koi paDaav na ghar raaste mein aaegaa — Kunal Danish

"safar ke aakhiri manzar pe khaak Daaleinge sab ek roz mire sar pe khaak Daaleinge hamaare baa'd ye manzil unhein milegi jo har ek miil ke patthar pe khaak Daaleinge abhi talak to muqaddar ne khaak Daali hai ham is ke baa'd muqaddar pe khaak Daaleinge saDak ki dhuul havaaon se roz kahti hai chalo ki aaj samundar pe khaak Daaleinge zamin aise parindon ke naaz uThaaegi jo aasmaan ki chaadar pe khaak Daaleinge tamaam jism ki miTTi sameT kar 'daanish' ham ek dhuup ke paikar pe khaak Daaleinge"

"kuchh aise masale sar par khaDe hain bahaadur log bhi Dar kar khaDe hain vo jin ko dekh kar dil baiThtaa hai in aankhon mein vahi manzar khaDe hain unhein baisaakhiyaan di jaa rahi hain jo bachche apne pairon par khaDe hain makaan maalik ne chaabi chhin li aur ham apne jism ke baahar khaDe hain jinhein ham aaina samjhe the 'daanish' vo le kar haath mein patthar khaDe hain"

"mashaqqaton kaa havaala nahin utartaa hai hamaare haath se chhaalaa nahin utartaa hai utaare jaate hain aankhon mein aise aise azaab gale se ek nivaala nahin utartaa hai vo maahtaab hai jis din se qaid kamre mein hamaari chhat pe ujaalaa nahin utartaa hai hamaare haal pe naa-binaa log rone lage bas us ki aankh kaa jaalaa nahin utartaa hai main jab se bhaaiyon ke pichhe pichhe chalne lagaa kisi ki piiTh pe bhaalaa nahin utartaa hai zamin pe roz utarti hain aafatein 'daanish' magar utaarne vaalaa nahin utartaa hai"

"khabar nahin hai abhi ghar jalaane vaalon ko nae makaan mile hain puraane vaalon ko safar mein raah ke jangal kaa koi khauf nahin gharon ki fikr lagi hai kamaane vaalon ko ham un ke ishq mein hain aur unhein khabar bhi nahin khabar ye hai ki khabar hai zamaane vaalon ko bahaao ashk ki phir se lahu bahaane kaa bahaana mil hi gayaa hai bahaane vaalon ko"

"us ki marzi ke binaa us ki suhulat ke baghair aaj ik shakhs se milnaa hai ijaazat ke baghair ham tire gham se pareshaan bahut hain lekin niind aati hi nahin yaad ki lazzat ke baghair raat-bhar koi nai fikr lagi rahti hai din guzartaa hi nahin sar pe musibat ke baghair us ko jaane se na rokeinge ki ham jaante hain jang jiiti hi nahin jaati shahaadat ke baghair haan yahi khubi zaruri hai vagarna 'daanish' aadmi aadmi kaise ho mohabbat ke baghair"

"baaton baaton mein safar kaaT rahe hain ham log raat mushkil hai magar kaaT rahe hain ham log apni aankhon ki tabaahi se Dare hain itne har nae khvaab ke par kaaT rahe hain ham log apni chikhon kaa galaa ghonT ke khaamoshi se apni aavaaz kaa sar kaaT rahe hain ham log itni shiddat se hamein dhuup jalaati bhi nahin jitni mehnat se shajar kaaT rahe hain ham log in buzurgon ki duaaon se zamaane-bhar ki bad-duaaon kaa asar kaaT rahe hain ham log"

"tujh ko khiffat se bachaa luun paani tishnagi apni chhupaa luun paani khaak uDti hai har ik chehre par kis ki aankhon se nikaalun paani dhuup dariyaa pe nazar rakhti hai tujh ko kuuze mein chhupaa luun paani uDte phirte hain saron par baadal khvaab aankhon mein basaa luun paani roz bachchon ko sulaa duun yunhi roz patthar ko ubaalun paani aag se kheltaa hai kal mujh ko aa tujhe apnaa banaa luun paani khaarzaaron pe chalun nange paanv khushk dharti ki duaa luun paani sabr ki had bhi to kuchh hoti hai kitnaa palkon pe sambhaalun paani bhuul jaaun na kahin tairaaki kyuun na kashti hi jalaa luun paani apni vahshat kaa ik izhaar sahi kar ke sard aag jalaa luun paani zakhm ho phuul ho yaa angaara ho jo raushan to bulaa luun paani shart hai teri rifaaqat varna vaqt ki aag mein Daalun paani aag matlub-e-lab-e-tishna hai main tujhe kaise bulaa luun paani chashm-e-ahbaab jo ho khushk 'ataa' khuun ko apne banaa luun paani"

