jihat ko be-jihti ke hunar ne chhin liyaa — Allama Talib Jauhari

"jab naghma-zan thiin raatein jab bakht mehrbaan thaa apni bhi ik zamin thi apnaa bhi aasmaan thaa ab ham hain aur gumaan par andesha-e-yaqin hai ik roz har yaqin par andesha-e-gumaan thaa ham khaak ho gae hain is suud ke 'alaava jo hai vo raaegaan hai jo thaa vo raaegaan thaa main chup khaDaa huaa thaa harfon ke saaebaan mein maa'ni ki har jihat mein ik dasht-e-be-amaan thaa is vaahime ki baabat pahron ye sochtaa huun vo hai to kyon nahin hai vo thaa to phir kahaan thaa kal shab miri ragon mein bijli chamak rahi thi baadal garaj rahe the kal shab vo mehmaan thaa jab harf-e-sharmsaari us ke labon pe jaagaa vo lamha-e-tavaanaa sadiyon se bhi karaan thaa ham ne bhi tark kar di ab jism ki sukunat saayon ki sar-zamin thi aaseb kaa makaan thaa kal mujh pe khuub barse rashk-o-hasad ke patthar taaron ki anjuman mein yaadon ke darmiyaan thaa thaa jashn-e-taaj-poshi bhuton ke us nagar mein sunsaan the 'ilaaqe aur khauf kaa samaan thaa"

"andhi raat ke chehre par taariki kaa ghaaza thaa dhyaan ki uThti maujon mein jazbon kaa aavaaza thaa yuun to zakhm aur marham mein ik fitri samjhautaa hai lekin marham kyaa kartaa zakhm-e-mohabbat taaza thaa baasi phuul ki khushbu ne saare 'uqde khol diye us ke haath ki mehndi se pahle sirf andaaza thaa ham ko muqaddar chhoD gayaa aur kisi dar par varna jis par dastak deni thi vo us kaa darvaaza thaa ik mustahkam rishta hai basti kaa viraane se ghar mein moti bikhre the jangal mein shiraaza thaa basti ki pagDanDi se guzre the kuchh log abhi 'taalib' ham ko kyaa maa'lum Doli thi ki janaaza thaa"

"kahin badan tishnagi kaa sahraa kahin badan be-kanaar dariyaa rafaaqaton kaa haris sahraa kuduraton kaa shikaar dariyaa chanaab ke khushk saahilon par guzar gai khushk-lab javaani ham us ko paate to kaise paate ki vo thaa dariyaa ke paar dariyaa zaraa si ik aabju se ham ne bujhaa li pyaas apni naarasi ki hamaari sairaab khvaahishon ko milaa karein ab hazaar dariyaa khizaan ke mausam ki chira-dasti badan ke kapDe bhi le gai hai libaas thaa apni be-zari kaa phaTaa huaa taar-taar dariyaa vo ek juz thaa jo apne kul ki talab mein hairaan-o-muztarib thaa khule samundar ki khaaDiyon mein utar gayaa be-qaraar dariyaa main apni kashti jalaa rahaa thaa gham-e-zamaana ke saahilon par nigaah-e-hasrat se tak rahaa thaa mujhe miraa gham-gusaar dariyaa"

"varaq varaq meri daastaan hai shikaar huun apni aagahi kaa samundaron se fareb khaa kar suraagh paayaa hai tishnagi kaa main apni mushkil-pasand fitrat se qarz le kar jafaa-kashi kaa kahin bayaabaan mein jaa basungaa jahaan ijaara na ho kisi kaa miri samaa'at ke saare jangal navaa ke sho'lon se jal rahe hain mire 'ilaaqe pe kis qayaadat ne jaal pheinkaa hai raushni kaa jahaan kahin 'ilm ki qanaa'at ne vahm ke hausle baDhaae vahin ta'aqqul ki mukhbiri ne ghurur toDaa hai bandagi kaa main apne baatin ke zalzalon ki tabaah-kaari se bach to niklaa khaDaa huun aatish-fishaan ki zad par bhalaa ho ehsaas-e-kamtari kaa ye shahr-e-ahl-e-karam hai 'taalib' ye log hain laaiq-e-tamaashaa ho khvaahish-e-did misl-e-ghaalib to svaang bhar lo gadaagari kaa"

