ghar darvaaze se duuri par saat samundar biich — Ayub Khawar

"aaina toD de rihaa kar de bevafaa ik yahi vafaa kar de rishta-e-dard toD de dil se rang ko phuul se judaa kar de zindagi-bhar tujhi ko chaahaa hai qarz kuchh to miraa adaa kar de de rahaa hai zakaat-e-husn agar mire haq se zaraa baDhaa kar de muddatein ho gaiin tujhe dekhe ab to milne kaa silsila kar de phir koi gul khile sar-e-mizhgaan phir dar-e-khvaab koi vaa kar de ik sitaare ko bakhsh kar mire khvaab phir use meraa aaina kar de baiThtaa jaa rahaa hai jaan kaa ghubaar ab use mujh se maavaraa kar de ai faqir-e-dayaar-e-laili-jaan mire haq mein bhi kuchh duaa kar de"

"havaa ke rukh pe rah-e-e'tibaar mein rakkhaa bas ik charaagh ku-e-intizaar mein rakkhaa ajab tilism-e-taghaaful thaa jis ne der talak miri anaa ko bhi kunj-e-khumaar mein rakkhaa uDaa diye khas-o-khaashaak-e-aarzu sar-e-raah bas ek dil ko tire ikhtiyaar mein rakkhaa na jaane kaun ghaDi thi ki apne haathon se uThaa ke shisha-e-jaan is ghubaar mein rakkhaa ye kis ne misl-e-mah-o-mahr apni apni jagah visaal o hijr ko un ke madaar mein rakkhaa lahu mein Dolti tanhaai ki tarah 'khaavar' tiraa khayaal dil-e-be-qaraar mein rakkhaa"

"kin aavaazon kaa sannaaTaa mujh mein hai jo kuchh bhi tujh mein hai yaa mujh mein hai teri aankhein meri aankhein lagti hain soch rahaa huun kaun ye tujh saa mujh mein hai har mausam ne tere dar par dastak di aakhiri dastak dene vaalaa mujh mein hai dil ki miTTi lahu banaa kar chhoDegaa ye jo kaanch kaa chaltaa TukDaa mujh mein hai jis dariyaa kaa ek kinaaraa vo aankhein us dariyaa kaa ek kinaaraa mujh mein hai khiltaa hai vo phuul abhi ik khiDki mein jis ko aakhir-kaar mahaknaa mujh mein hai jin aankhon ki jhilein kanval khilaati hain rang sunahraa un jhilon kaa mujh mein hai"

"safar mein faaslon ke saath baadbaan kho diyaa utar ke paaniyon mein ham ne aasamaan kho diyaa yahi ki in nafas-ghubaar saaaton ke darmiyaan havaa ne giit rah-guzar ne saarbaan kho diyaa ye kaun saavanon mein khvaab dekhtaa hai dhuup ke ye kis ne e'tibaar-e-gham pas-e-gumaan kho diyaa bas ek harf kaa gudaaz us pe qarz thaa so vo bichhaDte vaqt khaamushi ke darmiyaan kho diyaa firaaq manzilon kaa ik ghubaar thaa ki jis ghaDi charaagh-e-shab ne aur dil ne mehmaan kho diyaa ruton mein ek rut yahaan shajar bhi kaaTne ki thi pata chalaa jab apne ghar kaa paasbaan kho diyaa bachaa liyaa thaa khvaab jo masaafaton ki dhuup se vo abr-o-baad manzaron ke darmiyaan kho diyaa vo niind apne bachpane ki raah mein ujaD gai us aankh ne bhi mojazon kaa ik jahaan kho diyaa"

"aankh ki dahliz se utraa to sahraa ho gayaa qatra-e-khun paaniyon ke saath rusvaa ho gayaa khaak ki chaadar mein jism o jaan simaTte hi nahin aur zamin kaa rang bhi ab dhuup jaisaa ho gayaa ek ik kar ke mire sab lafz miTTi ho gae aur is miTTi mein dhans kar main zamin kaa ho gayaa tujh se kyaa bichhDe ki aankhein reza reza ho gaiin aaina TuuTaa to ik aaina-khaana ho gayaa ai havaa-e-vasl chal phir se gul-e-hijraan khilaa sar uThaa phir ai nihaal-e-gham saveraa ho gayaa ai jamaal-e-fan use mat ro ki tan-aasaan thaa teri duniyaaon kaa 'khaavar' sarf-e-duniyaa ho gayaa"

"bujhne lage nazar to phir us paar dekhnaa dariyaa chaDhe to naav ki raftaar dekhnaa is aagahi ke aaina-e-khud-misaal mein khud apni zaat ko sar-e-paikaar dekhnaa aankhon se rat-jagon ki haraarat nahin gai ai yaad-e-yaar tishna-e-aazaar dekhnaa honTon pe aa ke jam si gai khvaahish-e-visaal is an-kahi pe lazzat-e-inkaar dekhnaa ham vo vafaa-parast tujhe dekhne ke baa'd apni taraf bhi surat-e-divaar dekhnaa shaakh o samar to munsif o qaatil ke ho gae ab kis ke sar pe girti hai talvaar dekhnaa yuun hai ki jab bichhaDne lagein dil se dhaDkanein tab us gali mein subh ke aasaar dekhnaa ab ye dil o nigaah ke bas mein nahin rahaa har aaine mein aks-e-rukh-e-yaar dekhnaa saahil ko mauj le gai aur us ko baadbaan khaavar ab is ke baa'd na us paar dekhnaa"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"