ibtidaa dard hai intihaa dard hai — Najma Shaheen Khosa

"ye jo ishq-e-masnad ke log hain unhein ramz saare sikhaa piyaa ye junun-e-ishq ki daastaan unhein harf harf sunaa piyaa mire chaaraagar main huun dar-ba-dar main to thak gai hai ajab safar miri be-nishaan si hain manzilein mujhe raasta bhi dikhaa piyaa na hudud mein na quyud mein miraa dil tire hi vajud mein ye sujud kaa hasin pairahan miri ruuh par to sajaa piyaa main to aas thi main to pyaas thi kisi phuul ki main bhi baas thi miri pattiyaan girein jaa-ba-jaa unhein shaakh par to sajaa piyaa main faqir huun main haqir huun kisi khvaab ki na asiir huun main aziiz huun to tujhe hi bas so aziz-tar hi banaa piyaa main falak se aai khataa miri use DhunDnaa hai vafaa miri ye jafaa ki jo hain haqiqatein miri aankh ko vo dikhaa piyaa mire aasmaan mire saaebaan tu hi raaz-daan tu hi mehrbaan jahaan laa-makaan ke hain silsile vahin meraa ghar bhi banaa piyaa ye jo aarzuon kaa des hai ye jo khaak khaak saa bhes hai jo azal abad kaa ye bhed hai use bhed hi mein bataa piyaa ye qadam qadam pe bashaaratein ye nazar nazar mein ziyaaratein ye basaartein ye bujhaartein mire shahr-e-dil ko dikhaa piyaa ye jo mere man mein hai raushni yahi zindagi yahi bandagi miri fikr mein tire zikr mein jo charaagh hain vo jalaa piyaa"

"daaimi hai ishq aur ik daaimi aavaaz hai mere kaanon mein abhi tak bas vahi aavaaz hai saath mere raat bhar jo jaagti aavaaz hai kaun jaane ye to meri ruuh ki aavaaz hai hijr ke lamhon mein ab tak ye khabar kab ho saki jaagti huun main yaa koi jaagti aavaaz hai hijr jaise vasl mein us ko sunaa to yuun lagaa maut jaisi zindagi mein zindagi aavaaz hai ajnabi si manzilon ki ajnabi si raah mein ik mukammal khvaab aur ik khvaab si aavaaz hai aane vaale daur mein 'shaahin' rahnaa hai mujhe sab kaheinge ye vahi ik dukh bhari aavaaz hai"

"ye ishq ajab lamha-e-tauqir hai jaanaan khud meraa khudaa us ki hi tafsir hai jaanaan jo naam hatheli ki lakiron mein nahin thaa kyuun aaj talak dil pe vo tahrir hai jaanaan us khvaab ki taabir to mumkin hi nahin thi aankhon mein magar us ki hi taasir hai jaanaan maanaa ki tire haathon mein hain phuul abhi tak lekin tire pairon mein jo zanjir hai jaanaan kyaa jaaniye kis roz bikhar jaae kahin bhi is aas ki dil mein jo ik tanvir hai jaanaan ye rog kahin mujh ko hi mismaar na kar de aa lauT kar aa tu hi to iksir hai jaanaan tu hijr mein Duubi hui nayyaa kaa kinaara jivan ki tire paas hi tadbir hai jaanaan ye zakhm judaai ke kabhi silne nahin hain tu jaan le apni yahi taqdir hai jaanaan us aag ke shoalon mein vo phulon kaa tabassum ik sajda-e-be-misl ki tasvir hai jaanaan ab din ki talab hi nahin 'shaahin' mujhe to ik shaam hi ab to miri jaagir hai jaanaan"

"chaandni chup rahi raushni chup rahi meri har baat par zindagi chup rahi ham to ghuT ghuT ke ik roz mar jaaeinge is ghuTan mein agar aankh bhi chup rahi dard meraa bayaan un se kab ho sakaa sher khaamosh the shaairi chup rahi ik yaqin thaa palaT aaegaa vo abhi main to bas us ki rah dekhti chup rahi mujh ko maqtal mein jis roz bhejaa gayaa sochti huun main kyuun us ghaDi chup rahi main ne 'shaahin' jivan guzaaraa hai yuun niind mein baat ki jaagti chup rahi"

"zamin mile kahin hamein kahin to aasmaan mile dukhon ki dhuup mein shajar koi to mehrbaan mile tire firaaq mein jiye tire firaaq mein mare chalo ye khvaab hi sahi visaal kaa gumaan mile alam ki shaam aa gai lo mere naam aa gai charaagh le ke raah mein ai kaash mehrbaan mile abhi talak fughaan huun main misaal-e-daastaan huun main mile to ek pal kabhi kahin to kaarvaan mile ajiib se vo rang the sabhi ke haath sang the hamein to ghair bhi sabhi misaal-e-dostaan mile jabin jabin nahin rahi to mah-jabin nahin rahi na log vo kahin mile na tujh ko aastaan mile"

