kabhi to aate vo baalaa-e-baam kah denaa — Al

"haae nairang-e-junun par miraa qurbaan honaa fasl-e-gul dekh ke ghar kaa mire viraan honaa chal gai sharm-o-sharaarat mein dam-e-nazzaara aaina dekh ke us shokh kaa hairaan honaa ahl-e-dil kaa vahi imaan hai jise kufr kahein aql-e-kaafir ko huaa jabr musalmaan honaa gham ke ehsaas ko bhule se samajh baiThe majaaz meri hasti ki haqiqat kaa hai uryaan honaa ham to sajda use kahte hain ki sar phir na uThe aur uTThe bhi to khaak-e-rah-e-jaanaan honaa daavar-e-hashr ke aage bhi vafaa ne rokaa us se dekhaa na gayaa meraa pashemaan honaa haal-e-dil puchhte hi rang taghayyur kyon hai baat jab kuchh nahin phir kis liye hairaan honaa meri hasti ki haqiqat nahin puchho 'divaan' fitna-e-hashr mujassam huaa insaan honaa"

"aaj rotaa hai mire dil ko jalaane vaalaa paani ko dauDtaa hai aag lagaane vaalaa kab vo ham ko bhalaa khaatir mein hai laane vaalaa kaun duniyaa mein rahaa naaz uThaane vaalaa kaise miltaa hai zamaane ko nibhaane vaalaa jo milaa ham ko milaa dil kaa dukhaane vaalaa koi naa-fahm kahaan baat ko teri samjhe kyaa hi andaaz hai har baat uDaane vaalaa phir ke dekhaa na kabhi koi ho jiitaa martaa kaisaa be-rahm hai munh pher ke jaane vaalaa khauf kis kaa hai tumhein hiila bahaana na karo aa hi jaataa hai har ik taur se aane vaalaa ai sabaa kah de ki khaamosh rahe murgh-e-sahar kaun hotaa hai vo sote ko jagaane vaalaa pahlu-e-qabr mein ik roz hai sonaa sab ko naaznin koi ho yaa naaz uThaane vaalaa nazaa mein dekh ke 'divaan' ko ro kar bole ruThaa jaataa hai miraa aaj manaane vaalaa"

"unhein talaash karo tark-e-rang-o-bu karke ki main ne dekh liyaa dil lahu lahu karke gharaz ki phail gayaa aur daagh-e-naakaami khajil bahut huaa main ishq mein ghulu karke dimaagh aur moattar kiyaa hai saaqi ne asir-e-zulf-e-muambar ko hu-ba-hu karke miri vajah se baDhaa aur rang-e-khanjar-e-naaz kahaan se sajda kiyaa khuun se vuzu karke miraa hi naqsh-e-tamannaa dikhaa rahaa hai mujhe vafaa kaa aaina mere hi ru-ba-ru karke vo muskuraa to paDaa khair iltijaa sun kar buraa karam kiyaa mahfil mein aabru karke tamaam raat huaa kusht-o-khun tamanna kaa nikaalaa phir hamein mahfil se surkh-ru karke tiri talaash mein kis raah mein bhaTaktaa huun khabar nahin main kahaan khoyaa justuju karke na samjhe daam-e-talab ham ne jab bichhaayaa thaa chaman ke phulon ko ham surat-e-subu karke pahunchne paai na vusat chaman ki sahraa tak vo ik hamin hain jo pahunche hain ku-ba-ku karke chaleinge bazm mein ham aaj un ko chaunkaane jigar ko thaam ke daamaan-e-dil rafu karke kisi ne sach kahaa 'divaan' jhuuT vo samjhe kahin ke ham na rahe un se guftugu karke"

