miraa dayaar shanaasaa-e-rang-o-nur nahin — Naqqash Ali Balooch

"zindagi maut ki panaah mein hai ye haqiqat miri nigaah mein hai zindagi gham kaa istiaara hai dard jivan ke saal-o-maah mein hai maut ke baad phir se jiinaa hai jaane kyaa kyaa dil-e-ilaah mein hai koi majnun ki aankh se dekhe kis qadar nuur ru-siyaah mein hai itni raftaar raushni ki nahin jitni surat kisi ki aah mein hai mulk-e-kanaan gharq-e-zulmat hai maah-e-kanaan ab bhi chaah mein hai bin laDe jang haarne vaale teraa dushman tiri sipaah mein hai qabr-e-'naqqaash' DhunDne vaalo meri miTTi khudaa ki raah mein hai"

"mizaaj-e-shauq mein maamuriyat kaa azm bhi ho faqat sukun nahin zindagi mein razm bhi ho shab-e-akhir charaaghon ki lau bujhe to vahaan sadaa-e-laa se munavvar tumhaari bazm bhi ho hayaat maut hai andaaz-e-haidari ke baghair satiza-gaah mein harf-e-junun pe jazm bhi ho ba-maa shuur-o-iraada-o-justuju-o-khiraam tire nisaab mein 'naqqaash' baab-e-hazm bhi ho"

"khafi rahaa yaa jali aalam-e-shuhud mein thaa main amr-e-kun se bhi pahle kisi vajud mein thaa kisi sadaa ne barangekhta kiyaa mujh ko vagarna main bhi isi halqa-e-khumud mein thaa mujhe shuur diyaa beasat-e-payambar ne phir is ke baad main allaah ke junud mein thaa mujhe husain ne zarre se maahtaab kiyaa main be-nishaan tamaashaa-e-hast-o-bud mein thaa na jidd-o-jahd-e-musalsal ne soz-o-saaz-e-hayaat misaal-e-shajr zamin-bos main jumud mein thaa andheri raat mein nudrat mili sitaare ko tamaam roz vo Duubaa huaa kabud mein thaa talaash-e-manzil-e-hasti mein khaak-baazi ki miraa maqaam magar qila-e-umud mein thaa mujhe qayaam ke qaabil kiyaa iraade ne main ek umr talak haalat-e-quud mein thaa vo karr-o-far-e-takhayyul ke naashiraan to the magar har ek numaaish mein yaa numud mein thaa main madd-o-jazr-e-takhayyul ko us ke naam karun ki jis kaa zikr hamesha mire darud mein thaa vo takht-e-khaak pe baiThaa vahi qalandar hai ki jis ke saamne jibril bhi sujud mein thaa mataa-e-qaafila-e-ishq jab luTi 'naqqaash' vo mere mulk-e-sitam-kesh ki hudud mein thaa"

"aadmi raushni nahin paae jab talak bandagi nahin paae chaar su ilm ke khazaane hain par bashar aagahi nahin paae taar-e-simaab-o-sozan-e-zar se chaak daaman kaa si nahin paae jaam aab-e-hayaat se pur thaa ek qatra bhi pi nahin paae kitne naadaan the marne vaale sab jaise jiinaa thaa ji nahin paae"

"zulf zanjir-e-paa hui jab se ham asir-e-maaash hain tab se madrason ne banaa diyaa naukar umr saari ganvaai is Dhab se peT ki aag kyon nahin bujhti justuju kar rahe hain ham kab se ham faqat maang kar hi jiite hain kaash ghairat bhi maang lein rab se is ko daulat ne kyaa uThaanaa hai gir gayaa jo hayaa ke markab se khatm-e-quraan hai nekiyon ke liye ham ko matlab nahin hai matlab se shaikh-o-sufi uThaa ke chang-o-rubaab dekh laDne chale hain marhab se tirgi mein jalaa ke diip nae dushmani le rahe hain ham sab se tum ujaalon ki baat mat karnaa tirgi shah ke saath hai ab se chhoD 'naqqaash' harf-e-sachchaai log khaaif hain tere mazhab se"

"qatra huun magar raunaq-e-sahraa huun buraa huun mazlum ke zakhmon kaa masihaa huun buraa huun vo baiat-e-firaun ke qaail hain so achchhe main vaqt ke namrud se uljhaa huun buraa huun taaghut-e-zamaana ko vo dete hain salaami main us ko khataa-kaar jo kahtaa huun buraa huun vo shahr mein karte hain andheron ki tijaarat main zulm ki basti kaa ujaalaa huun buraa huun vo shaah-e-sitam-kaar ke kahte hain qaside main nauha-e-mazlum jo kartaa huun buraa huun vo khaanqahi diin ke pairav hain azal se main aaj talak saahab-e-illaa huun buraa huun 'naqqaash' vahi laa hai mire sher-o-sukhan mein anjaam shahaadat hai main sachchaa huun buraa huun"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"