ilm bhi aazaar lagtaa hai mujhe — Ahmad Soz

"ai shaah-e-be-khudi kabhi divaana kar mujhe jab ho chukun divaana to achchhaa na kar mujhe aankhon ko meri apni basaarat pe naaz ho jab saamne vo aae to andhaa na kar mujhe ab aur kitni baar chalun pul-siraat par vaapas bulaa le phir kabhi paidaa na kar mujhe ai paikar-e-fanaa ye tiraa inzimaam hai dariyaa banaa huun qatre se royaa na kar mujhe mustaghraq-e-junun-e-taayyush mein jab rahun ai raqs-e-zaat sab kaa tamaashaa na kar mujhe rahne na de junun miraa mujh ko sukun se dast-e-shifaa de aur masihaa na kar mujhe"

"main jaan gayaa huun vo miraa gham na karegaa achchhaa hai mire baad vo maatam na karegaa kyaa koi karegaa mire zakhmon kaa mudaavaa jab meraa lahu khud mujhe marham na karegaa jaadu use aataa hai ye maalum hai sab ko jaadu se kisi shai ko vo darham na karegaa ab shaikh se ummid muravvat ki na rakhnaa nazraana nahin doge to vo dam na karegaa ghar sar pe uThaa lene mein aataa hai use lutf ye shor bhi us kaa mujhe barham na karegaa"

"mujhe itnaa sataa kar kyaa karegaa miri hasti miTaa kar kyaa karegaa main sannaai kaa paikar huun usi ki hansi meri uDaa kar kyaa karegaa jo fitrat hai miri vo to aTal hai musalsal aazmaa kar kyaa karegaa huaa jo koelaa thaa raakh jal kar usi ko phir jalaa kar kyaa karegaa miraa zaahir miraa baatin miraa hai mire ghar mein vo aa kar kyaa karegaa main jal kar raakh ho jaaungaa pal mein mujhe jalva dikhaa kar kyaa karegaa"

"khandaq-e-dahr mein utar to sakun jo na ab tak huaa vo kar to sakun gard-aalud aamad-o-shud hai chaahaton mein guzar basar to sakun chal rahi hai havaa-e-tund-o-tez talkhiyon ko zaraa shakar to sakun saari ki saari neamatein hain udhar kuchh udhar ko zaraa idhar to sakun dhuup barsaa rahi hai angaare shahr-e-be-saaya ko shajar to sakun teri duniyaa mein sarhadein hain bahut chaahun jis samt se guzar to sakun"

"nae manzar ki justuju bhi karun main use apne ru-ba-ru bhi karun sab se ummid bhi rakhun achchhi aur ek ek ko adu bhi karun husn us kaa mujhe ibaadat saa apni aankhein zaraa vuzu bhi karun us ke dil ko pasijnaa hai mujhe apne aansu kabhi lahu bhi karun saari makhluq satr-posh nahin husn ko rashk-e-aabru bhi karun le luun phulon se husn ki daulat apni ghazlon ko rang-o-bu bhi karun"

"asl mein vaaqia huaa yuun hai vo bhi chup main bhi chup rahaa yuun hai saamne us ke zindagi saari aur tahi-dast main bhi thaa yuun hai kuchh kahaa main ne kuchh sunaa us ne pal mein sab kuchh ujaD gayaa yuun hai aaj bhi sainkaDon hain divaarein dar-haqiqat ye masala yuun hai ik bahut dil-nashin nazar mein thaa darmiyaan aa gayaa khudaa yuun hai main pareshaan thaa garmiyon se bhi dil bhi thaa bad-havaas saa yuun hai meri pahchaan hai miraa uslub 'soz' meraa nayaa pata yuun hai"

"phir khuun mein vahshat raqsaan hai tajdid sitam karne ke liye ik taaza zakhm ki khvaahish hai ik sadma kam karne ke liye ham din-bhar duniyaa-daari mein hans hans ke baatein karte hain phir saari raat pighalte hain ik ashk raqam karne ke liye vo vasl ki jis ne ham donon ko yaksar be-buniyaad kiyaa ab fursat hai aa mil baiThein us vasl kaa gham karne ke liye ik kaari zakhm ki chaahat ne kyaa kyaa na hamein gulzaar kiyaa ham kis kis se mansub hue ik hijr baham karne ke liye insaan ke jiine marne ke majburi ke mukhtaari ke ye saare khel zaruri hain taamir adam karne ke liye"

