ishq ki baargaah tak pahunchaa — Mubarak Mungeri

"khizaan chaman mein yuun mastaanaa-vaar guzri hai gumaan ye hotaa hai jaise bahaar guzri hai fazaa udaas gali muzmahil chaman paamaal bahaar ab ke khizaan darkinaar guzri hai abhi vahi kahin guzre na hon udhar ho kar shamim-bez havaa itr-baar guzri hai zahe tasavvur-e-jaanaan zahe khayaal-e-jamaal har ek saans miri mushk-baar guzri hai tire karam se hamesha rahaa hai dil shaadaab mire chaman se hamesha bahaar guzri hai lubhaa sakegi mujhe kyaa kisi ki raanaai miri nazar se tumhaari bahaar guzri hai inaayat aap ki vajh-e-sukun to hai lekin main kyaa karun ki tabiat pe baar guzri hai guzar rahi hai 'mubaarak' guzar hi jaaegi vo zindagi jo bahut naagavaar guzri hai"

"mahrumiyon kaa dil par itnaa hai kuchh asar saa chaahat ke naam se bhi lagne lagaa hai Dar saa ik aah mein Dhali hai rudaad-e-zindagaani umr-e-tavil kaa hai afsaana mukhtasar saa rukhsat huaa hai dil se har shauq rafta rafta ye shahr-e-aarzu bhi bantaa chalaa khanDar saa aataa hai dhyaan un kaa yuun dasht-e-zindagi mein zulmat mein shab ki jaise ho jalva-e-sahar saa aasudgi-e-gham ne kitnaa surur bakhshaa apne vajud se bhi rahtaa huun be-khabar saa andaaz-e-pursish-e-gham thaa dil-fareb kitnaa vo dushman-e-tamannaa lagtaa thaa chaaraagar saa ashkon ne zabt-e-gham ki rakkhi hai laaj har dam sau baar ghir ke aayaa baadal magar na barsaa raah-e-hayaat mein ham tanhaa nahin 'mubaarak' un kaa khayaal har dam rahtaa hai ham-safar saa"

"dil mein hasrat kaa daagh jaltaa hai yaa haram mein charaagh jaltaa hai ab khirad bhi junun ki raah lagi dil to dil hai dimaagh jaltaa hai yaad aati hai aarzuon ki dil kaa ek-ek daagh jaltaa hai phuul hain yaa dahakte angaare fasl-e-gul hai ki baagh jaltaa hai yaas mein bhi ye hausla dil kaa tirgi mein charaagh jaltaa hai ab nasheman ki khair ho yaarab shoala-e-gul se baagh jaltaa hai"

"ataa kar mujh ko nazaare ki taab aahista-aahista uThaa ru-e-munavvar se naqaab aahista-aahista karam ki aarzu kyaa jab karam ho jaur-e-paiham kaa gavaaraa hotaa jaataa hai itaab aahista-aahista vo chhup-chhup kar mulaaqaatein vo husn-o-ishq ki baatein savaal aahista-aahista javaab aahista-aahista tiri chashm-e-taghaaful rafta-rafta ho gai maail huaa jazb-e-mohabbat kaamyaab aahista-aahista sar-e-mahshar na ban aayaa 'mubaarak' jab javaab un se uThi meri taraf chashm-e-pur-aab aahista-aahista"

"alam ki dhuup mein ahbaab kaam aayaa nahin karte ye vo uDte hue baadal hain jo saayaa nahin karte jigar shaq ho magar lab par fughaan laayaa nahin karte sharaab-e-gham jo piite hain vo lahraayaa nahin karte sahegaa kaun phulon ke sivaa jaur-e-khizaan aakhir bahaar-e-husn par kaanTe to itraayaa nahin karte nahin maanus lab jin se kuchh aisi bhi hain fariyaadein kuchh aansu hain jo palkon par nazar aayaa nahin karte"

"daaman lahu-lahu hai garebaan lahu-lahu hain kushtagaan-e-fasl-e-bahaaraan lahu-lahu shaayad guzar chuki hai asiron ki jaan par zanjir hai khamosh to zindaan lahu-lahu go ho chukaa vajud patangon kaa be-nishaan hai daaman-e-charaagh-e-shabistaan lahu-lahu kis kaarvaan-e-aabla-paa kaa guzar huaa hai dasht khun-khun bayaabaan lahu-lahu khanjar-fashaan hai kis ki khudaai chahaar samt har gaam par hai azmat-e-insaan lahu-lahu aanchal hai surkh khuun se urus-e-bahaar kaa gulchin ke jaur se hai gulistaan lahu-lahu jaulaan faqat ragon mein 'mubaarak' lahu nahin hai qalb-taa-ba-dida-e-giryaan lahu-lahu"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"