khoTon ko bhi kharaa bataanaa paDtaa hai — Fani Jodhpuri

"khushi ki chehre pe gham kaa jalaal saath liye hayaat milti hai par intiqaal saath liye bulandiyon pe sabhi aa ke bhuul jaate hain uruuj aataa hai lekin zavaal saath liye vo khuun aankhon se ronaa amal puraanaa hai ab ashk bahte hain aankhon ki khaal saath liye kai jami hui partein udheD Daalegaa ye mujh mein kaun hai utraa kudaal saath liye khabar ye ghol na de machhliyon ko paani mein machhere aaeinge kal subh jaal saath liye yahaan pe chhoD diyaa to javaab Das leinge main lauT jaaungaa apnaa savaal saath liye vo peT ke liye kaafi nahin hai ab 'faani' tu jaa rahaa hai jo rizq-e-halaal saath liye"

"dekh bhaal kar sambhal sambhal kar aate hain ham tak chehre umr badal kar aate hain jame hain jo chehre aankhon ki koron pe aao un ko giit ghazal kar aate hain jab kirnein paani pe dastak deti hain lahron pe girdaab uchhal kar aate hain tum jaise ham lagne lageinge Thahro to ham bhi apnaa khuun badal kar aate hain gulshan se mujh tak aane mein havaa ke haath jaane kitne phuul masal kar aate hain 'faani' jaise kuchh chehre baazaaron mein apni anaa har roz nigal kar aate hain"

"ye sahraa meraa hai jhelam chanaab us ki taraf turaab meri taraf aur aab us ki taraf na jaane kis ne banaai hai doghli tasvir hain khaar meri taraf aur gulaab us ki taraf zabaan meri hai alfaaz hain mire lekin hai baat-chit kaa lab-o-labaab us ki taraf miri ghazal ke muqaddar mein pyaas aai hai kashid ki hui umda sharaab us ki taraf koi muamma kabhi is tarah bhi ho maulaa savaal meri taraf huun javaab us ki taraf yuun apnaa naama-e-aamaal kar liyaa taqsim gunaah meri taraf hain savaab us ki taraf zarur puchhungaa taqsim karne vaale se rakhaa hai kis liye saaraa shabaab us ki taraf kisi ne naam se mere uchhaalaa jab patthar ubharne lag gayaa ik inqalaab us ki taraf jo khud se puchhaa ki 'faani' main jaaun kis raste ishaaraa karne lagi hai rikaab us ki taraf"

"bahut sunaa thaa ki khultaa hai par nahin khultaa khudaa ke vaaste bande kaa ghar nahin khultaa vo ek sher jo khultaa hai saari mahfil pe vo jis pe khulnaa hai us pe magar nahin khultaa hamaare qad ke mutaabiq jise banaayaa thaa vahi vo dar hai jo baalisht-bhar nahin khultaa bane hue hain ajaaeb-gharon ki zinat ham par apne vaaste apnaa hi dar nahin khultaa tumhein pahunchnaa hai 'iqbaal' 'mir' 'ghaalib' tak magar vo raasta shaayad idhar nahin khultaa kare ki minnatein karte hain ek muddat se magar nasib mein apne safar nahin khultaa savaal dastakein de ki hue fanaa 'faani' jahaan javaab hai bas vo hi dar nahin miltaa"

"chalan is doghli duniyaa kaa gar manzur ho jaataa vo mujh se duur ho jaataa main us se duur ho jaataa hunar haathon se chikne kaa bachaa kar le gayaa mujh ko bharose paanv ke rahtaa to main maazur ho jaataa zamaane-bhar ki baaton ko agar dil se lagaa letaa jahaan pe dil dhaDaktaa hai vahaan naasur ho jaataa safar karte hue apnaa haTaa kar aankh se paTTi main sang-e-mil jo paDhtaa thakan se chuur ho jaataa ye 'faani' dil ki suntaa hai tabhi gumnaam hai ab tak agar ye zehn ki suntaa bahut mashhur ho jaataa"

"laalach se aur jaur-o-jafaa se nahin bani apni zamin vaale khudaa se nahin bani khushiyon ke saath rah na sake ek pal kabhi yaani charaaghiyon ki havaa se nahin bani sunne ki had talak use ik baar kyaa sunaa kaanon ki phir kisi bhi sadaa se nahin bani apni anaa ki ret pe apne usuul pe paalaa vo dard jis ki davaa se nahin bani ham ne isi zamin pe 'faani' khilaae phuul muddat se jis zamin ki ghaTaa se nahin bani"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"Tuut kar ab sanvar gayaa huun main is tarah se bikhar gayaa huun main jo tire naam ki gali hai vo us gali se guzar gayaa huun main yaadein teri sameT laayaa huun aaj jab se udhar gayaa huun main khud mukarnaa sikhaa diyaa us ne phir kahaa ki mukar gayaa huun main kal talak jo na kar sakaa thaa main aaj vo kaam kar gayaa huun main yuun kahin main nahin Thahartaa par tere dar par Thahar gayaa huun main"

"bistar-e-karb pe jab niind jalaai main ne tab kisi khvaab ki buniyaad uThaai main ne zakhm aise the ki har shakhs ke aage rakkhe baat aisi thi ki khud se bhi chhupaai main ne hurmat-e-gham ke liye khud ko aziyyat bakhshi phir usi dard se taskin bhi paai main ne main ne zakhmon ko kuredaa unhein taaza rakkhaa tab kahin dasht mein ki naghma-saraai main ne apni khiDki se yunhi khud ko pukaaraa kal shab aur phir khud ko vo aavaaz sunaai main ne jaane vaale se rag-e-jaan kaa bhi rishta thaa 'samir' ye samajhne mein bahut der lagaai main ne"

"zindagi dushvaar hogi ye kabhi sochaa na thaa vo bagule gham ke uTThe jin kaa andesha na thaa saamne tum aa gae ho to bataa duun jaan-e-jaan jaise dil dhaDkaa thaa ab ki vaise dil dhaDkaa na thaa ye iraada kar liyaa thaa ham na bichhDeinge kabhi TuTeinge ik pal mein rishte ye kabhi sochaa na thaa yaad-e-maazi miT rahi hai vaqt ki raftaar se ab tasavvur mein hamaare koi bhi chehra na thaa sakht hairat ho rahi hai dekh kar apnaa vajud dhuup mein the sab ke saaye par miraa saayaa na thaa shauq-e-manzil dekh meri dekh meraa hausla shahr-e-dil ke raaston mein main kabhi Thahraa na thaa 'qalb' ko sahraa-navardi raas kyaa aati bhalaa vo kabhi aavaargi mein dar-ba-dar bhaTkaa na thaa"

"jahaan-e-dard-o-gham hai aur main huun tiraa naqsh-e-qadam hai aur main huun kisi ki aankh nam hai aur main huun vufur-e-shauq kam hai aur main huun mujhe hai daulat-e-kaunain haasil mire rab kaa karam hai aur main huun main apne aap ko pahchaantaa huun miraa apnaa bharam hai aur main huun yahi kyaa kam hai duniyaa-e-vafaa mein mujhe ehsaas-e-gham hai aur main huun kisi ki yaad kaa ehsaan hai mujh par sukun-e-dil baham hai aur main huun mujhe 'mahmud' koi Dar nahin hai miraa apnaa qalam hai aur main huun"