"gham ke sunsaan bayaabaan se nikaltaa hi nahin dil miraa dard ke tufaan se sanbhaltaa hi nahin 'ishq ki aatish-e-khaamosh hai kab se raushan magar ehsaas kaa sho'la hai ki jaltaa hi nahin har taraf dhund hai ashkon ki faraavaani se dil-e-betaab saraabon se bahaltaa hi nahin talkhiyaan ahl-e-zamaana se vo jheli hain na puchh dil miraa fasl-e-bahaaraan mein machaltaa hi nahin kab se haalaat-e-zamaana hain digar-gun lekin dil kaa mausam kisi haalat mein badaltaa hi nahin kyaa kahun darpai-e-aazaar hai duniyaa 'shaahin' aadmi qaid-e-zamaana se nikaltaa hi nahin"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"kisi ki mehrbaani ho gai hai ayaan dil ki kahaani ho gai hai hare mausam ki pahli khvaahishein uf khushi gham ki divaani ho gai hai sabhi afraad ghar ke so gae hain bahut lambi kahaani ho gai hai rivaayat kaa hai ab bhi sahar qaaem har ik jiddat puraani ho gai hai pas-e-chehra milaa ik aur chehra 'aqidat paani paani ho gai hai"

"khaamushi ke batn se ye guftani paidaa hui main ba-zaahir chup huaa aur shaaeri paidaa hui is tarah saabit huaa gham aur khushi kaa imtizaaj hanste hanste us ki aankhon mein nami paidaa hui jurm ki paadaash mein ham khaak par pheinke gae so yahaan par intiqaaman zindagi paidaa hui khauf ne hi maslahat ki raah bhi ijaad ki main andheron se Daraa aur raushni paidaa hui dil mein kab utri kisi ke be-maaani guftugu baat karne se to bas aavaaz hi paidaa hui"

"kabhi hasin koi haadisa huaa hi nahin tamaam umr kaTi vo miraa huaa hi nahin sukun kyaa hai khushi kyaa hai chain kyaa shai hai main kyaa bataaun mujhe tajraba huaa hi nahin jise yaqin thaa vo aasmaan ko chhu aayaa jise ghurur thaa vo to baDaa huaa hi nahin na jaane kaun si us mein kami rahi hogi koi bhi shakhs kabhi devtaa huaa hi nahin kahaa thaa main ne ki ik roz aap badleinge ye aur baat ki meraa kahaa huaa hi nahin"

"subh-e-nau laati hai har shaam tumhein kyaa maalum zakhm khushiyon ke hain paighaam tumhein kyaa maalum bhuul kar bhi jo kisi bazm mein aayaa na gayaa sainkaDon us pe hain ilzaam tumhein kyaa maalum log gulshan mein to chalte hain sar-afraazi se un mein kitne hain tah-e-daam tumhein kyaa maalum kuchh andhere bhi khataavaar-e-tabaahi hain magar raushni par bhi hai ilzaam tumhein kyaa maalum jis ko tum DhunDte ho sham-e-rukh-e-naaz liye vo to arse se hai gumnaam tumhein kyaa maalum jo rukh-e-zist pe thaa harf-e-ghalat ki maanind mil rahaa hai use inaam tumhein kyaa maalum jo kafan baandh ke chalte hain vafaa ki rah mein zindagi kar chuke nilaam tumhein kyaa maalum surkh-ru kaun huaa kucha-e-jaanaan mein kabhi naamvar bhi hue badnaam tumhein kyaa maalum do qadam bhi na chale raah-e-vafaa mein ham log hai abhi zauq-e-talab khaam tumhein kyaa maalum jo jalaa raat ki tanhaai mein us par bhi 'khayaal' bevafaai kaa hai ilzaam tumhein kyaa maalum"

"pata kaise chale duniyaa ko qasr-e-dil ke jalne kaa dhuein ko raasta miltaa nahin baahar nikalne kaa bataa phulon ki masnad se utar ke tujh pe kyaa guzri miraa kyaa main to aadi ho gayaa kaanTon pe chalne kaa mire ghar se ziyaada duur sahraa bhi nahin lekin udaasi naam hi leti nahin baahar nikalne kaa chaDhegaa zahr khushbu kaa use aahista aahista kabhi bhugtegaa vo khamyaaza phulon ko masalne kaa musalsal jaagne ke baad khvaahish ruuTh jaati hai chalan sikhaa hai bachche ki tarah us ne machalne kaa zar-e-dil le ke pahunchaa thaa mataa-e-jaan bhi kho baiThaa diyaa us ne na mauqaa bhi kaf-e-afsos milne kaa khushi se kaun kartaa hai ghamon ki parvarish 'saajid' kise hai shauq logo dard ke saanche mein Dhalne kaa"