ham kisi baat par nahin rote — Faizul Amin Faiz

"kaDi thi dhuup sar chakraa rahaa thaa main bhukaa thaa bahut ghabraa rahaa thaa tumhaaraa shahr kyaa thaa kyaa bataaun tamaasha har koi dikhlaa rahaa thaa the us ke haath mein kashkol lekin vo mehr-o-maah ko sharmaa rahaa thaa anaa kaa saanp main ne maar Daalaa bahut nuqsaan ye pahunchaa rahaa thaa amir-e-shahr se ye kaun puchhe sitam kyon muflison par Dhaa rahaa thaa lage Thokar to khud hi tum sambhal jaao safar kaa tajraba batlaa rahaa thaa akeli thi koi laDki saDak par badan jis kaa mujhe lalchaa rahaa thaa ye kaisaa khvaab main ne 'faiz' dekhaa samundar meri jaanib aa rahaa thaa"

"kisi se bhi nahin ham sabr ki talqin lete hain hamein milti nahin jo chiiz us ko chhin lete hain buDhaapaa aa gayaa lekin nahin badlaa mizaaj un kaa abhi tak kapDe vo apne liye rangin lete hain faqiron ko kabhi dar se na khaali lauTne denaa duaaein dete hain khairaat jab miskin lete hain vo saare log ranj-o-gham se paa jaate hain aazaadi jo subh-o-shaam vird-e-sura-e-yaasin lete hain tumhein hairat hai kyon ahal-e-filistin ki shujaaat par yazidon se sadaa lohaa to ahl-e-din lete hain"

"shaam-o-sahar yuun chupke chupke ronaa kyaa kisi ki khaatir itnaa paagal honaa kyaa hosh ganvaa dete hain tum se mil kar log kar dete ho tum bhi jaadu-Tonaa kyaa pyaar vo shai hai jis kaa koi mol nahin us ke aage chaandi kyaa hai sonaa kyaa jab ji chaahaa tum ne us ko toD diyaa jab hi bolo dil thaa meraa khilaunaa kyaa 'faiz' yatim-o-bekas se ye puchhoge maan ke aanchal kaa hotaa hai konaa kyaa"

"toltaa kyaa mujh ko koi jauhari mizaan mein main thaa meraa aur paDaa thaa koele ki kaan mein tum se to hotaa nahin hai e'tiraaf-e-fan miraa chand jumle main hi kahtaa huun tumhaari shaan main barsar-e-paikaar us ko dekh kar sab shaad the jaa lagaa saahil se vo tinkaa magar tufaan mein saj rahi hain phir siyaasi manDiyaan chaaron taraf dekhnaa tabdil hogaa shahr qabristaan mein ishq mein sahraa-navardi raas kyaa aati mujhe vo thaa koi aur jo phirtaa thaa registaan mein 'faiz' ye mujh ko yaqin hai saazishon ke baavajud phulti phalti rahegi urdu hindostaan mein"

"badal rahaa hai zamaana to mere Theinge se hai meraa taur puraanaa to mere Theinge se jo chaar paise hain muTThi mein bas vo mere hain hai tere paas khazaana to mere Theinge se kabhi lakir kaa bantaa nahin faqir vo shakhs use na maano siyaanaa to mere Theinge se miri kahaani haqiqat pe munhasir hai magar tujhe lage hai fasaana to mere Theinge se tiri pasand se milti nahin pasand miri yahi hai ek bahaana to mere Theinge se adu se karnaa hai saaraa hisaab chuktaa 'faiz' agar vo jaaegaa thaana to mere Theinge se"

