ek nae saanche mein Dhal jaataa huun main — Bharat Bhushan Pant

"kabhi sukun kabhi sabr-o-qaraar TuTegaa agar ye dil hai to phir baar baar TuTegaa vo apne zarf se baDh kar bharaa huaa baadal ye dekhnaa kahin be-ikhtiyaar TuTegaa vo ek pal bhi kisi roz aa hi jaaegaa ki jab ye zindagi par e'tibaar TuTegaa vagarna chaltaa rahegaa ye silsila yuun hi main TuuT jaaun tabhi intishaar TuTegaa phir ek baar ghalat niklaa ye qayaas miraa giraa chaTaan pe to aabshaar TuTegaa tire zavaal ki manzil abhi nahin aai nasha to TuuT chukaa ab khumaar TuTegaa isi khayaal se shaayad Daraa huaa hai saaz agar ye raag na TuuTaa to taar TuTegaa koi udaas saa naghma hi gungunaaein ham tabhi tilsim-e-shab-e-intizaar TuTegaa"

"mustaqil rone se dil ki be-kali baDh jaaegi baarishein hoti rahin to ye nadi baDh jaaegi ishq ki raahon mein haael ho rahi hai aagahi ab junun baDh jaaegaa divaangi baDh jaaegi har ghaDi teraa tasavvur har nafas teraa khayaal is tarah to aur bhi teri kami baDh jaaegi ho sake to is hisaar-e-zaat se baahar nikal habs mein rahne se vahshat aur bhi baDh jaaegi us ne suraj ke muqaabil rakh diye apne charaagh vo ye samjhaa is tarah kuchh raushni baDh jaaegi ishq ke tanhaa safar mein koi saaya DhunD le dhuup mein chaltaa rahaa to tishnagi baDh jaaegi tu hamesha maangtaa rahtaa hai kyuun gham se najaat gham nahin honge to kyaa teri khushi baDh jaaegi ho sake to ham pe zaahir kar de apne dil kaa haal sochte rahne se to sanjidgi baDh jaaegi apni tanhaai mein kis se guftugu kartaa hai tu in sadaaon se to shab ki khaamushi baDh jaaegi kyaa pata thaa raat bhar yuun jaagnaa paD jaaegaa ik diyaa bujhte hi itni tirgi baDh jaaegi"

"samundaron ko bhi dariyaa samajh rahe hain ham ye apne-aap ko ab kyaa samajh rahe hain ham hamaari raah mein haael jo ik andheraa hai use bhi apnaa hi saaya samajh rahe hain ham yahin talak hai rasaai hamaari aankhon ki ki khadd-o-khaal ko chehra samajh rahe hain ham hamaari baat kisi ki samajh mein kyuun aati khud apni baat ko kitnaa samajh rahe hain ham ab apne dard ko sahnaa bahut hi mushkil hai zaraa hai zakhm ko gahraa samajh rahe hain ham abhi fuzul hai manzil ki baat bhi karnaa abhi to logon se rastaa samajh rahe hain ham bas ek raat Thaharne kaa ye natija hai saraa-e-faani ko duniyaa samajh rahe hain ham"

"kab talak chalnaa hai yuun hi ham-safar se baat kar manzilein kab tak mileingi rahguzar se baat kar tujh ko mil jaaegaa tere sab savaalon kaa javaab kashtiyaan kyuun Duub jaati hain bhanvar se baat kar kab talak chhuptaa rahegaa yuun hi apne-aap se aaine ke ru-ba-ru aa apne Dar se baat kar baDh chuki hain ab tiri fikr-o-nazar ki vusatein jugnuon ko chhoD ab shams o qamar se baat kar is tarah to aur bhi teri ghuTan baDh jaaegi ham-navaa koi nahin to baam-o-dar se baat kar dard kyaa hai ye samajhnaa hai to apne dil se puchh aansuon ki baat hai to chashm-e-tar se baat kar har safar manzar se pas-e-manzar talak to kar liyaa dekhnaa kyaa chaahti hai ab nazar se baat kar dhuup kaise saae mein tabdil hoti hai yahaan is hunar ko sikhnaa hai to shajar se baat kar zakhm poshida rahaa to dard baDhtaa jaaegaa be-takalluf ho ke apne chaara-gar se baat kar"

"ishq kaa rog to virse mein milaa thaa mujh ko dil dhaDaktaa huaa siine mein milaa thaa mujh ko haan ye kaafir usi hujre mein milaa thaa mujh ko ek momin jahaan sajde mein milaa thaa mujh ko us ko bhi meri tarah apni vafaa par thaa yaqin vo bhi shaayad isi dhoke mein milaa thaa mujh ko us ne hi bazm ke aadaab sikhaae the mujhe vo jo ik shakhs akele mein milaa thaa mujh ko manzil-e-hosh pe ik main hi nahin thaa tanhaa yaan to har shakhs hi nashshe mein milaa thaa mujh ko ye bhi ik aib thaa meri hi nazar kaa shaayad roz kuchh farq saa chehre mein milaa thaa mujh ko aise haalaat mein kyaa us se gilaa kartaa main raat suraj bhi andhere mein milaa thaa mujh ko main agar Duub na jaataa to vahaan kyaa kartaa ik samundar thaa jo qatre mein milaa thaa mujh ko ruuh ki pyaas bujhaanaa koi aasaan na thaa saaf paani baDe gahre mein milaa thaa mujh ko sach to ye hai ki yahaan koi bhi manzil hi na thi vo bhi rasta thaa jo raste mein milaa thaa mujh ko"