"dam-ba-khud meri anaa teri adaa bhi dam-ba-khud tere pahlu mein rahaa main aur rahaa bhi dam-ba-khud dekhiye pahle lahu Tapke ki phailein kirchiyaan dam-ba-khud teri nazar bhi aaina bhi dam-ba-khud itnaa sannaaTaa ki jaise avvalin shaam-e-firaaq dam-ba-khud hai aasmaan bhi aur havaa bhi dam-ba-khud yaad hai tujh ko vo pahle lams ki hiddat ki jab rah gai thi dafatan teri hayaa bhi dam-ba-khud ek se aalam mein donon mukhtalif asbaab se dam-ba-khud teraa karam meri duaa bhi dam-ba-khud aisaa lagtaa hai ki donon se nahin nisbat mujhe dam-ba-khud umr-e-ravaan sail-e-fanaa bhi dam-ba-khud khauf-e-tajdid-e-taaluq darmiyaan haail rahaa dam-ba-khud teraa sitam meraa galaa bhi dam-ba-khud yuun gumaan hotaa hai donon ki tavaqqoa ek thi dam-ba-khud teri vafaa meri sazaa bhi dam-ba-khud jab khule meri haqiqat tum vo manzar dekhnaa dam-ba-khud naa-aashnaa bhi aashnaa bhi dam-ba-khud"

"ilaahi mahshar mein bahr-e-pursish jab ek darbaar aam hogaa miri baghal mein suraahi hogi zabaan par teraa naam hogaa nasib tujh ko nahin ye neamat to zahmat-e-tur kar gavaaraa yahaan to hote hain roz jalve kalim tujh ko kalaam hogaa nigah rahe aasmaan pe teri hai taair-e-arsh-aashiyaan tu nazar mein jis ki zamin hogi vahi giraftaar-e-daam hogaa qubul kar markaz-e-haqiqat tiraa makaan laa-makaan hai ai dil majaaz ke daaere mein aakar fuzul paaband-e-naam hogaa harim-e-kaaba-o-dair donon hain qaabil-e-ehtiraam lekin nazaaa-e-baaham ke hon na markaz to phir dili-ehtiraam hogaa tu nashsha-e-zohd kaa hai taalib tujhe kahaan vajd-e-jaavedaani jo rind-e-mast-e-mudaam hogaa vo raazdaar-e-davaam hogaa shuur kahte hain jis ko aaqil vo roz mehvar badal rahaa hai jo aa gayaa jaada-e-junun mein sukun mein us kaa qiyaam hogaa na hongi hal mushkilaat 'aiman' fuzul sab koshishein hain teri khudaa se imdaad ki duaa kar baghair is ke na kaam hogaa"

"yaar ke bhes mein mahbub sitamgar niklaa phuul ham jis ko samajhte the vo patthar niklaa ek roTi ke evaz de gayaa jannat ki duaa mere kuche kaa bhikaari bhi mukhayyar niklaa aaj-kal aankh kaa dekhaa bhi ghalat hotaa hai jis ko samjhe the apaahij vo tavangar niklaa vaqt kamzor ko shah-zor banaa detaa hai shaam ko Duubaa magar subh mein khaavar niklaa ghar badalne se bhi taqdir badal jaati hai siip mein paani paDaa ban ke vo gauhar niklaa jo mire zehn-o-takhayyul mein bahut unchaa thaa us kaa qad taalib-e-duniyaa ke baraabar niklaa jis ke zimme thi mire ghar ki hifaazat 'muztar' dushmanon kaa mire vo shakhs bhi ham-sar niklaa"

"khauf dil mein na tire dar ke gadaa ne rakkhaa din ko kashkol bharaa shab ko sirhaane rakkhaa fikr-e-meaar-e-sukhan baais-e-aazaar hui tang rakkhaa to hamein apni qabaa ne rakkhaa raat fōtpath pe din bhar ki thakan kaam aai us kaa bistar bhi kyaa sar pe bhi taane rakkhaa khauf aayaa nahin saanpon ke ghane jangal mein mujh ko mahfuz miri maan ki duaa ne rakkhaa ye alag baat samundar pe vo barsi 'saajid' aur kisi khet ko pyaasaa na ghaTaa ne rakkhaa"

"dard kab dil mein mehrbaan na rahaa haan magar qaabil-e-bayaan na rahaa ham jo gulshan mein the bahaar na thi jab bahaar aai aashiyaan na rahaa gham garaan jab na thaa garaan thaa mujhe jab garaan ho gayaa garaan na rahaa doston kaa karam maaaz-allaah shikva-e-jaur-e-dushmanaan na rahaa bijliyon ko duaaein detaa huun dosh par baar-e-aashiyaan na rahaa"