-yaad-dahaani karte sach to ye hai ki tire hijr kaa ab ranj nahin kyaa dikhaave ke liye ashk-fishaani karte dil ko har lahza hi di aql pe ham ne tarjih yaar-e-jaani ko kahaan dushman-e-jaani karte shab isi tarah basar hoti hai meri 'irfaan' harf-e-khush-rang ko andoh-e-maaani karte"