koi shikva to zer-e-lab hogaa — A G Josh

"har mulaaqaat mein lagte hain vo begaane se faaeda kyaa hai bhalaa aison ke yaaraane se kuchh jo samjhaa to mujhe sab ne hi aashiq samjhaa baat ye khuub nikaali mire afsaane se zindagi apni nazar aane lagi sirf saraab kabhi guzre jo dil-e-zaar ke viraane se ek pal bhi na Thahar paaoge ai sang-zano koi patthar kabhi lauT aayaa jo divaane se tum ko marnaa hai to marnaa mire gul hone par shama kahti rahi shab-bhar yahi parvaane se phir na dekhaa tujhe ai 'josh' sukun se baiThaa jab se uTThaa hai tu is shokh ke kaashaane se"

"itnaa ehsaan to ham par vo khudaaraa karte apne haathon se jigar chaak hamaaraa karte ham ko to dard-e-judaai se hi mar jaanaa thaa chand roz aur na qaatil ko ishaara karte le ke jaate na agar saath vo yaadein apni yaad karte unhein aur vaqt guzaaraa karte zindagi milti jo sau baar hamein duniyaa mein ham to har baat ise aap pe vaaraa karte 'josh' dhundlaataa na hargiz ye miraa shisha-e-dil gard us ki vo agar roz utaaraa karte"

"jiinaa kab tak muhaal hogaa aakhir ik din visaal hogaa gar na TuuTe ye shisha-e-dil teraa husn kamaal hogaa tum to taDpaa ke jaa rahe ho dil ye kaise bahaal hogaa chhune vaalaa tiri jabin ko meraa dast-e-khayaal hogaa tere lab pe rahe khamoshi mere lab pe savaal hogaa us ki nibhti bhi hai kisi se 'josh' kyaa teraa haal hogaa"

"maut bhi meri dastaras mein nahin aur jiinaa bhi apne bas mein nahin aag bhaDke to kis tarah bhaDke ik sharar bhi to khaar-o-khas mein nahin qatl-o-ghaarat khuli fazaa kaa nasib aisaa khatra koi qafas mein nahin kyaa sune koi daastaan-e-vafaa farq ab ishq aur havas mein nahin zulm ke saamne ho sina-sipar hausla itnaa ham-nafas mein nahin 'josh' vo jo kahein karo taslim faaeda kuchh bhi pesh-o-pas mein nahin"

"mumkin hai shab-e-hijr duaa kaa na asar ho hai raat vo kyaa raat ki jis ki na sahar ho Thukraa ke chale jaanaa hai bar-haq tumhein lekin bas rakhnaa khayaal itnaa jahaan ko na khabar ho vo shab jo sitaaron se bhari ho to hamein kyaa pahlu mein agar tere miri shab na basar ho garjaa hai baDe zor se baadal zaraa dekho bijli se giri jis pe kahin meraa na ghar ho jivan hai safar 'josh' ye taslim hai lekin mahbub kaa ho saath to kyaa khuub safar ho"

"na sochnaa ki zamaane se Dar gae ham bhi tiri talaash mein ghairon ke ghar gae ham bhi churaa liin ham se bhi us khud-parast ne aankhein dil-e-habib se aakhir agar gae ham bhi pasijaa dil na kisi kaa hamaare ashkon se har aastaan pe liye chashm-e-tar gae ham bhi jo dekhaa kaliyon ko tujh par nisaar hote hue to rang ban ke fazaa mein bikhar gae ham bhi jab us ki zauq-e-nazar kaa huaa bahut charchaa vufur-e-shauq se ek din sanvar gae ham bhi bahut se ishq ki raahon mein pul-siraat aae tumhaaraa naam liyaa aur guzar gae ham bhi muhaal thaa ki ham ai 'josh' zinda rah sakte firaaq-e-yaar mein ik roz mar gae ham bhi"

"phir khuun mein vahshat raqsaan hai tajdid sitam karne ke liye ik taaza zakhm ki khvaahish hai ik sadma kam karne ke liye ham din-bhar duniyaa-daari mein hans hans ke baatein karte hain phir saari raat pighalte hain ik ashk raqam karne ke liye vo vasl ki jis ne ham donon ko yaksar be-buniyaad kiyaa ab fursat hai aa mil baiThein us vasl kaa gham karne ke liye ik kaari zakhm ki chaahat ne kyaa kyaa na hamein gulzaar kiyaa ham kis kis se mansub hue ik hijr baham karne ke liye insaan ke jiine marne ke majburi ke mukhtaari ke ye saare khel zaruri hain taamir adam karne ke liye"

