na tarz-e-dost na rang-e-adu se miltaa hai — Aliuddeen Naved

"aankhon ke kanval lab ke chaman-zaar bahut the divaane magar sair se bezaar bahut the ham log kaDi dhuup ke shaidaai the varna yuun sar ko chhupaane dar-o-divaar bahut the har shakhs ke chehre pe kai chehre the chaspaan tujh jaise tire shahr mein ayyaar bahut the TuuTaa huaa pul ret ki divaar havaa tez lagtaa hai ki basti mein gunahgaar bahut the alfaaz adaa karti rahin bolti aankhein chup rah ke bhi vo maail-e-guftaar bahut the aankhon ke darichon mein hayaa jaag rahi thi soe the kuchh aise ki vo bedaar bahut the vo shakhs to har gaam pe detaa rahaa dhoke tum phir bhi 'naved' us ke parastaar bahut the"

"khumaar shab kaa sahar-dam rahaa hai aankhon mein tumhaari zulf kaa har kham rahaa hai aankhon mein vo din bhi aaegaa aankhon se zakhm Tapkeinge abhi to sirf lahu jam rahaa hai aankhon mein koi bhi rut ho mahaktaa hai sirf saavan hi ye kis kaa dida-e-pur-nam rahaa hai aankhon mein sulagte shahr ujaDte makaan jhulaste badan kasaafaton kaa dhuaan jam rahaa hai aankhon mein 'naved' khvaab ugaao na in jaziron mein ki dhuup chhaanv kaa aalam rahaa hai aankhon mein"

"teri giraft mein aae na khud ke bas mein rahe ham abr ban ke havaaon ki dastaras mein rahe vo kaun log the sahraa mein jin ko phuul mile chaman mein rah ke bhi ham log khaar-o-khas mein rahe hamaari saada-mizaaji hi ham ko le Duubi ham aasmaan the lekin zamin ke bas mein rahe vo qaafile jo kahin dasht-e-shab mein dafn hue sahar hui bhi to aavaaza-e-jaras mein rahe bujhe to kaise bujhe pyaas jism-o-jaan ki 'naved' ki chand ghunT hi paimaana-e-havas mein rahe"

"har subh main patthar ki tarah sakht banaa huun shaam aate hi shishe ki tarah TuuT gayaa huun girti hui divaar ke saae mein Thahar kar chaDhte hue suraj ki taraf dekh rahaa huun ik baar kisi ne mujhe divaana kahaa thaa ab tak usi lahje ki adaa DhunD rahaa huun tum subh ke divaan mein shaadaab khaDi ho main raat ki daldal mein utartaa hi chalaa huun main ab bhi tiri reshmi palkon ki zamin par sayyaal naginon ki chamak ban ke khaDaa huun"

"ehsaas dekh paae vo manzar talaash kar aankhein jo hain to bu-e-gul-e-tar talaash kar meraa vajud jazb huaa tere jism mein ab mujh ko apne jism ke andar talaash kar tanhaaiyon ke gahre samundar mein Duub jaa zakhmon ke phuul dard ke gauhar talaash kar teraa badan to TuuT gayaa vasl hi ki shab ab aaine mein khud ko na din bhar talaash kar har dil se maangtaa hai jo taaza lahu ki bhiik basti mein koi aisaa gadaagar talaash kar main thak gayaa huun khaak bayaabaan ki chhaan kar mauj-e-nasim tu hi miraa ghar talaash kar dasht-e-vafaa mein yuun na bhaTak dar-ba-dar 'naved' sar ban gayaa hai bojh to patthar talaash kar"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"taavil-e-ahd-e-fan hi to vahshat kaa hal nahin pesh-e-nazar junun hai yaaro ghazal nahin ab is ke baad ahd ki taarik raat hai ye ikhtitaam-e-shaam hai subh-e-azal nahin ai dost ishq mansab-e-fahm-o-shuur hai ye irtiqaa hai zehn kaa koi khalal nahin ik umr ratjagon ki aziyyat mein kaaT di ab mere khvaab niind kaa radd-e-amal nahin kyaa kyaa ataa-e-neamat-e-rabb-e-karim hai lekin 'samir' dard kaa nemul-badal nahin"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"zindagi bojhal hui aazaar se jism jhuktaa jaa rahaa hai baar se doston ne is qadar dhoke diye aur raghbat baDh gai aghyaar se zindagi kaa ik nayaa imkaan huaa ik daricha khul gayaa divaar se ab bayaan kaise karun rudaad-e-gham kaam mushkil hai dil-e-naa-chaar se hijr ki raaton mein bahtaa hi rahaa ek naala chashm-e-dariyaa-baar se misl-e-majnun regzaaron mein rahe sar paTakte ret ki divaar se ham asiraan-e-mohabbat hain yahaan uljhe hain ab gesu-e-khamdaar se 'qalb' teri ghazlein yuun shaadaan karein dard nikle hai tire ashaar se"

"chaahe khoTe hain yaa khare hain ham Dast-e-qudrat ke laaDle hain ham 'aks-e-rafta ko dekhiye saahib kitne maa'sum lag rahe hain ham raat jivan kaa giit gaati hai khvaab-e-tanvim dekhte hain ham 'umr lag jaaegi sanbhalne mein kis bulandi se yuun gire hain ham ek hangaam hai taghayyur kaa kunj-e-nisyaan mein paDe hain ham ab bhi mehndi kaa rang gahraa hai sandalin haath par rache hain ham ik tamaashaa hai kaar-zaar-e-hayaat dekh kar ser ho chuke hain ham jhilmilaate hain aarzu ke kanval dil-jharoke se jhaankte hain ham"