"kisi aaseb kaa saaya hai is par log kahte hain paDaa rahtaa hai vo hujre ke andar log kahte hain miri basti mein ik buDhiyaa hai jo sach-much ki Daain hai vo khaa jaati hai bachchon ko pakaD kar log kahte hain har ik rishta yahaan qaaem hai bas matlab parasti par zamaane mein yahi raaij hai culture log kahte hain muazziz shakhsiyat hai shahr kaa ab naamvar ghunda ki ban baiThaa hai vo paarTi kaa leader log kahte hain sabaq letaa hai jo bhi khaamiyon se apne maazi ki vahi jaataa hai mustaqbil mein uupar log kahte hain taalluq hai miraa bas dosti ki had talak us se ghalat baatein hi lekin kyon baraabar log kahte hain shikasta naav le kar 'faiz' nikle ho samundar mein tumhaaraa Duub jaanaa hai muqaddar log kahte hain"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"jis din se meraa khvaab suhaanaa badal gayaa us din se zindagi kaa fasaana badal gayaa sunne lagaa huun jab se nasihat baDon ki main jaari thaa jo labon pe taraana badal gayaa pahchaan kaa havaala bhi baaqi nahin rahaa chehre ke saath aaina-khaana badal gayaa uThti nahin hai aankh bhi ab aasmaan ki samt jab se gali kaa chaand puraanaa badal gayaa tahzib jin ke ghar ki 'alaamat thi kal talak afsos aaj un kaa gharaanaa badal gayaa 'azmat kaa taaj sar pe hai 'akhilesh' ke sajaa aisi havaa chali ki zamaana badal gayaa itni sharaafaton mein kami aa gai hai aaj pahle thaa jo libaas puraanaa badal gayaa ahl-e-vafaa ne jis ki thi taarikh ki raqam 'faaruq' 'ishq kaa vo fasaana badal gayaa"

"tirgi shama bani raahguzar mein aai saaat ik aisi bhi kal apne safar mein aai jis jagah chehra hi meyaar-e-vafaa Thahraa hai khaak hi khaak vahaan dast-e-hunar mein aai teri nazron mein thi duniyaa to yahi kyaa kam thaa hashr ye hai ki tu duniyaa ki nazar mein aai baar-haa yaaron ne saahil se kahaa thaa ham hain baar-haa naav magar apni bhanvar mein aai zindagi samjhun ise yaa ki ise maut kahun vo jo mehmaan ki surat mire ghar mein aai yuun bhi taarikh ki taarikh raqam hoti hai nikli taarikh mahal se to khanDar mein aai khvaab hi khvaab ki taabir huaa to jaanaa zindagi kyuun kisi aankhon ke asar mein aai shama jalte hi bujhi aur dhuaan aisaa uThaa lazzat-e-shaam yahaan khvaab-e-sahar mein aai zindagi kuchh hai 'ataa' sher-o-adab hai kuchh aur ye do-rangi ki vabaa kaisi hunar mein aai"

"zindagi bojhal hui aazaar se jism jhuktaa jaa rahaa hai baar se doston ne is qadar dhoke diye aur raghbat baDh gai aghyaar se zindagi kaa ik nayaa imkaan huaa ik daricha khul gayaa divaar se ab bayaan kaise karun rudaad-e-gham kaam mushkil hai dil-e-naa-chaar se hijr ki raaton mein bahtaa hi rahaa ek naala chashm-e-dariyaa-baar se misl-e-majnun regzaaron mein rahe sar paTakte ret ki divaar se ham asiraan-e-mohabbat hain yahaan uljhe hain ab gesu-e-khamdaar se 'qalb' teri ghazlein yuun shaadaan karein dard nikle hai tire ashaar se"

"zindagi dushvaar hogi ye kabhi sochaa na thaa vo bagule gham ke uTThe jin kaa andesha na thaa saamne tum aa gae ho to bataa duun jaan-e-jaan jaise dil dhaDkaa thaa ab ki vaise dil dhaDkaa na thaa ye iraada kar liyaa thaa ham na bichhDeinge kabhi TuTeinge ik pal mein rishte ye kabhi sochaa na thaa yaad-e-maazi miT rahi hai vaqt ki raftaar se ab tasavvur mein hamaare koi bhi chehra na thaa sakht hairat ho rahi hai dekh kar apnaa vajud dhuup mein the sab ke saaye par miraa saayaa na thaa shauq-e-manzil dekh meri dekh meraa hausla shahr-e-dil ke raaston mein main kabhi Thahraa na thaa 'qalb' ko sahraa-navardi raas kyaa aati bhalaa vo kabhi aavaargi mein dar-ba-dar bhaTkaa na thaa"

"jaagte hi nazar akhbaar mein kho jaati hai zindagi dard ke ambaar mein kho jaati hai naa-khudaa aql ke patvaar uThaataa hai ki jab kashti-e-dil miri manjdhaar mein kho jaati hai be-sabab sochne vaale kabhi sochaa tu ne aagahi kasrat-e-afkaar mein kho jaati hai uDte rahte hain khayaalaat ke jugnu phir bhi baat kyuun parda-e-izhaar mein kho jaati hai us ke kaamon kaa hai rangin khushaamad pe madaar aur mehnat miri isaar mein kho jaati hai hurmat-e-parda zaruri hai 'ataa-ji' varna chiiz jaisi bhi ho baazaar mein kho jaati hai"