"miri nigaah mein ye charkh-e-akhzari kyaa hai ye mehr-o-maah ye taaron ki rahbari kyaa hai ye naaz-o-ishva-o-tyori sitamgari kyaa hai taDap na jaae agar dil to dilbari kyaa hai banaaein aap mire dil ko aaina lekin samajh to lijiye pahle sikandari kyaa hai vafaaein ho gaiin qurbaan un jafaaon par tumhi bataao ye andaaz-e-dilbari kyaa hai yuun bazm-e-naaz mein aane ke ham nahin qaail na ho salaam-e-mohabbat to haaziri kyaa hai nigaah-e-naaz kaa kushta huaa jab avval-e-shab miri nazar mein ye jaadu-e-saamri kyaa hai janaab-e-shaikh bhi baiThe the but-kade mein kal bahas chhiDi thi unhi se ki kaafiri kyaa hai amal nahin to ye alqaab sab hain naakaara ye shaikh-o-sayyad-o-afghaan-o-jaafri kyaa hai nikaalte hain mujhe bazm-e-ahl-e-sukhnaan se khabar nahin jinhein aadaab-e-shaaeri kyaa hai na qadr-e-laal na kuchh aabru-e-gauhar hai badun tamiz-e-guhar zoam-e-jauhari kyaa hai ye ahl-e-bazm kaa husn-e-samaaat hai 'divaan' vagarna ahl-e-zabaan mein ye shaaeri kyaa hai"

"dosti chand mulaaqaat se aage na baDhi shiddat-e-girya munaajaat se aage na baDhi soz-e-dil dekhiye is bazm mein parvaane kaa zindagi jis ki bas ik raat se aage na baDhi aae vo din mein magar lutf vahi thaa shab kaa zulf-e-shab-rang siyah raat se aage na baDhi ye baDi raat magar vaah re apni qismat ye shab-e-qadr ibaadaat se aage na baDhi din sitaaron ki fanaa raat fanaa zarron ki ye vo zid hai jo musaavaat se aage na baDhi chashm-e-giryaan na kaho ye hai jhaDi saavan ki koi mausam ho ye barsaat se aage na baDhi ek vo pi ke jise sair karein jannat ki ek ye mai jo kharaabaat se aage na baDhi kaise naadaan ho qismat pe ho baiThe bekaar bas yahi aql khayaalaat se aage na baDhi pahle apni to haqiqat zaraa samjho 'divaan' ye vo miTTi hai jo auqaat se aage na baDhi"

"jin ke achchhe hain sanam un ke karam achchhe hain un ke achchhe hain karam jin ke sanam achchhe hain tere kuche ke maze kab ko samajhtaa vaaiz us ki taskin ke liye zikr-e-iram achchhe hain justuju kijiye kitni hi nahin milte vo haan unhein milte hain bas jin ke karam achchhe hain kaam aaein bhi kisi ke to na ehsaan rakhein ahl-e-duniyaa se to patthar ke sanam achchhe hain dil mein kamtar jinhein hone kaa hai ehsaas vahi sab se kahte hain vo duniyaa mein ki ham achchhe hain yuun to ginti mein hazaaron hain bhari khubi magar kaam duniyaa ke agar aaein to ham achchhe hain khugar-e-rasm-e-sitam main huaa 'divaan' ab to al-gharaz apne liye ahl-e-sitam achchhe hain"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kyaa apne shahr mein koi aisaa makaan hai samjhun jise ki asl mein vo ik jahaan hai DhunDo haqiqat is mein na afsaana hi koi is kaa bayaan kuchh nahin us kaa bayaan hai apnaa shi'aar ab hai faqat amn-dushmani ye aur baat faakhta apnaa nishaan hai likhne ko ek harf na kahne ko ek lafz yuun to qalam hai haath mein munh mein zabaan hai vo lams jis ke baa'd zamaane guzar gae vo lams ab bhi taaza hai ab bhi javaan hai ho jaaegaa yaqin sabhon kaa hi kal jo aaj meraa yaqin aur sabhon kaa gumaan hai shatranj ki bisaat ki thi apni mez par shatranj ki bisaat ki saaraa jahaan hai"

"charaaghon se kuchh to churaayaa gayaa hai jo thi aag us ko bujhaayaa gayaa hai likhaa thaa jinhein sirf apne lahu se mire un khaton ko jalaayaa gayaa hai hazaaron daf'a us ne ki bevafaai mujhe bevafaa kyon bataayaa gayaa hai mujhe khud nikalnaa paDaa apne ghar se ye mat sochnaa ki bhagaayaa gayaa hai khabar ye mili hai ki mere hi ghar mein kisi ghair ko ab basaayaa gayaa hai mujhe hi sataa kar mujhe hi rulaa kar ye ilzaam mujh par lagaayaa gayaa hai tumhein kyaa bataaun mohabbat mein 'raavat' mujhe kis qadar aazmaayaa gayaa hai"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"