hasrat-e-dil thi kahaan ki vo kahaan tak pahunche — Khadeeja Mariyam

"hai faqat yahi fasaana miri 'umr-e-mukhtasar kaa miri kyaa bisaat-e-hasti huun charaagh raat bhar kaa baDi hausle se kheli huun ye zindagi ki baazi mujhe kyaa miTaa sakegaa koi gham idhar-udhar kaa mire sina-e-jahaan ko mire gham ne phunk Daalaa miraa ghar jalaayaa jis ne vo charaagh bhi thaa ghar kaa mujhe raas hi na aae mire nim-shab ke sajde mujhe dekh lo nishaan huun main du’aa-e-be-asar kaa jo bahaar-e-gulsitaan mein yunhi ban sanvar ke niklin ye bataao mujh ko 'mariyam' ki hai qasd ab kidhar kaa"

"tujh se ai mere sitamgar maa'zarat maa'zarat-dar-maa'zarat-dar-maa'zarat jo miri jaanib uchhaale the kabhi aaj karte hain vo patthar maa'zarat inkisaari se khaDe rahte hain ham tu guzar jaataa hai kah kar maa'zarat zulf-e-jaanaan ke jo dekhun pech-o-kham mujh ko aa jaate hain chakkar maa'zarat ik guzaarish thi tire barbaad ki kar li tasvir-e-junun par maa'zarat raat ke naalon kaa 'mariyam' kyaa kahein ham se kar lete hain aksar maa'zarat"

"boltaa hai tire ash'aar kaa jaadu dil mein aa rahi hai tire alfaaz ki khushbu dil mein aisaa lagtaa hai tiri yaad chali aai hai raushni phailti jaati hai jo harsu dil mein phir tire honT hanse hain miri barbaadi par kyon chamakne lage ummid ke jugnu dil mein tirgi phail gai khaana-e-gham mein shaayad hijr ki raat ne khole hain ye gesu dil mein hasratein tolne aae hain vo 'mariyam' kyunki le ke baiThe hain kai dard taraazu dil mein"

"zamaana-saaz khudaaon se Dar gae ham tum qasam khudaa ki mohabbat mein mar gae ham tum jahaan mein aae the kuchh 'aashiqaan-e-gham ke liye sadaa-e-'ishq lagaa kar guzar gae ham tum kabhi the jashn-e-bahaaraan kabhi the raunaq-e-gul so misl-e-barg-e-khizaan ab bikhar gae ham tum vabaal-e-gardish-e-dauraan hamein bataae to kahaan se aae the aur ab kidhar gae ham tum 'khadija' 'ishq-o-mohabbat ki daastaan ban kar koi to kaam zamaane mein kar gae ham tum"

"aap ko apni hi bedaad-gari yaad nahin is kaa matlab hai miri ham-safari yaad nahin ham se mat puchho sar-e-dasht safar kaisaa rahaa itnaa bhaTke hain ki ab dar-ba-dari yaad nahin kaaT degi yunhi barson kaa safar lamhon mein 'umr-e-dauraan tujhe aahista-ravi yaad nahin ham ko bhi yaad nahin aakhiri khat kaa mazmun naama-bar ko bhi koi naama-bari yaad nahin ham ne bhi 'ishq kiyaa thaa kabhi koi 'mariyam' is se haT ke to koi dard-e-sari yaad nahin"

"hijr ke ranj-o-alam apni jagah aap ke qaul-o-qasam apni jagah aap ne khud hi kinaaraa kar liyaa ham rahe saabit-qadam apni jagah bante bante raasta bantaa gayaa zindagi ke pech-o-kham apni jagah dhaDkanon ki phir sadaa aane lagi yaa'ni dil hai kam se kam apni jagah dhire dhire us mein Dhal jaaeinge ham khud banaa letaa hai gham apni jagah ho gai badnaam 'mariyam' khair se aap to hain mohtaram apni jagah"

"phir khuun mein vahshat raqsaan hai tajdid sitam karne ke liye ik taaza zakhm ki khvaahish hai ik sadma kam karne ke liye ham din-bhar duniyaa-daari mein hans hans ke baatein karte hain phir saari raat pighalte hain ik ashk raqam karne ke liye vo vasl ki jis ne ham donon ko yaksar be-buniyaad kiyaa ab fursat hai aa mil baiThein us vasl kaa gham karne ke liye ik kaari zakhm ki chaahat ne kyaa kyaa na hamein gulzaar kiyaa ham kis kis se mansub hue ik hijr baham karne ke liye insaan ke jiine marne ke majburi ke mukhtaari ke ye saare khel zaruri hain taamir adam karne ke liye"

