kabhi pesh-e-khudaa rakh di kabhi pesh-e-butaan rakh di — Dilshad Ahmad

"aisaa manzar koi qismat ne dikhaayaa hotaa mere shaanon pe tiri zulf kaa saaya hotaa yuun charaaghon ko jalaa kar na bujhaayaa hotaa vaa'da jab kar hi liyaa thaa to nibhaayaa hotaa meri aankhon ke liye ashk banaane vaale mere honTon kaa tabassum bhi banaayaa hotaa ruThe rahne ki qasam main ne kahaan khaai thi maan jaataa main agar tum ne manaayaa hotaa qatl karnaa thaa mujhe shauq se karte lekin apni aaghosh ko maqtal to banaayaa hotaa husn kuchh aur bhi maghrur huaa hai 'dilshaad' aaina us ko na ai kaash dikhaayaa hotaa"

"dimaagh 'ishq mein naa hi paDe to behtar hai ye kaam dil kaa hai dil hi kare to behtar hai raheinge yuun to sabhi apne vaqt tak zinda zamir saath mein zinda rahe to behtar hai ye baat sach hai mohabbat hai be-niyaaz magar vafaa ke badle vafaa hi mile to behtar hai hai kaam 'ishq kaa takmil-e-aarzu lekin razaa-e-husn bhi shaamil rahe to behtar hai hamaari pyaas hai mai se bujhe bujhe na bujhe hamaare jaam mein saaqi Dhale to behtar hai bahut hai yuun to charaagh-e-amir bhi 'dilshaad' shab-e-firaaq magar dil jale to behtar hai"

"zulf ke saae mein ho yaa saaya-e-shamshir mein farq aataa hi nahin hai 'ishq ki taasir mein meri aankhon se agar tujh ko musavvir dekhtaa aur bhi zyaada kashish hoti tiri tasvir mein un ke naazuk haath se to khinch na paaegi kamaan ham hi apne dil ko le jaa kar piro dein tiir mein dekh lenaa tum ki naa-jaaez kamaai baap ki Daal degi farq maan ke duudh ki taasir mein log tadbiron ke dam par khvaab puure kar gae aur ham uljhe hue hain khvaab ki taa'bir mein maan lo 'dilshaad' haasil thi unhein me’raaj-e-ishq be-sabab raanjhaa nazar aataa nahin thaa hiir mein"

"shab-e-furqat mein ham jab bhi khutut-e-yaar paDhte hain maraasim sabr se dil ke usi lamha bigaDte hain na ham ko chheD ai saavan nahin to ye bhi mumkin hai vo baadal bhi baras uTThein jo siine mein umaDte hain nazar paDti hai jab jab bhi tumhaari zulf-e-barham par sitaare toD laane ko hamaare haath baDhte hain daghaa-baazi badal deti hai aksar rang chehron kaa vo patte zard hote hain jo shaakhon se bichhaDte hain tum apne ham-zabaanon ki sadaaein soch kar sunnaa yahaan par log titar se hi titar ko pakaDte hain riyaa-kaari kaa jaadu der tak chaltaa nahin 'dilshaad' kalaf vaale kaDak kapDe bhi dhulte hi sukaDte hain"

"ta'alluq jab kabhi parvaan chaDh kar TuuT jaataa hai koi kaanTaa saa chubh ke dil ke andar TuuT jaataa hai ta'ajjub kyaa jo dil meraa musalsal gham na sah paae sharaaron mein to patthar bhi chaTak kar TuuT jaataa hai maza vaise to dil ko dil se Takraane mein hai be-had ye shisha to zaraa si Thes paa kar TuuT jaataa hai larazte lab kisi ke main labon se thaamne ko thaa buraa ho khvaab kaa chaahe jahaan par TuuT jaataa hai tahammul rakh agar dil mein tire rishton ki 'azmat hai ki har dhaagaa ziyaada khinchne par TuuT jaataa hai mare qadmon ki aahaT se laraz uThtaa hai mai-khaana mire honTon tak aate aate saaghar TuuT jaataa hai koi aasaan nahin shaahin ke jaise aasmaan chhunaa havaa ke zor se 'dilshaad' shahpar TuuT jaataa hai"

"aadmi bedaar honaa chaahiye saahib-e-kirdaar honaa chaahiye aasmaan aa jaaegaa zer-e-qadam hausla-bardaar honaa chaahiye zabt honaa chaahiye misl-e-zamin 'azm ko kohsaar honaa chaahiye maut ko madd-e-nazar rakhte hue zindagi se pyaar honaa chaahiye aazmaaish hai junun-e-shauq ki raasta pur-khaar honaa chaahiye vasl ki chaahat baDhaataa hai yahi hijr se bhi pyaar honaa chaahiye"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"