raaz-e-chashm-e-mai-gun hai kaif-e-muddaaa meraa — Ali Manzoor Hyderabadi

"husn un kaa apne zauq-e-did mein paataa huun main saamne ho kar vo chhupte hain taDap jaataa huun main ishrat-e-jalva bhi ho jaae jahaan hairat-zada ai khayaal-e-dost us manzil pe ghabraataa huun main dekhtaa huun apne gham-khvaaron ki jab be-dardiyaan husn-e-be-parda ki rah rah kar qasam khaataa huun main intizaar us kaa hai kitnaa jaan-gusil kyunkar kahun khat mein jis kaa naam hi likh kar taDap jaataa huun main kab sanbhalne degi ghash se un ki chashm-e-barq-paash muzhda baad ai be-khudi aate hain vo jaataa huun main be-khayaali mein kabhi apni zabaan-e-haal se khasta-haali ke maze un ko bhi samjhaataa huun main aah ab tak ki nahin sair-e-bahaaristaan-e-dil ik khayaali rau mein ai hamdam bahaa jaataa huun main hairat-afzaa hai miraa ishq-e-mohabbat-aafrin khud hi ab muztar nahin un ko bhi taDpaataa huun main raasta chhoD ai taghaaful mere ghar aate hain vo rahbari kar ai tamannaa un ke ghar jaataa huun main hairat-e-mashq-e-tasavvur kho na de mujh ko kahin saamne apne tujhe ai dil-nashin paataa huun main laa rahi hai un ki chashm-e-lutf 'ishrat ke payaam dekh ai 'manzur' ab kaisaa nazar aataa huun main"

"ai kashmakash-e-ulfat ji sakht pareshaan hai marne ki bhi hasrat hai jiine kaa bhi armaan hai saahil se nahin lagti gharqaab nahin hoti kashti hai thapeDon mein ye bhi koi tufaan hai main kyaa miri ulfat kyaa tu aur mujhe puchhe bas ai sitam-aaraa bas hasrat hai na armaan hai ye mauj-e-tabassum kyaa zaalim ise dho degi jo rang-e-pashemaani chehra se numaayaan hai maghrur-e-mohabbat huun khud meri nigaahon mein ye be-sar-o-saamaani raaz-e-sar-o-saamaan hai is husn-e-mujassam ki sharmili adaaon kaa ehsaas-e-mohabbat bhi sharminda-e-ehsaan hai 'manzur' use rukhsat kis dil se karungaa main dhaDkaa hai yahi har dam jab se ki vo mehmaan hai"

"gham kaa gumaan yaqin-e-tarab se badal gayaa ehsaas-e-ishq husn ke saanche mein Dhal gayaa saath un ke le rahaa huun main gul-gasht ke maze ye khvaab hi sahi miraa ji to bahal gayaa majbur-e-ishq chashm-e-fusun-saaz se huun main jaadu mujhi pe dost kaa chalnaa thaa chal gayaa main intizaar-e-eid mein thaa eid aa gai armaan-e-did daaman-e-ishrat mein pal gayaa hai barq-e-jalva yaad magar ye nahin hai yaad khirman mire ghurur kaa kis vaqt jal gayaa paimaan-e-ishq-o-husn ki tajdid ke sivaa jo bhi khayaal zehn mein aayaa nikal gayaa baDhte chale hain aae din asbaab-e-iztiraab yaadash-ba-khair aaj kaa vaada bhi Tal gayaa 'manzur' kis zabaan se buton ko buraa kahein imaan hamaaraa kufr ke daaman mein pal gayaa"

"puchho na kuchh subut-e-khirad main ne kyaa diyaa ek mast-e-naaz ko dil-e-be-muddaaa diyaa ab kyaa gila karun adam-e-iltifaat kaa meri nigaah-e-yaas ne sab kuchh jataa diyaa baDhte hue shuur mein gum ho rahaa huun main ehsaas-e-husn aap ne itnaa baDhaa diyaa dekhi na jab tajalli-e-takraar-aashnaa be-rangiyon kaa rang khudi ne jamaa diyaa hai shaad be-dili pe tahi-dast-e-aarzu achchhaa kiyaa nishaan-e-tamannaa miTaa diyaa maayus-e-jalva-ha-e-tarab huun khabar nahin dil khud hi bujh gayaa ki kisi ne bujhaa diyaa kyaa lutf-e-iztiraab dikhaaun ki aap ne ehsaa-e-dard dard se pahle miTaa diyaa anjaam-e-did-o-eid ab ai ham-nashin na puchh vo mujh ko yaad hai mujhe jis ne bhulaa diyaa maalum thaa tujhe ki vo dard-aashnaa nahin 'manzur' dil kaa dard unhein bhi sunaa diyaa"