"chaand bhi khoyaa khoyaa saa hai taare bhi khvaabida hain aaj fazaa ke bojhal-pan se lahje bhi sanjida hain jaane kin kin logon se is dard ke kyaa kyaa rishte the hijr ki is aabaad saraa mein sab chehre naadida hain itne barson baad bhi donon kaise TuuT ke milte hain tu hai kitnaa saada-dil aur ham kitne pechida hain sun jaanaan ham tark-e-taalluq aur kisi din kar leinge aaj tujhe bhi ujlat si hai ham bhi kuchh ranjida hain kaanon mein ik sargoshi hai be-maani si sargoshi aankhon mein kuchh khvaab saje hain khvaab bhi umr-rasida hain ghar ki vo makhdush imaarat gir ke phir taamir hui ab aangan mein peD hain jitne saare shaakh burida hain is basti mein ek saDak hai jis se ham ko nafrat hai us ke niche pagDanDi hai jis ke ham girvida hain"

"raftagaan ki sadaa nahin main huun ye tiraa vaahima nahin main huun tere maazi ke saath dafn kahin meraa ik vaaqi'a nahin main huun kyaa milaa intihaa-pasandi se kyaa main tere sivaa nahin main huun ek muddat mein jaa ke mujh pe khulaa chaand hasrat-zada nahin main huun us ne mujh ko muhaal jaan liyaa main ye kahtaa rahaa nahin main huun main hi 'ujlat mein aa gayaa thaa idhar ye zamaana nayaa nahin main huun meri vahshat se Dar gae shaayad yaar baad-e-fanaa nahin main huun main tire saath rah gayaa huun kahin vaqt Thahraa huaa nahin main huun gaahe gaahe sukhan zaruri hai saamne aaina nahin main huun sarsari kyuun guzartaa hai mujh se ye miraa maajraa nahin main huun us ne puchhaa kahaan gayaa vo shakhs kyaa bataataa ki thaa nahin main huun ye kise dekhtaa hai mujh se udhar tere aage khalaa nahin main huun"

"dast-kash hon na mai-e-gul ke khush-aashaam abhi ki labaalab hain mah-o-mehr ke do-jaam abhi zehn mein saaqi hai mai-khaana hai hai jaam abhi hosh kahtaa huun ise hosh kaa kyaa kaam abhi mujh ko darkaar na hai kufr na islaam abhi sidhe sidhe hi chale aate hain paighaam abhi tu bhi baaqi tiri rahmat bhi hai baaqi saaqi rahne de hai mai-e-isyaan se baDaa kaam abhi khaal-o-gesu se hai ye silsila-e-raaz-o-niyaaz daana sad-daana ho ye daam ho sad-daam abhi ziist ke khvaab ki taabir abhi baaqi hai ibtidaa dekh chuke hai magar anjaam abhi rah-rav-e-ishq abhi duur hai mearaaj-e-habib rashk-e-manzil na huaa raah mein har gaam abhi zarra-zarra hai ik aatish-kada-e-nur kalim dekh agar tu na ho aatish-zada-e-baam abhi imtiyaaz-e-man-o-tu raaz-e-khafi hai lekin khaasgaan ke liye kahtaa huun sar-e-aam abhi aks ko zo'm hai be-misli-e-rang-o-bu kaa turfa ye hai ki muqaabil hai vo gulfaam abhi raaz-goi tiri 'aiman' hai gunaah-e-akbar maang le afv ki us kaa hai karam aam abhi"

"baad-e-shimaal chalne lagi ang ang mein lipTaa hai kaun mujh se ye patjhaD ke rang mein khvaahish ke kaarobaar se bachnaa muhaal hai utregaa tu bhi saath mire is surang mein main aandhiyon mein haath bhi pakDun tiraa to kyaa ik shaakh-e-be-siper huun havaaon ki jang mein 'raanjhaa' main 'ahd-e-nau kaa qabilon mein baT gayaa to 'hir' ban ke pi na saki zahr jhang mein garmaa sakin na chaahatein teraa kaThor jism har ek jal ke bujh gai tasvir sang mein aage 'musavvir' aag 'aqab mein hai ye sadaa pichhe na muD ke dekhnaa is dasht-e-sang mein"

"tifli piiri o naujavaani hech tiin din ki hai zindagaani hech umr-e-do-roza par ghamanD itnaa munimon ki hai lan-taraani hech raat thoDi hai aao pyaar karein subh ko hogi ye kahaani hech chaar din ki bahaar hai saari ye takabbur hai yaar-e-jaani hech dil ke haathon 'haqir' jhagDon mein meri guzri sadaa javaani hech"