ham raazdaar-e-markaz-e-parkaar-e-'ishq hain — Meesam Naqvi

"suraj ki tamaazat se hai zebaaish-e-sahraa aur ret ke Tilon se hai aaraaish-e-sahraa ye aabla-paai ho yaa phir tishna-labi ho hoti hai inhi se hi to aasaaish-e-sahraa kamyaab yaa naayaab to hone nahin dungaa kartaa huun junun-saazi se afzaaish-e-sahraa kab dard-o-alam kaa yahaan paimaana banaa hai kab kaun bhalaa kartaa hai paimaaish-e-sahraa mantiq nahin chalti kabhi sahraa-e-junun mein yaa'ni ki khirad-mandi hai aalaaish-e-sahraa kyon dard uThaa phir se mire qalb-e-hazin mein kyon karne lagaa phir se ye farmaaish-e-sahraa is shahr mein ab dasht-navardon kaa hai Deraa banti hai yahaan par abhi gunjaaish-e-sahraa"

"be-misl khad-o-khaal na rukhsaar na lab se bhaae hain hamein aap kisi aur sabab se tu tifl-e-jahaan-shaad hai main qalb-e-hazin huun phir kaise bahal jaaun tiri bazm-e-tarab se sad-shukr mayassar dil-e-muztar ko sukun hai ik bazm-e-'azaa-daari o ik girya-e-shab se taskin-e-dil-o-jaan hain tire nuskhe tabiba bimaar shifaa paate hain yuun tere matab se kirdaar zaruri hai ta'aaruf ke liye bhi pahchaan kahaan hoti hai ab naam-o-nasab se ab log tire takht ko taaraaj kareinge ab log nahin Darte tire ghaiz-o-ghazab se shaayad tiri duniyaa se chalaa jaaun achaanak aate hain mujhe khvaab pur-asraar o 'ajab se"

"duniyaa ke saare kaam qazaa kar rahaa huun main bas vaajibaat-e-'ishq adaa kar rahaa huun main ik aur aadmi se ta'alluq banaa liyaa ik aur zindagi mein khataa kar rahaa huun main ai taaer-e-khayaal-e-khad-o-khaal-e-be-rukhaan khush ho ki ab tujhe bhi rihaa kar rahaa huun main sab rang tere dil ke varaq par utaar kar khushbu tiri sipurd-e-havaa kar rahaa huun main jaltaa huaa diyaa hai to kuchh der gul karo tajdid-e-'ahd-e-mehr-o-vafaa kar rahaa huun main"

"bas ek kahaani huun fasaana huun fusun main kyaa aur bhalaa apne ta'aaruf mein kahun main ik lazzat-e-naayaab rahe mujh ko mayassar ye vasl ke lamhaat agar rok sakun main ye dasht-navardi bhi tire hukm ki taa'mil tu izn-e-safar de to kahin aur chalun main aabaa se mili hai mujhe haq-goi ki miraas ab jhuuT ke lashkar se bhalaa kaise Darun main darpesh mohabbat mujhe rahti hai hama-vaqt is kaam se fursat ho to kuchh aur karun main sahraa saa huaa jaataa hai dil meraa tire baa'd dariyaa ko magar zabt se aankhon mein rakhun main ai zulm ke paikar main tire takht ke darpe aur teri ye khvaahish ki tire paanv paDun main"

"ye 'aish-o-'ishrat-o-masti nasib-e-shaah mein hai gharib-e-shahr bhalaa kab jalaal-o-jaah mein hai hai aasmaan se pare kaa miraa safar shaayad jo maavaraa-e-falak ab miri nigaah mein hai kabhi Thahar jaa mire paas bhi mire hamdam gharib-khaana miraa bhi to teri raah mein hai salib-o-nok-e-sinaan aur kisi ko rusvaai junun azal se mulavvis isi gunaah mein hai jo ek shakhs miraa jaan-nisaar thaa 'misam' vo ek shakhs bhi ab us taraf sipaah mein hai"

"kaise qirtaas pe laaun main jamaal-e-khush-ru chaand taare na koi phuul misaal-e-khush-ru ab to ahbaab mire dil ki 'ajab haalat hai koi khvaahish hai na ummid-e-visaal-e-khush-ru dhire dhire se rah-e-'ishq mein raftaar baDhaa raakib-e-baad-e-khayaal-e-khad-o-khaal-e-khush-ru main to ab sakhti-e-haalaat se ghabraataa nahin meraa tiryaaq-e-gham-e-dahr khayaal-e-khush-ru main ne bas mashq-e-sukhan ke liye likkhaa 'misam' aur ghazal ho gai mansub-e-ghazaal-e-khush-ru"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"