"chaand bhi khoyaa khoyaa saa hai taare bhi khvaabida hain aaj fazaa ke bojhal-pan se lahje bhi sanjida hain jaane kin kin logon se is dard ke kyaa kyaa rishte the hijr ki is aabaad saraa mein sab chehre naadida hain itne barson baad bhi donon kaise TuuT ke milte hain tu hai kitnaa saada-dil aur ham kitne pechida hain sun jaanaan ham tark-e-taalluq aur kisi din kar leinge aaj tujhe bhi ujlat si hai ham bhi kuchh ranjida hain kaanon mein ik sargoshi hai be-maani si sargoshi aankhon mein kuchh khvaab saje hain khvaab bhi umr-rasida hain ghar ki vo makhdush imaarat gir ke phir taamir hui ab aangan mein peD hain jitne saare shaakh burida hain is basti mein ek saDak hai jis se ham ko nafrat hai us ke niche pagDanDi hai jis ke ham girvida hain"

"raftagaan ki sadaa nahin main huun ye tiraa vaahima nahin main huun tere maazi ke saath dafn kahin meraa ik vaaqi'a nahin main huun kyaa milaa intihaa-pasandi se kyaa main tere sivaa nahin main huun ek muddat mein jaa ke mujh pe khulaa chaand hasrat-zada nahin main huun us ne mujh ko muhaal jaan liyaa main ye kahtaa rahaa nahin main huun main hi 'ujlat mein aa gayaa thaa idhar ye zamaana nayaa nahin main huun meri vahshat se Dar gae shaayad yaar baad-e-fanaa nahin main huun main tire saath rah gayaa huun kahin vaqt Thahraa huaa nahin main huun gaahe gaahe sukhan zaruri hai saamne aaina nahin main huun sarsari kyuun guzartaa hai mujh se ye miraa maajraa nahin main huun us ne puchhaa kahaan gayaa vo shakhs kyaa bataataa ki thaa nahin main huun ye kise dekhtaa hai mujh se udhar tere aage khalaa nahin main huun"

"dast-kash hon na mai-e-gul ke khush-aashaam abhi ki labaalab hain mah-o-mehr ke do-jaam abhi zehn mein saaqi hai mai-khaana hai hai jaam abhi hosh kahtaa huun ise hosh kaa kyaa kaam abhi mujh ko darkaar na hai kufr na islaam abhi sidhe sidhe hi chale aate hain paighaam abhi tu bhi baaqi tiri rahmat bhi hai baaqi saaqi rahne de hai mai-e-isyaan se baDaa kaam abhi khaal-o-gesu se hai ye silsila-e-raaz-o-niyaaz daana sad-daana ho ye daam ho sad-daam abhi ziist ke khvaab ki taabir abhi baaqi hai ibtidaa dekh chuke hai magar anjaam abhi rah-rav-e-ishq abhi duur hai mearaaj-e-habib rashk-e-manzil na huaa raah mein har gaam abhi zarra-zarra hai ik aatish-kada-e-nur kalim dekh agar tu na ho aatish-zada-e-baam abhi imtiyaaz-e-man-o-tu raaz-e-khafi hai lekin khaasgaan ke liye kahtaa huun sar-e-aam abhi aks ko zo'm hai be-misli-e-rang-o-bu kaa turfa ye hai ki muqaabil hai vo gulfaam abhi raaz-goi tiri 'aiman' hai gunaah-e-akbar maang le afv ki us kaa hai karam aam abhi"

"baad-e-shimaal chalne lagi ang ang mein lipTaa hai kaun mujh se ye patjhaD ke rang mein khvaahish ke kaarobaar se bachnaa muhaal hai utregaa tu bhi saath mire is surang mein main aandhiyon mein haath bhi pakDun tiraa to kyaa ik shaakh-e-be-siper huun havaaon ki jang mein 'raanjhaa' main 'ahd-e-nau kaa qabilon mein baT gayaa to 'hir' ban ke pi na saki zahr jhang mein garmaa sakin na chaahatein teraa kaThor jism har ek jal ke bujh gai tasvir sang mein aage 'musavvir' aag 'aqab mein hai ye sadaa pichhe na muD ke dekhnaa is dasht-e-sang mein"

"tifli piiri o naujavaani hech tiin din ki hai zindagaani hech umr-e-do-roza par ghamanD itnaa munimon ki hai lan-taraani hech raat thoDi hai aao pyaar karein subh ko hogi ye kahaani hech chaar din ki bahaar hai saari ye takabbur hai yaar-e-jaani hech dil ke haathon 'haqir' jhagDon mein meri guzri sadaa javaani hech"