gham gardish-e-dauraan ke bhulaae nahin jaate — Gulnar Aafreen

"shajar-e-umid bhi jal gayaa vo vafaa ki shaakh bhi jal gai mire dil kaa naqsha badal gayaa miri subh raat mein Dhal gai vahi zindagi jo bahar-nafas jo bahar-qadam mire saath thi kabhi meraa saath bhi chhoD kar miri manzilein bhi badal gai na vo aarzu hai na justuju na koi tasavvur-e-rang-o-bu liye dil mein daagh-e-gham-e-khizaan main chaman se duur nikal gai tiri chaal puuri na ho saki tiraa vaar khaali chalaa gayaa zaraa dekh gardish-e-aasmaan ki main girte girte sanbhal gai tiri chaahaton se sanvar gae ye mire jamaal ke aaine main gulaab ban ke mahak uThi main shafaq ke rang mein Dhal gai ye tilism-e-mausam-e-gul nahin ki ye mo'jiza hai bahaar kaa vo kali jo shaakh se gir gai vo sabaa ki god mein pal gai vahi saaat-e-gham-e-aarzu jo hamesha dil mein basi rahi hai khudaa kaa shukr ki 'aafrin' vo hamaare sar se to Tal gai"

"na saath degaa koi raah aashnaa meraa judaa hai saare zamaane se raasta meraa guzar ke aai huun main gham ke regzaaron se nazar udaas hai dil hai dukhaa huaa meraa na jaane kis liye qaatil ke ashk bhar aae faraaz-e-daar pe jab saamnaa huaa meraa dayaar-e-jaan mein farozaan rahegi sham-e-hayaat samajh liyaa tiri aankhon ne muddaaa meraa kiyaa hai pesh tujhe aansuon kaa nazraana hujum-e-shaam-e-alam aur dil jalaa meraa vo saaneha mire dil par guzar gayaa 'gulnaar' har ek harf-e-duaa be-sadaa huaa meraa"

"aansu bhi vahi karb ke saae bhi vahi hain ham gardish-e-dauraan ke sataae bhi vahi hain kyaa baat hai kyuun shahr mein ab ji nahin lagtaa haalaanki yahaan apne paraae bhi vahi hain auraaq-e-dil-o-jaan pe jinhein tum ne likhaa hai naghmaat-e-alam ham ne sunaae bhi vahi hain ai josh-e-junun dard kaa aalam bhi vahi hai ai vahshat-e-jaan dard ke saae bhi vahi hain dekhaa hai jinhein aah-ba-lab chaak-garebaan har daagh-e-alam dil mein chhupaae bhi vahi hain sau rang bikhereinge mohabbat ke shagufe 'gulnaar' chaman mein hamein laae bhi vahi hain"

"ai shahr-e-sitam-pesha bataa kis ko sadaa duun ab kaun rahaa hai jise paighaam-e-vafaa duun shaamil miri saanson mein hai sadiyon ki aziyyat aa gardish-e-dauraan main tujhe bhi to duaa duun ashkon ke guhar bhi to nahin paas mire ab main soch rahi huun gham-e-dauraan tujhe kyaa duun Darti huun bikhar jaaegi khaakistar-e-jaan bhi bujhte hue shoalon main tumhein kaise havaa duun vo log jo sargarm-e-takallum hain sar-e-bazm kaise unhein aadaab takallum ke sikhaa duun ai raat saraabon ke sivaa kuchh na milegaa main din ke ujaale mein agar shama jalaa duun 'gulnaar' sar-e-shaakh-e-chaman laala-o-gul ko de de vo ijaazat to mahakne ki adaa duun"

"aankh mein ashk liye khaak liye daaman mein ek divaana nazar aataa hai kab se ban mein mere ghar ke bhi dar-o-baam kabhi jaageinge dhuup niklegi kabhi to mire bhi aangan mein kahiye aaina-e-sad-fasl-e-bahaaraan tujh ko kitne phulon ki mahak hai tire pairaahan mein shab-e-taarik miraa raasta kyaa rokegi mire aanchal mein sitaare hain sahar daaman mein kin shahidon ke lahu ke ye farozaan hain charaagh raushni si jo hai zindaan ke har ik rauzan mein ahd-e-rafta ki tamannaa kaa fusun zinda hai dil-e-naakaam abhi tak tiri har dhaDkan mein hamein manzur nahin agli ravaayaat-e-junun baa-khirad ho gai 'gulnaar' divaana-pan mein"

"vo charaagh-e-zist ban kar raah mein jaltaa rahaa haath mein vo haath le kar umr bhar chaltaa rahaa ek aansu yaad kaa Tapkaa to dariyaa ban gayaa zindagi bhar mujh mein ek tufaan saa paltaa rahaa jaanti huun ab use main paa nahin sakti magar har jagah saae ki surat saath kyuun chaltaa rahaa jo meri nazron se ojhal ho chukaa muddat hui vo khayaalon mein basaa aur sher mein Dhaltaa rahaa ranj thaa 'gulnaar' mujh ko us ko bhi afsos thaa der tak rotaa rahaa aur haath bhi maltaa rahaa"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"