khayaal-e-anjaam-e-aarzu thaa ki ek jhonkaa thaa tez lu kaa — Ehsan Darbhangavi

"khalish bakhshi tapish bakhshi gudaaz apnaa diyaa main ne mizaaj-e-husn ko bhi kar diyaa gham-aashnaa main ne khirad ne chaarasaazi ki junun ne rahnumaai ki baDi mushkil se paayaa saaya-e-zulf-e-rasaa main ne khajil huun main ki ehsaas-e-faraaghat chhin kar tum se gham-e-aaraaish-e-kaakul tumhein kyon de diyaa main ne havaaein tund mausam naa-muvaafiq baaghbaan barham ajab aalam mein rakkhi hai nasheman ki binaa main ne ilaaj-e-dard-e-dil mushkil thaa lekin ho gayaa aasaan mohabbat ko khudi kaa ik nayaa nuskha diyaa main ne main kahtaa thaa ki aql-o-ishq mein rishta nahin mumkin magar ab sochtaa huun ye garebaan kyon siyaa main ne khudaa kaa shukr hai 'ehsaan' is daur-e-tanaffur mein faraaham kar liye hain chand arbaab-e-vafaa main ne"

"shauq-e-nazzaara jo sargarm-e-nazar hotaa hai jalva-gar husn ba-andaaz-e-digar hotaa hai ho mubaarak ye tiri parda-nashini tujh ko yaad ye bhi rahe divaar mein dar hotaa hai jhuuT phir jhuuT hai lekin ye haqiqat hai ki jhuuT purkashish hotaa hai aur zud-asar hotaa hai jis kharaabe mein paDaa huun use ghar kaise kahun dar-o-divaar salaamat hon to ghar hotaa hai tu hai vo nakhl gul-afshaan hai jo har rahrav par main huun vo peD jo be-barg-o-samar hotaa hai us ki bedaad-gari din ke ujaale mein kahaan bol andhere kaa baDaa taa-ba-sahar hotaa hai vaadi-e-yaad hai aur paa-e-tasavvur 'ehsaan' dekhiye kis tarah maazi kaa safar hotaa hai"

"main takhliq-e-sharar kartaa huun apne soz-e-pinhaan se main parvaana nahin jo aag luun har sham-e-sozaan se kiyaa vahshat ne aql-o-ishq mein ik rabt-e-nau paidaa gae vo din ke divaane ulajhte the garebaan se na jaane imtihaan hai aaj kis ki naa-khudaai kaa ki jo bhi mauj uThti hai vo baDh jaati hai tufaan se kashish manzil ki daaman khinchti thi varna mushkil thaa guzarnaa fasl-e-gul mein be-niyaazaana gulistaan se kahein kyaa ham kahaan aa ke tire vahshi ne dam toDaa khirad samjhaa-bujhaa ke le to aai thi bayaabaan se ba-qaul ustaad ke 'ehsaan' hai suunaa dil kaa kaashaana chalo thoDi si raunaq maang laaein bazm-e-jaanaan se"

"shikan jabin pe na laae nazar jhukaa ke chale khudi ki laash uThaani hi thi uThaa ke chale ye mai-kada hai yahaan laghzishon se raunaq hai koi bahak ke chale koi laDkhaDaa ke chale Thahar gae to zamaane ko saath Thahraayaa chale to hosh uDaate hue havaa ke chale gham-e-hayaat ko samjhe the ahl-e-dil bhaari hamein hai naaz ki ye bojh bhi uThaa ke chale vo baada-khvaar nahin aur kuchh hai ai saaqi sharaab pi ke jo maanind paarsaa ke chale rah-e-junun mein hazaaron the ham-safar lekin charaagh le ke ham hi saamne havaa ke chale vo jaam-e-mai ho ki ho jaam-e-angabin 'ehsaan' chale jo daur bhi vo zarf aazmaa ke chale"

"vo kyaa samjhe nazar jis ki faqat sud-o-ziyaan tak hai ki ye saudaa mohabbat kaa hisaab-e-dostaan tak hai mire naqd-o-nazar tak hai mire husn-e-bayaan tak hai tumhaari daastaan mein rang meri daastaan tak hai haram se bhi hai aage yaa faqat ku-e-butaan tak hai khudaa jaane maqaam-e-justuju-e-dil kahaan tak hai mohabbat in lavaazim par qanaaat kar nahin sakti ki in sajdon ki manzil tere sang-e-aastaan tak hai dilon kaa muztarib jazba nazar kaa munfail shikva miri hairat tiraa ishva kinaayon ki zabaan tak hai ye kis shiddat ki jumbish hai hijaabaat-e-tajalli mein ki ik mailaan-e-betaabi zamin se aasmaan tak hai milegi raushni 'ehsaan' nazar ki gard to pochho ki ye saaraa andheraa bas ghubaar-e-kaarvaan tak hai"

"zabaan-e-mai-kada mein jis ko mai-kash jaam kahte hain use ham apne dil kaa dusraa ik naam kahte hain hadis-e-zulf-o-rukh kyaa haal subh-o-shaam kahte hain gham-e-jaanaan ke parde mein gham-e-ayyaam kahte hain tabassum ne kahi thi daastaan aaghaaz-e-ulfat ki suno ab aansuon se qissa-e-anjaam kahte hain tumhaari ankhDiyon mein hai sahar gangaa ke saahil ki magar mai-khvaar us ko mai-kade ki shaam kahte hain tiri zulf-e-siyah se khaal-e-rukh kaa jo bhi rishta ho asiraan-e-mohabbat daana zer-e-daam kahte hain tire dard-e-mohabbat ko zamaana ik maraz kah le magar ham to ilaaj-e-gardish-e-ayyaam kahte hain dil-e-afsurda ko 'ehsaan' tum sham'-e-sahar kah lo magar ahbaab to is ko charaagh-e-shaam kahte hain"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"