bas ik dhokaa rah jaataa hai — Janan Malik

"naddi ye jaise mauj mein dariyaa se jaa mile tum se kahin milun main agar raasta mile milti hai ek saans ki mohlat kabhi kabhi shaayad ye raat bhi tiri subhon se jaa mile jo bhi milaa vo apni anaa kaa asiir thaa insaan ko DhunDne mein gai to khudaa mile is ahd-e-intishaar mein kyaa ittifaaq hai dard-o-alam ye ranj-o-malaal ek jaa mile dil mein zaraa khulus na mehr-o-vafaa kaa rang rasman bahut 'aziz bahut aqrabaa mile meri shikast mein mire kuchh mehrbaan bhi the meri safein jo chhoD ke dushman se jaa mile us samt se bhi guzre nai rut kaa kaarvaan ghaaron ke baasiyon ko bhi taaza havaa mile 'jaanaan' ye zindagi ke 'ajab saanehaat hain kuchh log apne-aap se aksar khafaa mile"

"aankh Tikti na thi chehre pe hasin aisaa thaa dil ki duniyaa mein koi jalva-nashin aisaa thaa dastaras mein thi magar paa na sakaa vo mujh ko dil mein ik umr se vo shakhs makin aisaa thaa ahd-o-paimaan se mukarne kaa saliqa thaa use detaa rahtaa thaa dalilein vo zahin aisaa thaa ab to banjar huaa viraan huaa barbaad huaa khitta-e-dil kabhi shaadaab-zamin aisaa thaa mujh ko jaagir samajhtaa thaa vo apni jaanaan main usi ki huun use mujh pe yaqin aisaa thaa"

"dekhiye kitne sukhan-fahm sukhan-var aae main ne ik phuul uThaayaa kai patthar aae kar chuke tark-e-ta'alluq to use sochnaa kyaa dil se niklaa hai to vo yaad bhi kyuun kar aae phir vahi raat ho baadal hon havaa chalti ho phir vahi chaand darakhton se nikal kar aae raah hamvaar muqaddar mein nahin thi shaayad paanv niklaa thaa abhi ghar se ki patthar aae ek do gaam-e-masaafat thi tiri galiyon ki saari duniyaa ki thakan laad ke ham ghar aae jang jaari hai abhi jaagte rahiye shab-bhar jaane kas oT se chhup kar koi lashkar aae kyaa koi gham ke ganvaane kaa hunar haath aayaa muskuraate hue jo ranj ke khugar aae dekh kar jis ki jhalak jaan mein jaan aati thi ab sar-e-raah use dekh ke chakkar aae is baras phuul ziyaada na sahi shaakhon par baarishein kam thiin magar rang baraabar aae ab to is niind mein chalte hue uktaa gae ham ab to behtar hai kisi moD pe Thokar aae ek do pal to faraamosh bhi kar dein us ko haan agar shakhs koi yaad baraabar aae gham-gusaaron mein mire chaaragaron mein aksar mere dushman bhi kai bhes badal kar aae log kis khvaab se rote hue uTThe 'jaanaan' jaane kis qarya-e-maatam se ye baahar aae"

"kaanTon jaisi taabirein thi phulon jaise khvaab ham ne chhoTi umron mein bhi kyaa kyaa dekhe khvaab mujh ko is malbus mein dekh ke khush the saare log aur kisi ne ye nahin puchhaa laDki tere khvaab ek jagah par sone vaale bhi kab yakjaa the apni apni nindein thiin aur apne apne khvaab main huun ab is basti ki taabiron par maamur log sunaane aa jaate hain ulTe-sidhe khvaab ek sukut thaa taariki thi vaqt ki Thahri saans miTTi ne baarish dekhi thi peD ne dekhe khvaab"

"miraa bannaa-sanvarnaa apni jaa hai tiraa dukh to vagarna apni jaa hai bahut bardaasht hai divaar-o-dar ki kahaan us ghar mein varna apni jaa hai main misl-e-sang-e-kohsaar-e-garaan huun mire andar kaa jharnaa apni jaa hai bajaa hai chaadar-e-shab ki damak bhi sitaaron kaa bikharnaa apni jaa hai ye dariyaa apni rau mein bah rahaa hai kisi kaa jinaa-marnaa apni jaa hai guzargaah-e-zamaana bhi hai lekin tiraa dil se guzarnaa apni jaa hai hasin vaade kiye the us ne 'jaanaan' unhein iifaa na karnaa apni jaa hai"

