hamdamo lutf-e-shabaana ho chukaa — Khushi Mohammad Naazir

"yahi gar husn kaa aalam rahegaa to zakhm-e-ishq be-marham rahegaa na de ai naaseh-e-mushfiq tasalli ki jab tak ham raheinge gham rahegaa hai jis ke dam se ye hangaama-e-ishq vahi har dam rahaa har dam rahegaa bashar yaan sej par phulon ki kab tak misaal-e-qatra-e-shabnam rahegaa gham-e-dil dene vaale sach bataanaa tujhe bhi kuchh hamaaraa gham rahegaa nihaal-e-ishq ko shaadaab kar luun phir in aankhon mein kab tak nam rahegaa tumhaari yaad har dam taaza hogi hamaare dam mein jab tak dam rahegaa dayaar-e-yaar kaa milnaa hai mushkil jo ye raahon kaa pech-o-kham rahegaa nishaan baaqi na hogaa bazm-e-jam kaa magar gardish mein jaam-e-jam rahegaa yahi parvaaz hai us ki to kab tak bani-aadam bani-aadam rahegaa ye hindi se farangi kah rahaa thaa ki jab tak tum rahoge ham rahegaa dam-e-rukhsat vo kahte the ki 'naazir' tire jaane kaa ham ko gham rahegaa"

"nae nairang dikhlaataa hai ye charkh-e-kuhan kyaa kyaa jahaan mein gul khilaaegi abhi khaak-e-chaman kyaa kyaa jahaan ki sar-bulandi kaa maaal-e-kaar pasti hai nashaat-o-aish-e-munim par hai muflis khanda-zan kyaa kyaa usi husn-e-azal ki lauh-e-aalam par hain tahrirein vahi ik ishq kaa mazmun hai andaaz-e-sukhan kyaa kyaa abhi se rah-navard-e-ishq himmat haar baiThe hain guzarni hain abhi to ghaaTiyaan un ko kaThan kyaa kyaa"

"mast-o-be-khud tere mai-khaane kaa baam-o-dar bane saaqiyaa gar teri chashm-e-mast kaa saaghar bane hirs ke sahraa mein jo jhonkaa chale sar sar bane ishq ke dariyaa mein jo qatra gire gauhar bane but bane kaaba banaa masjid bani mandar bane ishq ki duniyaa mein kyaa kyaa dilrubaa manzar bane dars-e-ibrat daur-e-dauraan mein hai bazm-e-mai-kada mai-kashon ki khaak se kyaa kyaa khum-o-saaghar bane kyaa ajab is khaak-daan ke hon kabhi chashm-o-charaag jaa ke auj-e-aasmaan par jo mah-o-akhtar bane be-e-gudaaz-e-ishq rang-e-husn bhi khultaa nahin ishq ke saanche mein Dhal kar nuur kaa paikar bane dil ke viraane mein kyaa kyaa hasratein aabaad hain raah mein sail-e-fanaa ki kaise kaise ghar bane ai shah-e-kaunain dar par ghair ke jhuktaa nahin tere sang-e-aastaan ke vaaste jo sar bane phir bahaar aai chaman mein phir uThaa josh-e-junun phir sar-e-shorida ki khaatir nae patthar bane fasl-e-gul hai baaghbaan ab rukhsat-e-parvaaz hai ab to tinke aashiyaan ke mere baal-o-par bane banda-e-'naazir' bhi haazir tere mai-khvaaron mein ho ai shah-e-laulaak jab tu saaqi-e-kausar bane"

"koi shama aur koi parvaana hogaa jahaan mein ishq kaa afsaana hogaa junun-e-ishq se hai lutf-e-hasti vo divaana hai jo faraazaanaa hogaa tire maston kaa ai kausar ke saaqi vahi paimaan vahi paimaana hogaa kharaabaat-e-jahaan vaqf-e-fanaa hai magar baaqi tiraa mai-khaana hogaa ravaan hain kaarvaan jis ki taraf sab yahi vo kucha-e-jaanaana hogaa vo dil hi kyaa ki raqs-e-mauj jis kaa harif-e-jumbish-e-dariyaa na hogaa vabaal-e-dosh hai vo sar ki jis mein kisi ke ishq kaa saudaa na hogaa jise shahd-o-shakar ki aarzu hai lab-e-noshin kaa vo rasiyaa na hogaa mohabbat ke hain rangaa-rang nairang kahin afsun kahin afsaana hogaa parastaari hai tinat mein bashar ki jahaan kaaba nahin but-khaana hogaa payaami se kisi ne kah diyaa hai ki 'naazir' se koi parvaana hogaa"

"jo nish-e-gham se be-parvaa na hogaa tumhaaraa chaahne vaalaa na hogaa jo teri yaad mein aansu bahegaa vo jaanaan gauhar-e-yak-daana hogaa hasin-o-mah-jabin honge jahaan mein magar kaafir adaa tujh saa na hogaa hai tu parde mein aur shor ik jahaan mein ye parda jab uThaa phir kyaa na hogaa taDap jis dil mein yazdaan ki na hogi to ahriman kaa vo kaashaana hogaa gulistaan aaj sarmast-e-navaa hai chaman mein jalva-e-jaanaana hogaa na ho shaa'ir jo sham-e-bazm-e-hasti jahaan mein ishq kaa jalvaa na hogaa na honge ham navaasanj-e-bahaaraan to gulzaar-e-jahaan viraana hogaa na chheDein ham agar taar-e-rag-e-jaan navaa-e-zindagi paidaa na hogaa rukh-e-zebaa ki tasvir-e-khyaali tire 'naazir' kaa ye nazraana hogaa"