"jaise hi ziina bolaa tah khaane kaa kunDli maar ke baiThaa saanp khazaane kaa ham bhi zakhm-talab the apni fitrat mein vo bhi kuchh sachchaa thaa apne nishaane kaa raahib apni zaat mein shahr aabaad karein dair ke baahar pahraa hai viraane kaa vaqt ki qainchi us ke paron ko kaaT gai sham' se rishta Tuut gayaa parvaane kaa barse kyaa be-faiz zamin par abr-e-karam khaak kaa har zarra maqruz hai daane daane kaa subh savere shabnam chaaTne vaale phuul dekh liyaa khamyaaza pyaas bujhaane kaa baat kahi aur kah kar khud hi kaaT bhi di ye bhi ik pairaaya thaa samjhaane kaa 'taalib' un ko paanaa to dushvaar na thaa andesha thaa khud apne kho jaane kaa"

"phunk kar dasht-e-'arab ki kokh mein ruh-e-iram ik ghaneri chhaaon phailaa di sar-e-farq-e-umam vo qadim insaan takhliq-e-jahaan se bhi qadim jis ke ehsaasaat ki tajsim hain lauh-o-qalam vo baqaa-parvar ki baa-maa'naa hai mafhum-e-vujud vo fanaa-dushman ki ab ik lafz-e-muhmal hai 'adam vo azal-aasaar taa'lim-e-malaaik jis ki bhiik vo abad-kirdaar jannat jis ke darvaaze pe kham jis ke bal par naaz kartaa hai amaanat kaa mizaaj jis ke dam se saans letaa hai diyaanat kaa bharam us se baatein kar ke paa le ham-kalaami kaa sharaf tham khudaa ke vaaste ai naa-rasaa idraak tham ai qazaa-aagaah mursal ai qadar-paimaa nabi ai ‘umud-e-khema-e-jaan ai vujud-e-kaif-o-kam tu dayaar-e-aagahi mein rab ke hone kaa nishaan tu fasil-e-fahm par tauhid-e-khaaliq kaa 'alam 'aql ki khaak-e-tayammum hai tire qadmon ki dhuul fikr kaa aab-e-vuzu hai teri peshaani kaa nam"

"aakhiri hal thaa yahi pesh-e-nazar jaane diyaa ek gahri saans li phir khvaab mar jaane diyaa saarbaanaa de gavaahi mujh ko pyaari thi anaa rakh liyaa zaad-e-safar aur ham-safar jaane diyaa hazrat-e-naaseh ki khush-uftaadgi pe daad hai khud jidhar se aae the sab ko udhar jaane diyaa is harim-e-naaz mein yuun be-mahaabaa guftugu kuchh bharam rakkhaa to hotaa tum ko gar jaane diyaa tujh ko rokaa jaa rahaa thaa raushni thi jab talak shaam ke Dhalte samay suraj ko ghar jaane diyaa aankh sapne dekhti thi aansuon se kyon bhari chaahti to puchh leti main magar jaane diyaa dostaa qismat na ho to koshishein bekaar hain sabr kaa paimaana ham ne khud hi bhar jaane diyaa dil musir thaa baarhaa kuchh jaanchne ko ruk gae aakhirash us ne hamein baar-e-digar jaane diyaa"

"aisaa to yahaan kuchh bhi nahin hadd-e-nazar tak ham ko to pahunchnaa thaa kisi khvaab-nagar tak ab paanv nahin raah mein dil thakne lagaa hai lekin hamein chalnaa to hai anjaam-e-safar tak ham shor bhi sunte hain samaaat se bahut kam aavaaz bhi jaati hai to bas hadd-e-nazar tak mumkin hai main ab sabr kaa ye peD giraa duun jab haath pahunchtaa hi nahin shaakh-e-samar tak ham apne hi mausam se parakhte hain jahaan ko maahaul kaa lete hi nahin koi asar tak main apne hi andar ki taraf chikh rahaa huun ab dekhiye jaati hai ye aavaaz kidhar tak"