"barham-kun-e-dil yuun kabhi barham na huaa thaa hairat-asar aisaa miraa aalam na huaa thaa un shokh nigaahon ne taDap aur baDhaa di allaah abhi dard-e-jigar kam na huaa thaa ab bhi mujhe khuddaari-e-jaanaan mein nahin shak pahle bhi miraa dil mutavahham na huaa thaa ai pir-e-mughaan us ki baqaa mein mujhe shak hai vaaqif asar-e-jaam se kyaa jam na huaa thaa vo shokh mujhe dekh ke yuun sharm se jhuk jaae jis kaa sar-e-maghrur kabhi kham na huaa thaa is kam-nigahi ne to mujhe maar hi Daalaa aisaa asar ai pursish-e-paiham na huaa thaa mashhur vo 'manzur' hai jis ke liye kal tak sarmaa-e-shohrat hi faraaham na huaa thaa"

"jis ke imaan par but-e-kaafar hanse allaah allaah vo hanse kyunkar hanse husn-e-maah-o-maahvash sehr-aafrin haae jaadugar pe jaadugar hanse qulqul-e-minaa dikhaae jab asar main hansun saaqi hanse saaghar hanse kyunkar aati hai hansi kis ko khabar un pe main hairaan huun jo mujh par hanse ik pate ki baat kahtaa huun suno koi hans kar roe yaa ro kar hanse ik pata ki baat kahtaa huun suno koi hans kar roe yaaro kar hanse phabtiyaan kahne pe main aauun agar vaaiz-e-zishaan sar-e-mimbar hanse kyaa khabar 'manzur' hai kis dhyaan mein vo to vo zaahid farishton par hanse"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"kisi ki mehrbaani ho gai hai ayaan dil ki kahaani ho gai hai hare mausam ki pahli khvaahishein uf khushi gham ki divaani ho gai hai sabhi afraad ghar ke so gae hain bahut lambi kahaani ho gai hai rivaayat kaa hai ab bhi sahar qaaem har ik jiddat puraani ho gai hai pas-e-chehra milaa ik aur chehra 'aqidat paani paani ho gai hai"

"aakhiri hal thaa yahi pesh-e-nazar jaane diyaa ek gahri saans li phir khvaab mar jaane diyaa saarbaanaa de gavaahi mujh ko pyaari thi anaa rakh liyaa zaad-e-safar aur ham-safar jaane diyaa hazrat-e-naaseh ki khush-uftaadgi pe daad hai khud jidhar se aae the sab ko udhar jaane diyaa is harim-e-naaz mein yuun be-mahaabaa guftugu kuchh bharam rakkhaa to hotaa tum ko gar jaane diyaa tujh ko rokaa jaa rahaa thaa raushni thi jab talak shaam ke Dhalte samay suraj ko ghar jaane diyaa aankh sapne dekhti thi aansuon se kyon bhari chaahti to puchh leti main magar jaane diyaa dostaa qismat na ho to koshishein bekaar hain sabr kaa paimaana ham ne khud hi bhar jaane diyaa dil musir thaa baarhaa kuchh jaanchne ko ruk gae aakhirash us ne hamein baar-e-digar jaane diyaa"

"aisaa to yahaan kuchh bhi nahin hadd-e-nazar tak ham ko to pahunchnaa thaa kisi khvaab-nagar tak ab paanv nahin raah mein dil thakne lagaa hai lekin hamein chalnaa to hai anjaam-e-safar tak ham shor bhi sunte hain samaaat se bahut kam aavaaz bhi jaati hai to bas hadd-e-nazar tak mumkin hai main ab sabr kaa ye peD giraa duun jab haath pahunchtaa hi nahin shaakh-e-samar tak ham apne hi mausam se parakhte hain jahaan ko maahaul kaa lete hi nahin koi asar tak main apne hi andar ki taraf chikh rahaa huun ab dekhiye jaati hai ye aavaaz kidhar tak"