chehra udaas udaas thaa mailaa libaas thaa — Majeed Amjad

"is apni kiran ko aati hui subhon ke havaale karnaa hai kaanTon se ulajh kar jiinaa hai phulon se lipaT kar marnaa hai shaayad vo zamaana lauT aae shaayad vo palaT kar dekh bhi lein in ujDi ujDi nazron mein phir koi fasaana bharnaa hai ye soz-e-darun ye ashk-e-ravaan ye kaavish-e-hasti kyaa kahiye marte hain ki kuchh din ji lein ham jiite hain ki aakhir marnaa hai ik shahr-e-vafaa ke band dariche aankhein miche sochte hain kab qaafila-haa-e-khanda-e-gul ko in raahon se guzarnaa hai is niili dhund mein kitne bujhte zamaane raakh bikher gae ik pal ki palak par duniyaa hai kyaa jiinaa hai kyaa marnaa hai raston pe andhere phail gae ik manzil-e-gham tak shaam hui ai ham-safaro kyaa faisla hai ab chalnaa hai ki Thaharnaa hai har haal mein ik shoridgi-e-afsun-e-tamannaa baaqi hai khvaabon ke bhanvar mein bah kar bhi khvaabon ke ghaaT utarnaa hai"

"qaasid-e-mast-gaam mauj-e-sabaa koi ramz-e-khiraam mauj-e-sabaa vaadi-e-barf kaa koi sandes mere ashkon ke naam mauj-e-sabaa koi mauj-e-khayaal mein bahti manzilon kaa payaam mauj-e-sabaa so simaTti masaafaton kaa tilism teri karvaT kaa naam mauj-e-sabaa tere daaman ki khushbuon mein hain gham sau suhaane maqaam mauj-e-sabaa aati patjhaD ke saath lauTte vaqt ik bahaarein payaam mauj-e-sabaa ik naved-e-nigaah-e-paik-e-habib ik javaab-e-salaam mauj-e-sabaa"

"ho ke is chashm-e-mai-parast se mast kyaa ulajhtaa hai aaj mast se mast ek hi laghzish aur guzar bhi gae aql ke har buland-o-past se mast kaun nazron mein ab samaae ki ham hain tiri chashm-e-mast-mast se mast is gulistaan mein piine aae hain har gul-e-saa-nagi-ba-dast se mast sab hain aaghosh-e-hosh mein 'amjad' ek hi huun dam-e-alast se mast"

"qarib-e-dil kharosh-e-sad-jahaan ham jo tum sun lo tumhaari daastaan ham kisi ko chaahne ki chaah mein gum jiye ban kar nigaah-e-tishnagaan ham har ik Thokar ki zad mein laakh manzil hamein DhunDo nasib-e-gumrahaan ham hamein samjho nigaah-e-naaz vaalo labon par kaanptaa harf-e-bayaan ham bujhi samton ki is nagri mein 'amjad' ubharte aaftaabon ki kamaan ham"

"tire farq-e-naaz pe taaj hai mire dosh-e-gham pe galim hai tiri daastaan bhi aziim hai miri daastaan bhi aziim hai miri kitni sochti subhon ko ye khayaal zahr pilaa gayaa kisi tapte lamhe ki aah hai ki khiraam-e-mauj-e-nasim hai tah-e-khaak kirmak-e-daana jo bhi sharik-e-raqs-e-hayaat hai na bas ek jalva-e-tur hai na bas ek shauq-e-kalim hai ye har ek samt masaafaton mein gundhi paDi hain jo saaatein tiri zindagi miri zindagi inhi mausamon ki shamim hai kahin mahmalon kaa ghubaar uDe kahin manzilon ke diye jalein kham-e-aasmaan rah-e-kaarvaan na maqaam hai na muqim hai haram aur dair fasaana hai yahi jalti saans zamaana hai yahi gosha-e-dil-e-naa-subur hi kunj-e-baagh-e-naim hai"

"baDhi jo had se to saare tilism toD gai vo khush-dili jo dilon ko dilon se joD gai abad ki raah pe be-khvaab dhaDkanon ki dhamak jo so gae unhein bujhte jagon mein chhoD gai ye zindagi ki lagan hai ki rat-jagon ki tarang jo jaagte the unhi ko ye dhun jhinjhoD gai vo ek Tiis jise teraa naam yaad rahaa kabhi kabhi to mire dil kaa saath chhoD gai rukaa rukaa tire lab par ajab sukhan thaa koi tiri nigah bhi jise naa-tamaam chhoD gai faraaz-e-dil se utarti hui nadi 'amjad' jahaan jahaan thaa hasin vaadiyon kaa moD gai"

