main kah rahaa huun sar-e-aam barmalaa baabaa — Ashraf Ali Ashraf

"inqilaabi soch shaair kaa qalam apni jagah aap ki angDaaiyaan zulfon kaa kham apni jagah jaantaa huun main tumhaare baatini kirdaar ko jubba-o-dastaar-e-aali-mohtaram apni jagah ham rahe apni anaa mein kho na badli aap ne aap bhi apni jagah hain aur ham apni jagah aap ki har baat ko taslim farmaayaa gayaa aap ke farmaan ke sab besh-o-kam apni jagah us ke aane ki lagan mein ji rahaa huun is tarah kaan aahaT par lage aTkaa hai dam apni jagah su-e-maqtal jab chalaa 'ashraf' uThaa kar zindagi sar-kashida thaa miri aankhon kaa nam apni jagah"

"jo hazrat shaikh farmaaein mohabbat sabhi ko khuub samjhaaein mohabbat zaruri to nahin ham zindagi mein mohabbat kaa samar paaein mohabbat mujhe gheraa huaa hai nafraton ne na daaein hai na hai baaein mohabbat hamaaraa mashvara hai har kisi ko ki nafrat bech kar laaein mohabbat mujhe haathon ko un ke chumnaa hai vo khush hain ki jo jo paaein mohabbat nahin gar laazmi to ikhtiyaari nayaa mazmun rakhvaaein mohabbat vo jis ke gaal pe chhoTaa saa til hai usi laDki ko samjhaaein mohabbat zamin-o-aasmaan ko chhaan maaraa kahaan se DhunD kar laaein mohabbat chalo ham jaa ke dilli mein rahein ab ugaaein pyaar aur khaaein mohabbat"

"kisi khataa se hamein inhiraaf thoDi hai hamaaraa khud se koi ikhtilaaf thoDi hai basaaraton ke alam-daar hain yahaan kuchh log har ik nazar pe andheraa ghilaaf thoDi hai kabhi to ham bhi tumhaaraa suraagh paa leinge tumhaaraa shahr koi koh-e-qaaf thoDi hai ye aaina tumhein tum saa dikhaa nahin saktaa agarche saaf hai utnaa bhi saaf thoDi hai zabaan-e-khalq ko naqqaara-e-khudaa samjho ye jaante hain sabhi inkishaaf thoDi hai zamin kaa ghaav hai miTTi se bhar hi jaaegaa hamaare dil ki tarah kaa shigaaf thoDi hai ham ehtijaaj bapaa kar rahe hain apne khilaaf hamaaraa shahr hamaare khilaaf thoDi hai isi liye to nahaataa hai baarishon mein vajud hai aabdida magar e'tiraaf thoDi hai"

"ham bhi kuchh kuchh kharaab ho jaaein duur saare hijaab ho jaaein chaand baadal ki oT se nikle gham ye saare naqaab ho jaaein kuchh to apni nazar bhi aavaara kuchh ab vo maahtaab ho jaaein kaun phir un se dil ki baat kahe jab vo aali janaab ho jaaein chhu ke niklein jo tere honTon ko lafz saare gulaab ho jaaein dhaandli kar ke hi sahi lekin ham tiraa intikhaab ho jaaein vo to devi hai husn ki 'ashraf' us ko dekhe savaab ho jaaein"

"hai aaine ke muqaabil jo hu-ba-hu kyaa hai ye meraa ruup nahin hai to jalva-ru kyaa hai mire badan ki ragon mein sharaab ki surat jo sar paTaktaa guzartaa hai ju-ba-ju kyaa hai munaafarat ke khasaare mein khush-khiraam rahe sarisht-e-aadam-e-khaaki mein khu-ba-khu kyaa hai magan hai aur kisi soch mein miraa vijdaan main apne aap se makhfi huaa huun tu kyaa hai hatak hai baada-kashon ki baDhaaein dast-e-sharaab nazar se uTh nahin paae to phir subu kyaa hai hamein to koi tafarruq nazar nahin aataa saraab-e-mehr-e-tamannaa yaa maah-ru kyaa hai tumhaaraa naam hai 'ashraf' sukhan-taraaz magar tumhin kaho ki ye andaaz-e-guftugu kyaa hai"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"

"kal shab dil-e-aavaara ko siine se nikaalaa ye aakhiri kaafir bhi madine se nikaalaa ye fauj nikalti thi kahaan khaana-e-dil se yaadon ko nihaayat hi qarine se nikaalaa main khuun bahaa kar bhi huaa baagh mein rusvaa us gul ne magar kaam pasine se nikaalaa Thahre hain zar-o-sim ke haqdaar tamaashaai aur maar-e-siyah ham ne dafine se nikaalaa ye soch ke saahil pe safar khatm na ho jaae baahar na kabhi paanv safine se nikaalaa"

"Tuut kar ab sanvar gayaa huun main is tarah se bikhar gayaa huun main jo tire naam ki gali hai vo us gali se guzar gayaa huun main yaadein teri sameT laayaa huun aaj jab se udhar gayaa huun main khud mukarnaa sikhaa diyaa us ne phir kahaa ki mukar gayaa huun main kal talak jo na kar sakaa thaa main aaj vo kaam kar gayaa huun main yuun kahin main nahin Thahartaa par tere dar par Thahar gayaa huun main"

"bistar-e-karb pe jab niind jalaai main ne tab kisi khvaab ki buniyaad uThaai main ne zakhm aise the ki har shakhs ke aage rakkhe baat aisi thi ki khud se bhi chhupaai main ne hurmat-e-gham ke liye khud ko aziyyat bakhshi phir usi dard se taskin bhi paai main ne main ne zakhmon ko kuredaa unhein taaza rakkhaa tab kahin dasht mein ki naghma-saraai main ne apni khiDki se yunhi khud ko pukaaraa kal shab aur phir khud ko vo aavaaz sunaai main ne jaane vaale se rag-e-jaan kaa bhi rishta thaa 'samir' ye samajhne mein bahut der lagaai main ne"