"kabhi to sochnaa tum un udaas aankhon kaa ye ratjagon mein ghiri mahv-e-yaas aankhon kaa main ghar gai thi kahin vahshaton ke jangal mein thaa ik hujum mire aas paas aankhon kaa barahnagi tire andar kahin panapti hai libaas DhunD koi be-libaas aankhon kaa tumhaare hijr kaa mausam hi raas aayaa mujhe yahi thaa ek tabiat-shanaas aankhon kaa usi ki nazr sabhi ratjage sabhi nindein aur us ki aankhon ke naam iqtibaas aankhon kaa paDi rahe tiri tasvir saamne yunhi ye zar khilaa rahe aankhon ke paas aankhon kaa khayaal thaa ki vo abr is taraf se guzregaa so ye bhi 'jaanaan' thaa vahm-o-qayaas aankhon kaa"

"is ishq-e-junun-khez mein kyaa kyaa nahin hotaa divaana hai jo qais se lailaa nahin hotaa kuchh hashr lahad par abhi barpaa nahin hotaa aae ho to Thahro koi zinda nahin hotaa kyuun kar ye kahun husn kaa nashsha nahin hotaa hotaa to bahut hai magar itnaa nahin hotaa kuchh kahiye to sharmaa ke jhukaa lete hain gardan bhule se bhi ab vaada-e-fardaa nahin hotaa milte hain vo dil surkh hui jaati hai chuTki naazuk hain bahut khun-e-tamannaa nahin hotaa deti hai mazaa mai kaa hamein talkhi-e-tauba jab haath mein paimaana-e-sahbaa nahin hotaa vo hashr ke din kushte ko Thukraa chuke sau-baar kuchh jaan si paD jaati hai zinda nahin hotaa boli ye tamannaa jo ruke vo dar-e-dil par ghar aap kaa hai aap se pardaa nahin hotaa tiron ko jagah dete hain jo siine mein apne un logon ke ai jaan kaleja nahin hotaa sahraa se qadam ghar ki taraf khaak uThaaun kaanTe se judaa paanv kaa chhaalaa nahin hotaa baiThe nazar aate hain vahi teri gali mein jin kaa kahin duniyaa mein Thikaanaa nahin hotaa furqat mein hai kyuun nazaa ki taklif gavaaraa mar jaaein 'riyaaz' aap se itnaa nahin hotaa"

"hai jo ik maa'raka faisal nahin hone detaa jin vo ho ke mujhe botal nahin hone detaa qatl ik roz hi kartaa huun isi goshe mein aur saabit ise maqtal nahin hone detaa zid hai us ki ki har ik shaakh ho phir sabz hi sabz garche paidaa koi konpal nahin hone detaa raushni apne khayaalon hi se karni hogi koi raushan kahin mash'al nahin hone detaa chun-ki miTTi ki bhi ek apni alag khushbu hai main kahin bhi ise sandal nahin hone detaa ik parinda ki jo sahtaa hai havaaon kaa dabaao aur parvaaz ko paidal nahin hone detaa Dar hai us ko nazar aae na kahin zehn kaa 'aks vo miraa aaina saiqal nahin hone detaa tiraa qaanun hai jangal kaa ghanimat hai ki tu mire is shahr ko jangal nahin hone detaa chalo baat us ki sunein ek 'ajab mantiq se jo kisi baat ko muhmal nahin hone detaa"

"muzhda ai zauq-e-asiri ki nazar aataa hai daam-e-khaali qafas-e-murgh-e-giraftaar ke paas jigar-e-tishna-e-aazaar tasalli na huaa ju-e-khun ham ne bahaai bun-e-har khaar ke paas mund gaiin kholte hi kholte aankhein hai hai khuub vaqt aae tum is 'aashiq-e-bimaar ke paas main bhi ruk ruk ke na martaa jo zabaan ke badle dashna ik tez saa hotaa mire gham-khvaar ke paas dahan-e-sher mein jaa baiThe lekin ai dil na khaDe ho jiye khubaan-e-dil-aazaar ke paas dekh kar tujh ko chaman bas-ki numu kartaa hai khud-ba-khud pahunche hai gul gosha-e-dastaar ke paas mar gayaa phoD ke sar 'ghaalib'-e-vahshi hai hai baiThnaa us kaa vo aa kar tiri divaar ke paas kab faqiron ko rasaai bu-e-mai-khvaar ke paas to bane bu dijiye maikhaane ki divaar ke paas"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"