"phir khuun mein vahshat raqsaan hai tajdid sitam karne ke liye ik taaza zakhm ki khvaahish hai ik sadma kam karne ke liye ham din-bhar duniyaa-daari mein hans hans ke baatein karte hain phir saari raat pighalte hain ik ashk raqam karne ke liye vo vasl ki jis ne ham donon ko yaksar be-buniyaad kiyaa ab fursat hai aa mil baiThein us vasl kaa gham karne ke liye ik kaari zakhm ki chaahat ne kyaa kyaa na hamein gulzaar kiyaa ham kis kis se mansub hue ik hijr baham karne ke liye insaan ke jiine marne ke majburi ke mukhtaari ke ye saare khel zaruri hain taamir adam karne ke liye"

"chaand bhi khoyaa khoyaa saa hai taare bhi khvaabida hain aaj fazaa ke bojhal-pan se lahje bhi sanjida hain jaane kin kin logon se is dard ke kyaa kyaa rishte the hijr ki is aabaad saraa mein sab chehre naadida hain itne barson baad bhi donon kaise TuuT ke milte hain tu hai kitnaa saada-dil aur ham kitne pechida hain sun jaanaan ham tark-e-taalluq aur kisi din kar leinge aaj tujhe bhi ujlat si hai ham bhi kuchh ranjida hain kaanon mein ik sargoshi hai be-maani si sargoshi aankhon mein kuchh khvaab saje hain khvaab bhi umr-rasida hain ghar ki vo makhdush imaarat gir ke phir taamir hui ab aangan mein peD hain jitne saare shaakh burida hain is basti mein ek saDak hai jis se ham ko nafrat hai us ke niche pagDanDi hai jis ke ham girvida hain"

"raftagaan ki sadaa nahin main huun ye tiraa vaahima nahin main huun tere maazi ke saath dafn kahin meraa ik vaaqi'a nahin main huun kyaa milaa intihaa-pasandi se kyaa main tere sivaa nahin main huun ek muddat mein jaa ke mujh pe khulaa chaand hasrat-zada nahin main huun us ne mujh ko muhaal jaan liyaa main ye kahtaa rahaa nahin main huun main hi 'ujlat mein aa gayaa thaa idhar ye zamaana nayaa nahin main huun meri vahshat se Dar gae shaayad yaar baad-e-fanaa nahin main huun main tire saath rah gayaa huun kahin vaqt Thahraa huaa nahin main huun gaahe gaahe sukhan zaruri hai saamne aaina nahin main huun sarsari kyuun guzartaa hai mujh se ye miraa maajraa nahin main huun us ne puchhaa kahaan gayaa vo shakhs kyaa bataataa ki thaa nahin main huun ye kise dekhtaa hai mujh se udhar tere aage khalaa nahin main huun"

"dast-kash hon na mai-e-gul ke khush-aashaam abhi ki labaalab hain mah-o-mehr ke do-jaam abhi zehn mein saaqi hai mai-khaana hai hai jaam abhi hosh kahtaa huun ise hosh kaa kyaa kaam abhi mujh ko darkaar na hai kufr na islaam abhi sidhe sidhe hi chale aate hain paighaam abhi tu bhi baaqi tiri rahmat bhi hai baaqi saaqi rahne de hai mai-e-isyaan se baDaa kaam abhi khaal-o-gesu se hai ye silsila-e-raaz-o-niyaaz daana sad-daana ho ye daam ho sad-daam abhi ziist ke khvaab ki taabir abhi baaqi hai ibtidaa dekh chuke hai magar anjaam abhi rah-rav-e-ishq abhi duur hai mearaaj-e-habib rashk-e-manzil na huaa raah mein har gaam abhi zarra-zarra hai ik aatish-kada-e-nur kalim dekh agar tu na ho aatish-zada-e-baam abhi imtiyaaz-e-man-o-tu raaz-e-khafi hai lekin khaasgaan ke liye kahtaa huun sar-e-aam abhi aks ko zo'm hai be-misli-e-rang-o-bu kaa turfa ye hai ki muqaabil hai vo gulfaam abhi raaz-goi tiri 'aiman' hai gunaah-e-akbar maang le afv ki us kaa hai karam aam abhi"

"baad-e-shimaal chalne lagi ang ang mein lipTaa hai kaun mujh se ye patjhaD ke rang mein khvaahish ke kaarobaar se bachnaa muhaal hai utregaa tu bhi saath mire is surang mein main aandhiyon mein haath bhi pakDun tiraa to kyaa ik shaakh-e-be-siper huun havaaon ki jang mein 'raanjhaa' main 'ahd-e-nau kaa qabilon mein baT gayaa to 'hir' ban ke pi na saki zahr jhang mein garmaa sakin na chaahatein teraa kaThor jism har ek jal ke bujh gai tasvir sang mein aage 'musavvir' aag 'aqab mein hai ye sadaa pichhe na muD ke dekhnaa is dasht-e-sang mein"

"tifli piiri o naujavaani hech tiin din ki hai zindagaani hech umr-e-do-roza par ghamanD itnaa munimon ki hai lan-taraani hech raat thoDi hai aao pyaar karein subh ko hogi ye kahaani hech chaar din ki bahaar hai saari ye takabbur hai yaar-e-jaani hech dil ke haathon 'haqir' jhagDon mein meri guzri sadaa javaani hech"