"chaand bhi khoyaa khoyaa saa hai taare bhi khvaabida hain aaj fazaa ke bojhal-pan se lahje bhi sanjida hain jaane kin kin logon se is dard ke kyaa kyaa rishte the hijr ki is aabaad saraa mein sab chehre naadida hain itne barson baad bhi donon kaise TuuT ke milte hain tu hai kitnaa saada-dil aur ham kitne pechida hain sun jaanaan ham tark-e-taalluq aur kisi din kar leinge aaj tujhe bhi ujlat si hai ham bhi kuchh ranjida hain kaanon mein ik sargoshi hai be-maani si sargoshi aankhon mein kuchh khvaab saje hain khvaab bhi umr-rasida hain ghar ki vo makhdush imaarat gir ke phir taamir hui ab aangan mein peD hain jitne saare shaakh burida hain is basti mein ek saDak hai jis se ham ko nafrat hai us ke niche pagDanDi hai jis ke ham girvida hain"

"raftagaan ki sadaa nahin main huun ye tiraa vaahima nahin main huun tere maazi ke saath dafn kahin meraa ik vaaqi'a nahin main huun kyaa milaa intihaa-pasandi se kyaa main tere sivaa nahin main huun ek muddat mein jaa ke mujh pe khulaa chaand hasrat-zada nahin main huun us ne mujh ko muhaal jaan liyaa main ye kahtaa rahaa nahin main huun main hi 'ujlat mein aa gayaa thaa idhar ye zamaana nayaa nahin main huun meri vahshat se Dar gae shaayad yaar baad-e-fanaa nahin main huun main tire saath rah gayaa huun kahin vaqt Thahraa huaa nahin main huun gaahe gaahe sukhan zaruri hai saamne aaina nahin main huun sarsari kyuun guzartaa hai mujh se ye miraa maajraa nahin main huun us ne puchhaa kahaan gayaa vo shakhs kyaa bataataa ki thaa nahin main huun ye kise dekhtaa hai mujh se udhar tere aage khalaa nahin main huun"

"dast-kash hon na mai-e-gul ke khush-aashaam abhi ki labaalab hain mah-o-mehr ke do-jaam abhi zehn mein saaqi hai mai-khaana hai hai jaam abhi hosh kahtaa huun ise hosh kaa kyaa kaam abhi mujh ko darkaar na hai kufr na islaam abhi sidhe sidhe hi chale aate hain paighaam abhi tu bhi baaqi tiri rahmat bhi hai baaqi saaqi rahne de hai mai-e-isyaan se baDaa kaam abhi khaal-o-gesu se hai ye silsila-e-raaz-o-niyaaz daana sad-daana ho ye daam ho sad-daam abhi ziist ke khvaab ki taabir abhi baaqi hai ibtidaa dekh chuke hai magar anjaam abhi rah-rav-e-ishq abhi duur hai mearaaj-e-habib rashk-e-manzil na huaa raah mein har gaam abhi zarra-zarra hai ik aatish-kada-e-nur kalim dekh agar tu na ho aatish-zada-e-baam abhi imtiyaaz-e-man-o-tu raaz-e-khafi hai lekin khaasgaan ke liye kahtaa huun sar-e-aam abhi aks ko zo'm hai be-misli-e-rang-o-bu kaa turfa ye hai ki muqaabil hai vo gulfaam abhi raaz-goi tiri 'aiman' hai gunaah-e-akbar maang le afv ki us kaa hai karam aam abhi"

"baad-e-shimaal chalne lagi ang ang mein lipTaa hai kaun mujh se ye patjhaD ke rang mein khvaahish ke kaarobaar se bachnaa muhaal hai utregaa tu bhi saath mire is surang mein main aandhiyon mein haath bhi pakDun tiraa to kyaa ik shaakh-e-be-siper huun havaaon ki jang mein 'raanjhaa' main 'ahd-e-nau kaa qabilon mein baT gayaa to 'hir' ban ke pi na saki zahr jhang mein garmaa sakin na chaahatein teraa kaThor jism har ek jal ke bujh gai tasvir sang mein aage 'musavvir' aag 'aqab mein hai ye sadaa pichhe na muD ke dekhnaa is dasht-e-sang mein"

"tifli piiri o naujavaani hech tiin din ki hai zindagaani hech umr-e-do-roza par ghamanD itnaa munimon ki hai lan-taraani hech raat thoDi hai aao pyaar karein subh ko hogi ye kahaani hech chaar din ki bahaar hai saari ye takabbur hai yaar-e-jaani hech dil ke haathon 'haqir' jhagDon mein meri guzri sadaa javaani hech"