"miri hi baat sunti hai mujhi se baat karti hai kahaan tanhaai ghar ki ab kisi se baat karti hai hamesha us ki baaton mein andheron kaa vahi ronaa ye shab jab bhi diye ki raushni se baat karti hai main jab maayus ho kar raaste mein baiTh jaataa huun to har manzil miri aavaargi se baat karti hai sukut-e-shab mein jab saare musaafir soe hote hain unhin lamhaat mein kashti nadi se baat karti hai kabhi chup chaap taariki ki chaadar oDh leti hai kabhi vo jhiil shab bhar chaandni se baat karti hai dayaar-e-zaat mein us vaqt jab main bhi nahin hotaa koi aavaaz meri khaamushi se baat karti hai hamesha us ke chehre par ajab saa khauf rahtaa hai kabhi jab maut meri zindagi se baat karti hai"

"muzhda ai zauq-e-asiri ki nazar aataa hai daam-e-khaali qafas-e-murgh-e-giraftaar ke paas jigar-e-tishna-e-aazaar tasalli na huaa ju-e-khun ham ne bahaai bun-e-har khaar ke paas mund gaiin kholte hi kholte aankhein hai hai khuub vaqt aae tum is 'aashiq-e-bimaar ke paas main bhi ruk ruk ke na martaa jo zabaan ke badle dashna ik tez saa hotaa mire gham-khvaar ke paas dahan-e-sher mein jaa baiThe lekin ai dil na khaDe ho jiye khubaan-e-dil-aazaar ke paas dekh kar tujh ko chaman bas-ki numu kartaa hai khud-ba-khud pahunche hai gul gosha-e-dastaar ke paas mar gayaa phoD ke sar 'ghaalib'-e-vahshi hai hai baiThnaa us kaa vo aa kar tiri divaar ke paas kab faqiron ko rasaai bu-e-mai-khvaar ke paas to bane bu dijiye maikhaane ki divaar ke paas"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"

"bistar-e-karb pe jab niind jalaai main ne tab kisi khvaab ki buniyaad uThaai main ne zakhm aise the ki har shakhs ke aage rakkhe baat aisi thi ki khud se bhi chhupaai main ne hurmat-e-gham ke liye khud ko aziyyat bakhshi phir usi dard se taskin bhi paai main ne main ne zakhmon ko kuredaa unhein taaza rakkhaa tab kahin dasht mein ki naghma-saraai main ne apni khiDki se yunhi khud ko pukaaraa kal shab aur phir khud ko vo aavaaz sunaai main ne jaane vaale se rag-e-jaan kaa bhi rishta thaa 'samir' ye samajhne mein bahut der lagaai main ne"

"aakhiri hal thaa yahi pesh-e-nazar jaane diyaa ek gahri saans li phir khvaab mar jaane diyaa saarbaanaa de gavaahi mujh ko pyaari thi anaa rakh liyaa zaad-e-safar aur ham-safar jaane diyaa hazrat-e-naaseh ki khush-uftaadgi pe daad hai khud jidhar se aae the sab ko udhar jaane diyaa is harim-e-naaz mein yuun be-mahaabaa guftugu kuchh bharam rakkhaa to hotaa tum ko gar jaane diyaa tujh ko rokaa jaa rahaa thaa raushni thi jab talak shaam ke Dhalte samay suraj ko ghar jaane diyaa aankh sapne dekhti thi aansuon se kyon bhari chaahti to puchh leti main magar jaane diyaa dostaa qismat na ho to koshishein bekaar hain sabr kaa paimaana ham ne khud hi bhar jaane diyaa dil musir thaa baarhaa kuchh jaanchne ko ruk gae aakhirash us ne hamein baar-e-digar jaane diyaa"

"tire jamaal se ham runumaa nahin hue hain chamak rahe hain magar aaina nahin hue hain dhaDak rahaa hai tu ik ism ki hai ye barakat vagarna vaaqiye is dil mein kyaa nahin hue hain bataa na paaein to khud tum samajh hi jaao ki ham bilaa javaaz to be-maajraa nahin hue hain tiraa kamaal ki aankhon mein kuchh zabaan pe kuchh hamein to moajize aise ataa nahin hue hain ye mat samajh ki koi tujh se munharif hi nahin abhi ham ahl-e-junun lab-kushaa nahin hue hain ba-naam-e-zauq-e-sukhan khud-numaai aap karein ham is maraz mein abhi mubtalaa nahin hue hain hami vo jin kaa safar maavaraa-e-vaqt-o-vajud hami vo khud se kabhi jo rihaa nahin hue hain khud-aagahi bhi khaDi maangti hai apnaa hisaab junun ke qarz bhi ab tak adaa nahin hue hain kisi ne dil jo dukhaayaa kabhi to ham 'irfaan' udaas ho gae lekin khafaa nahin hue hain"