dam-ba-khud hai chaandni chup-chaap hain ashjaar bhi — Basheer Munzir

"ham bayaabaanon mein ghume shahr ki saDkon pe Tahle dil kisi surat to sanbhle dil kisi surat to bahle zindagi ke raaste mein do-ghaDi kaa saath hai ye apne man ki main bhi kah luun apne man ki tu bhi kah le goyaa zinda rahnaa bhi ik jurm tere shahr mein thaa ham har ik aahaT pe larze ham har ik dhaDkan pe dahle ab to taa-hadd-e-nazar viraaniyaan phaili hui hain ghar kaa ye be-dar kharaaba kitnaa thaa aabaad pahle vaqt aisaa aa gayaa hai khaamushi behtar hai 'munzir' baat jo kahtaa hai sun le choT jo lagti hai sah le"

"soe hue jazbon ko jagaa kar phir vo shaam na aai sang tire bas ik din aa kar phir vo shaam na aai teri baaton ki khushbu se mahki vaadi vaadi phulon ke ambaar lagaa kar phir vo shaam na aai nadi kinaare kaa vo manzar takne ko ji chaahe kunjon ki ik Daar uDaa kar phir vo shaam na aai baiThe baiThe jal uThti hain bhigi bhigi aankhein aab-e-ravaan mein aag lagaa kar phir vo shaam na aai roz hi suraj nikle 'manzar' roz hi suraj Duube main jis ki raah dekhun jaa kar phir vo shaam na aai"

"hairaan hai zamaane mein kise apnaa kahe dil chehre to hain gul-rang magar khoT bhare dil kis samt liye jaataa hai ye daur-e-taraqqi dhaaton ke hue jism to patthar ke bane dil ghuncha hai to chaTke vo sitaaraa hai to chamke betaab hai siine mein dhaDakne ke liye dil viraan-kada-e-dahr mein kyaa rakkhaa hai 'munzir' kuchh dard ke afsaane to kuchh TuuTe hue dil"

"sarmaaya-e-jaan hain shah-e-abraar ki baatein kis darja sukun deti hain sarkaar ki baatein karte hain karam sab pe ki aadat hai ye un ki sunte hain vafaadaar-o-khataa-kaar ki baatein haan kaise hain vo kucha-o-baazaar vo galiyaan kuchh aur karo shahr-e-pur-anvaar ki baatein haan kaise barastaa hai vahaan nuur kaa baadal kuchh aur karo gumbad-e-zau-baar ki baatein haan kaise ghubaar-e-dil-o-jaan dhultaa hai zaaer kuchh aur karo abr-e-guhar-baar ki baatein haan kaise vahaan chalti hain tham tham ke havaaein kuchh aur machalti hui mahkaar ki baatein ji chaahe ki har aan sunun zikr-e-payambar hoti rahein kaunain ke sardaar ki baatein"

"har roz hi din bhar ke jhamelon se nimaT ke ro lete hain ham raat ke aanchal se lipaT ke ham kaun hain kyuun baiThe hain yuun raahguzar par puchhaa na kisi ik bhi musaafir ne palaT ke kyaa kyaa the mire dil ke sahife mein mazaamin dekhe na kisi ne mire auraaq ulaT ke phirte rahe aavaara khayaalaat ki surat kyaa chiiz thi ham jis ke liye dahr mein bhaTke shab karvaTein lete to na guzre kabhi 'munzir' so jaao miyaan dard ki baahon mein simaT ke"

"sar pe ik saaebaan to rahne de jal gayaa ghar dhuaan to rahne de sochtaa huun ki main bhi zinda huun mujh ko itnaa gumaan to rahne de rukh havaa kaa badal hi jaaegaa baadbaan pur-fishaan to rahne de gard itni uDaa na raahon mein paanv ke kuchh nishaan to rahne de aankh se chhin gae sabhi manzar lab pe ik daastaan to rahne de manzilon kaa pataa mile na mile shaamil-e-kaarvaan to rahne de"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"