"tirgi shama bani raahguzar mein aai saaat ik aisi bhi kal apne safar mein aai jis jagah chehra hi meyaar-e-vafaa Thahraa hai khaak hi khaak vahaan dast-e-hunar mein aai teri nazron mein thi duniyaa to yahi kyaa kam thaa hashr ye hai ki tu duniyaa ki nazar mein aai baar-haa yaaron ne saahil se kahaa thaa ham hain baar-haa naav magar apni bhanvar mein aai zindagi samjhun ise yaa ki ise maut kahun vo jo mehmaan ki surat mire ghar mein aai yuun bhi taarikh ki taarikh raqam hoti hai nikli taarikh mahal se to khanDar mein aai khvaab hi khvaab ki taabir huaa to jaanaa zindagi kyuun kisi aankhon ke asar mein aai shama jalte hi bujhi aur dhuaan aisaa uThaa lazzat-e-shaam yahaan khvaab-e-sahar mein aai zindagi kuchh hai 'ataa' sher-o-adab hai kuchh aur ye do-rangi ki vabaa kaisi hunar mein aai"

"safar mein aise kai marhale bhi aate hain har ek moD pe kuchh log chhuT jaate hain ye jaan kar bhi ki patthar har ek haath mein hai jiyaale log hain shishon ke ghar banaate hain jo rahne vaale hain log un ko ghar nahin dete jo rahne vaalaa nahin us ke ghar banaate hain jinhein ye fikr nahin sar rahe rahe na rahe vo sach hi kahte hain jab bolne pe aate hain kabhi jo baat kahi thi tire taalluq se ab us ke bhi kai matlab nikaale jaate hain"

"tire jamaal se ham runumaa nahin hue hain chamak rahe hain magar aaina nahin hue hain dhaDak rahaa hai tu ik ism ki hai ye barakat vagarna vaaqiye is dil mein kyaa nahin hue hain bataa na paaein to khud tum samajh hi jaao ki ham bilaa javaaz to be-maajraa nahin hue hain tiraa kamaal ki aankhon mein kuchh zabaan pe kuchh hamein to moajize aise ataa nahin hue hain ye mat samajh ki koi tujh se munharif hi nahin abhi ham ahl-e-junun lab-kushaa nahin hue hain ba-naam-e-zauq-e-sukhan khud-numaai aap karein ham is maraz mein abhi mubtalaa nahin hue hain hami vo jin kaa safar maavaraa-e-vaqt-o-vajud hami vo khud se kabhi jo rihaa nahin hue hain khud-aagahi bhi khaDi maangti hai apnaa hisaab junun ke qarz bhi ab tak adaa nahin hue hain kisi ne dil jo dukhaayaa kabhi to ham 'irfaan' udaas ho gae lekin khafaa nahin hue hain"

"ba-zom-e-aql ye kaisaa gunaah main ne kiyaa ik aainaa thaa usi ko siyaah main ne kiyaa ye shahr-e-kam-nazaraan ye dayaar-e-be-hunaraan kise ye apne hunar kaa gavaah main ne kiyaa harim-e-dil ko jalaane lagaa thaa ek khayaal so gul use bhi ba-yak sard aah main ne kiyaa vahi yaqin rahaa hai javaaz-e-ham-safari jo gaah us ne kiyaa aur gaah main ne kiyaa bas ek dil hi to hai vaaqif-e-rumuz-e-hayaat so shahr-e-jaan kaa use sarbaraah main ne kiyaa har ek ranj usi baab mein kiyaa hai raqam zaraa saa gham thaa jise be-panaah main ne kiyaa ye raah-e-ishq bahut sahl ho gai jab se hisaar-e-zaat ko paivand-e-raah main ne kiyaa ye umr ki hai basar kuchh ajab tavaazun se tiraa huaa na hi khud se nibaah main ne kiyaa khirad ne dil se kahaa tu junun-sifat hi sahi na puchh us ki ki jis ko tabaah main ne kiyaa"