raat kaa ab koi jaadu nahin chalne vaalaa — Faheem Jogapuri

"apne qadam ki chaap se yuun Dar rahe hain ham maqtal ki samt jaise safar kar rahe hain ham kyaa chaand aur taaron ko ham jaante nahin ai aasmaan vaalo zamin par rahe hain ham mushkil thaa sath-e-aab se ham ko khangaalnaa baahar nahin the jitnaa ki andar rahe hain ham kal aur koi vaqt ki aankhon mein ho to kyaa ab tak to har nigaah kaa mehvar rahe hain ham dair-o-haram se aur bhi aage nikal gae haan aql ki hudud se baahar rahe hain ham ai ham-safar na puchh masaafat nasib se tu jaantaa hai kitne dinon ghar rahe hain ham baahar na aae ham bhi anaa ke hisaar se is jang mein tumhaare baraabar rahe hain ham jharnon ki kyaa bisaat karein guftugu 'fahim' dariyaa gire jahaan vo samundar rahe hain ham"

"jab bhi hanste hue inkaar kiyaa hai us ne dil pe ik aur nayaa vaar kiyaa hai us ne us ko nafrat ki nigaahon se na dekhe koi umr bhar khud ko bahut pyaar kiyaa hai us ne chumnaa us ko saliqe se zaraa baad-e-sabaa varaq-e-gul ko bhi talvaar kiyaa hai us ne dhuup aavaaz de to chhaanv pukaare us ko kitne aalam ko giraftaar kiyaa hai us ne kyaa kabhi sham-e-farozaan se kisi ne puchhaa kaise ik subh kaa didaar kiyaa hai us ne"

"yaad kar kar ke tiri yaad miTaane nikle le ke ghi haath mein ham aag bujhaane nikle ham faqiron ke qalam se jo khazaane nikle jholiyaan le ke shahanshaah charaane nikle jaise jangal mein koi raat bitaane nikle ghar se nikle to lagaa jaan ganvaane nikle apni haalat kaa ab ehsaas huaa hai aise jaise chhappar koi barsaat mein chhaane nikle bhuki dharti ki anaa aa gai daaman mein magar saare aakaash mein do-chaar hi daane nikle kuchh thake-maandon pe kutton kaa barasnaa dekhaa jab vo fōtpath pe akhbaar bichhaane nikle khud ko samjhaate hue shahr se yuun lauTe hain jaise pardes koi ghar se kamaane nikle aise insaan se mulaaqaat na karnaa behtar dil ke aangan mein jo divaar uThaane nikle saade logon ko bahut tang kiyaa hai tu ne ham hi divaanon se bal tere zamaane nikle sher kahte hain jise baat vahin khatm hui ham to bas 'mir' ki ik rasm nibhaane nikle"

"bech kar tahzib daulat ke pujaari ho gae is zamaane ke sukhanvar bhi madaari ho gae rakh ke vo mizaan par divaan apnaa ro paDe jab kisi ke be-sure alfaaz bhaari ho gae ham ne ik mandir mein dekhi aaj aisi murti aadmi to aadmi patthar pujaari ho gae inqalaab aaya to hai lekin ye kaisaa inqalaab chintiyon ko maarne vaale shikaari ho gae ishq ke baazaar se lauTe hain dil ko haar kar din-o-imaan tum sambhaalo ham juaari ho gae kaun samjhaae samundar ke thapeDon ko 'fahim' kaise kaise vaqt ke aage bhikaari ho gae"

"shaam khaamosh hai peDon pe ujaalaa kam hai lauT aae hain sabhi ek parinda kam hai dekh kar suukh gayaa kaise badan kaa paani main na kahtaa thaa miri pyaas se dariyaa kam hai khud se milne ki kabhi gaanv mein fursat na mili shahr aae hain yahaan milnaa-milaanaa kam hai aaj kyuun aankhon mein pahle se nahin hain aansu aaj kyaa baat hai kyuun mauj mein dariyaa kam hai apne mehmaan ko palkon pe biThaa leti hai muflisi jaanti hai ghar main bichhaunaa kam hai bas yahi soch ke karne lage hijrat aansu apni laashon ke muqaabil yahaan kaandhaa kam hai dil ki har baat zabaan par nahin aati hai 'fahim' main ne sochaa hai ziyaada use likkhaa kam hai"

"falak pe hansne lage chaand taare shaam ke baad hamin udaas hain dariyaa kinaare shaam ke baad khanakti chuDiyaan khushbuein pyaar ki baatein tamaam vasl ke hain istiaare shaam ke baad hamaare din pe zamaane kaa jo tasarruf ho hamaari raat hai aur ham tumhaare shaam ke baad nikaliye ghar se to daaman mein aa hi jaate hain do ek bhaTke hue maah-paare shaam ke baad sunahri machhliyaan Dar jaati hain andheron se so kaun jhiil mein kashti utaare shaam ke baad kahin bhi din mein bhaTaktaa rahun magar vo gali udhar hi raaste muD jaaein saare shaam ke baad udaas raat ke aangan mein dard ki devi baDe hi chaav se zulfein sanvaare shaam ke baad khulaa thaa saamne ik roz baab-e-shahr-e-badan kise bataaein jo dekhe nazaare shaam ke baad tamaam din pe hukumat rahi hamaari 'fahim' ham apne vaqt ke suraj the haare shaam ke baad"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"