mire muddaaa-e-ulfat kaa payaam ban ke aai — Ghubaar Bhatti

"zabaan saakit ho qat-e-guftugu ho nazar hi se bayaan-e-aarzu ho jahaan main huun vahaan par tu hi tu ho jahaan tu ho jahaan-e-rang-o-bu ho shahid-e-naaz yuun hi surkh-ru ho shafaq munh par ho daaman par lahu ho vafur-e-yaas o josh-e-ibtilaa mein zabaan par aayat-e-laa-taqnatu ho jo rang-e-gul se Tapkaa hai chaman mein na meri hi tamannaa kaa lahu ho harim-kaaba se bhi mohtaram hai vo dil jis mein ki teri aarzu ho maaaz-allaah pas-manzar chaman kaa na ai dil yuun asir-e-rang-o-bu ho namaaz-e-ishq kuchh aasaan nahin hai jigar ke khuun se pahle to vuzu ho huun khaar-e-raah tak gulshan-ba-daamaan agar tu hi maaal-e-justuju ho 'ghubaar'-e-khasta us kuche se uTh kar na kyuun aavaara har su ku-ba-ku ho"

"tasalli ko hamaari baaghbaan kuchh aur kahtaa hai gulistaan se magar uDtaa dhuaan kuchh aur kahtaa hai baham kuchh saazishein phir ho rahi hain barq-o-baaraan mein har ik taair se lekin aashiyaan kuchh aur kahtaa hai samajhte hain khudaa-maalum kyaa kuchh kaarvaan vaale zabaan mein apni mir-e-kaarvaan kuchh aur kahtaa hai na phulo is tarah se naghma-e-murgh-e-khush-ilhaan par tumhein aavaaza-e-baang-e-azaan kuchh aur kahtaa hai magar mahrum zaahid ho gayaa hai gosh-e-shanvaa se use but-khaane mein husn-e-butaan kuchh aur kahtaa hai ye khush-fahmi ki kuchh samjhe hue hain anjuman vaale magar har ik se rang-e-daastaan kuchh aur kahtaa hai Thahar jaa haan Thahar jaa jaane vaale is ko suntaa jaa ba-haal-e-nazaa teraa nim-jaan kuchh aur kahtaa hai mukhaalif us ke kuchh kuchh aa rahi hain dil ki aavaazein magar ham se hijaab-e-darmiyaan kuchh aur kahtaa hai na rahnaa chaahiye gulshan mein marub-e-khizaan ho kar ki ham se aaj rang-e-gulistaan kuchh aur kahtaa hai"

"jalva-e-husn agar zinat-e-kaashaana bane dastaras shama ko haasil ho to parvaana bane dil na hoshiyaar rahe aur na divaana bane ye tamannaa hai ki khaak dar-e-jaanaana bane husn ai husn ye hai teri karishma-saazi kaaba ban jaae kahin aur kahin but-khaana bane hosh aur kashmakash-e-hosh ilaahi tauba vahi hoshiyaar hai ulfat mein jo divaana bane is tamannaa se main ai ishq khajil hotaa huun dil ki taqdir ki vo husn kaa nazraana bane husn mahsus se hai jalva-e-mutlaq matlub na sahi kaaba to dil-e-maail but-khaana bane mai-parasti kaa muayyan koi meaar nahin jis kaa jo zarf ho saaqi vahi paimaana bane un ki sarshaar nigaahon ke tasadduq kahiye haasil-e-kaif jo paimaana-ba-paimaana bane soz ulfat ke khudaa shama nahin hai na sahi phunk itnaa miri hasti ko ki parvaana bane saaghar-e-dil mein hai kaifiyyat-e-sahbaa-e-alast buund buund us ki na kyuun haasil-e-mai-khaana bane aap ik roz tavajjoh se jo sun lein sar-e-bazm dil ki rudaad kaa har lafz ik afsaana bane aaj mujh ko vo mai-e-hosh-rubaa de saaqi aur to aur dil apne se bhi begaana bane kaash miT miT ke miri hasti-e-naachiz 'ghubaar' khaak ho jaae to khaak-e-dar-e-jaanaana bane"

"tiraa mai-khvaar khush-aaghaaz-o-khush-anjaam hai saaqi ki dil mein yaad teri lab pe teraa naam hai saaqi muhit daur-e-saaghar charkh-e-nili-faam hai saaqi ghulaam-e-chashm-e-maigun gardish-e-ayyaam hai saaqi dil-e-naakaam ko ulfat se teri kaam hai saaqi mohabbat be-niyaaz-e-ibrat-e-anjaam hai saaqi zamaane se alag ho kar mujhe duniyaa-e-ulfat mein tiraa rukh roz-e-raushan zulf teri shaam hai saaqi isi mein aa gai hai khinch ke saaqi ruuh taqvaa ki mataa-e-din-o-imaan qimat-e-ik-jaam hai saaqi khudaa rakkhe tiri zulf-e-moambar ke tasavvur se takhayyul meraa ambar-biz-o-ambar-faam hai saaqi khudaaraa is taraf bhi ik nigaah-e-lutf ho jaae miri hasti hama hasrat hama aalaam hai saaqi hue hain dil pe is se munkashif asraar hasti ke navaa-e-qulqul-e-minaa mujhe ilhaam hai saaqi sharaf teri ghulaami kaa baDi mushkil se miltaa hai zahe-qismat jo teraa banda-e-be-daam hai saaqi azal se taa-abad yunhi rahegaa khaak-e-mai-khaana 'ghubaar'-e-khasta-o-naakaam jis kaa naam hai saaqi"

"ajab inqalaab kaa daur hai ki har ek samt fishaar hai na kahin khirad ko sukun hai na kahin junun ko qaraar hai kahin garm bazm-e-habib hai kahin sard mahfil-e-yaar hai kahin ibtidaa-e-surur hai kahin intihaa-e-khumaar hai miraa dil hai siine mein raushni isi raushni pe madaar hai main musaafir-e-rah-e-ishq huun to ye shama raah-guzaar hai jise kahte hain tiri anjuman ajab anjuman hai ye anjuman koi is mein sokhta-haal hai koi is mein sina-figaar hai ye asar hai ek nigaah kaa ki mizaaj-e-taba badal diyaa jo hamesha shikva-guzaar thaa vo tumhaaraa shukr-guzaar hai ye zaruri kyaa hai ki har bashar rahe naam-o-kaam se baa-khabar magar itnaa jaan chuke hain sab ki takhallus us kaa 'ghubaar' hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"