"bujhaaein pyaas kahaan jaa ke tere mastaane jo saaqiyaa dar-e-mai-khaana tu na baaz kare nahin vo lazzat-e-aazaar-e-ishq se aagaah sitam mein aur karam mein jo imtiyaaz kare unhin ke husn se hai garm ishq kaa baazaar duaa khudaa se hai umr-e-butaan daraaz kare khudaa kaa naam bhi lo baazuon se kaam bhi lo tu fikr-e-kaar-e-khudaavand-e-kaar-saaz kare havaa-o-hirs se 'naazir' rahe jo paak nazar to ham-sari na haqiqat ki kyuun majaaz kare"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"jis din se meraa khvaab suhaanaa badal gayaa us din se zindagi kaa fasaana badal gayaa sunne lagaa huun jab se nasihat baDon ki main jaari thaa jo labon pe taraana badal gayaa pahchaan kaa havaala bhi baaqi nahin rahaa chehre ke saath aaina-khaana badal gayaa uThti nahin hai aankh bhi ab aasmaan ki samt jab se gali kaa chaand puraanaa badal gayaa tahzib jin ke ghar ki 'alaamat thi kal talak afsos aaj un kaa gharaanaa badal gayaa 'azmat kaa taaj sar pe hai 'akhilesh' ke sajaa aisi havaa chali ki zamaana badal gayaa itni sharaafaton mein kami aa gai hai aaj pahle thaa jo libaas puraanaa badal gayaa ahl-e-vafaa ne jis ki thi taarikh ki raqam 'faaruq' 'ishq kaa vo fasaana badal gayaa"

"tirgi shama bani raahguzar mein aai saaat ik aisi bhi kal apne safar mein aai jis jagah chehra hi meyaar-e-vafaa Thahraa hai khaak hi khaak vahaan dast-e-hunar mein aai teri nazron mein thi duniyaa to yahi kyaa kam thaa hashr ye hai ki tu duniyaa ki nazar mein aai baar-haa yaaron ne saahil se kahaa thaa ham hain baar-haa naav magar apni bhanvar mein aai zindagi samjhun ise yaa ki ise maut kahun vo jo mehmaan ki surat mire ghar mein aai yuun bhi taarikh ki taarikh raqam hoti hai nikli taarikh mahal se to khanDar mein aai khvaab hi khvaab ki taabir huaa to jaanaa zindagi kyuun kisi aankhon ke asar mein aai shama jalte hi bujhi aur dhuaan aisaa uThaa lazzat-e-shaam yahaan khvaab-e-sahar mein aai zindagi kuchh hai 'ataa' sher-o-adab hai kuchh aur ye do-rangi ki vabaa kaisi hunar mein aai"

"khaamushi ke batn se ye guftani paidaa hui main ba-zaahir chup huaa aur shaaeri paidaa hui is tarah saabit huaa gham aur khushi kaa imtizaaj hanste hanste us ki aankhon mein nami paidaa hui jurm ki paadaash mein ham khaak par pheinke gae so yahaan par intiqaaman zindagi paidaa hui khauf ne hi maslahat ki raah bhi ijaad ki main andheron se Daraa aur raushni paidaa hui dil mein kab utri kisi ke be-maaani guftugu baat karne se to bas aavaaz hi paidaa hui"

"zindagi bojhal hui aazaar se jism jhuktaa jaa rahaa hai baar se doston ne is qadar dhoke diye aur raghbat baDh gai aghyaar se zindagi kaa ik nayaa imkaan huaa ik daricha khul gayaa divaar se ab bayaan kaise karun rudaad-e-gham kaam mushkil hai dil-e-naa-chaar se hijr ki raaton mein bahtaa hi rahaa ek naala chashm-e-dariyaa-baar se misl-e-majnun regzaaron mein rahe sar paTakte ret ki divaar se ham asiraan-e-mohabbat hain yahaan uljhe hain ab gesu-e-khamdaar se 'qalb' teri ghazlein yuun shaadaan karein dard nikle hai tire ashaar se"

"zindagi dushvaar hogi ye kabhi sochaa na thaa vo bagule gham ke uTThe jin kaa andesha na thaa saamne tum aa gae ho to bataa duun jaan-e-jaan jaise dil dhaDkaa thaa ab ki vaise dil dhaDkaa na thaa ye iraada kar liyaa thaa ham na bichhDeinge kabhi TuTeinge ik pal mein rishte ye kabhi sochaa na thaa yaad-e-maazi miT rahi hai vaqt ki raftaar se ab tasavvur mein hamaare koi bhi chehra na thaa sakht hairat ho rahi hai dekh kar apnaa vajud dhuup mein the sab ke saaye par miraa saayaa na thaa shauq-e-manzil dekh meri dekh meraa hausla shahr-e-dil ke raaston mein main kabhi Thahraa na thaa 'qalb' ko sahraa-navardi raas kyaa aati bhalaa vo kabhi aavaargi mein dar-ba-dar bhaTkaa na thaa"