phir se ik baar use khud pe sitam Dhaane duun — Dheerendra Singh Faiyaz

"thakan qarib thi aur vaqt-e-shaam aa gayaa thaa tavil raaste kaa ikhtitaam aa gayaa thaa hamaare hisse mein bas haadse rahe kuchh vaqt hamaare haath mein kuchh aisaa kaam aa gayaa thaa miri taraf se to qissa mazid chaltaa magar tiri zabaan pe lafz-e-tamaam aa gayaa thaa 'ajib baat ki ham tujh ko soch kar roe hamaare saamne saaqi thaa jaam aa gayaa thaa phir us ke baa'd hamein kuchh nahin huaa mahsus badan ki raah mein aisaa maqaam aa gayaa thaa usi ke saath suhulat gai mukarne ki zabaan pe dhoke se jab teraa naam aa gayaa thaa"

"na koi bhiiD na tanhaai na duniyaa kuchh bhi koi bhaataa nahin achchhaa nahin lagtaa kuchh bhi ye anaa hai to anaa hogi magar mere liye kuchh bhi hone se to behtar hai na honaa kuchh bhi aankh aur kaan magar saath liye phirtaa thaa par suni baat koi aur na dekhaa kuchh bhi dhyaan se suntaa rahaa jumbishein us ke lab ki samajh aayaa na mire zehn mein baiThaa kuchh bhi main chalaa aayaa thaa farmaan sunaa kar apnaa is ke pahle mire aage koi kahtaa kuchh bhi ek saae ke ta'aaqub mein yahi haath aayaa sab gayaa haath se aur haath na aayaa kuchh bhi yaa koi she'r koi nazm kahaani yaa ghazal ji bahal jaae sunaao mujhe aisaa kuchh bhi"

"shakhs vo haae sim-tan jaisaa mujh mein paivast hai ghuTan jaisaa mere baatin mein ruuh bhi nahin hai zaahiran huun main kuchh badan jaisaa jaan-levaa sukut hai har samt ghar miraa ho gayaa hai ban jaisaa hai sadaa bhi chhanan chhanan jaisi shor bhi hai khanan khanan jaisaa hosh mein hai zamin pairon ki khvaab mein thaa magar gagan jaisaa mujh pe mushkil giraan hai parbat si hausla meraa kohkan jaisaa"

"saans lene ke sakht bandhan se kaun uube na aise jivan se khvaab jaltaa huaa sharaara thaa aankh mein rakhte bujh gayaa chhan se dekh kar un ko aankh hairaan hai dil pareshaan apni dhaDkan se mujh se ho kar judaa miraa saaya jhaankne lag gayaa hai aangan se haafize mein vo kyaa hai jo ki mujhe yaad aataa nahin hai bachpan se lauTne par mire na jaane kyon kuchh hiran saath aa gae ban se"

"tum ahl-e-dil ho so dil mein rakhaa hamaaraa naam vagarna ham bhi hain kyaa aur kyaa hamaaraa naam har ek shakhs ke siine mein ham dhaDakte hain sabhi ke honThon pe hai jaa-ba-jaa hamaaraa naam tamaam 'umr kai lafz chaak par ghume tab ek 'arse mein jaa kar banaa hamaaraa naam tumhaare kaanon ki Dhalti hui guphaaon mein ba-rang-e-raushni paDtaa huaa hamaaraa naam sadaa kuchh aur hi aai thi us ki jaanib se hamein lagaa thaa ki us ne liyaa hamaaraa naam khamoshiyon ke badan par sadaaein likhni thiin 'ajib shakhs thaa likhne lagaa hamaaraa naam phir us ko sun ke bahut der tak sabhi roe koi kahaani thi aakhir mein thaa hamaaraa naam"

"khud hi khud se hue halkaan ye duniyaa vaale duniyaa vaalon se pareshaan ye duniyaa vaale aur bhi aur bhi hairaan hue jaaeinge apne hi aap se hairaan ye duniyaa vaale apni surat ko abhi aur bigaaDeinge kyaa khud pe dete hi nahin dhyaan ye duniyaa vaale jaane kaise hue kab ho gae duniyaa ke khilaaf jaane kis vaqt ke dauraan ye duniyaa vaale sochtaa huun ki ye duniyaa bhi kahaan jaaegi kab uThaane ke hain saamaan ye duniyaa vaale kyaa abhi bhi inhein insaan kahaa jaaegaa kyaa kabhi hote the insaan ye duniyaa vaale kis liye chhoD de mere liye duniyaa saari aur hon jis ke liye jaan ye duniyaa vaale"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"