roz apnaa bayaan badaltaa hai — Harsh Brahmbhatt

"phuul samjhe the khaar niklaa hai jaan-levaa ye pyaar niklaa hai tiir chhoDaa nahin abhi ham ne to ye kyaa aar-paar niklaa hai meri haalat pe aaina royaa koi to gham-gusaar niklaa hai daam do dil ke dil ko le jaao aisaa bhi ishtihaar niklaa hai jazba vahshat kaa thaam kar mujh ko aaj phir su-e-daar niklaa hai raah mein baiThaa huun magar us ko DhunDne intizaar niklaa hai hasratein mar chukin magar un ke dil ke andar mazaar niklaa hai jo bhi niklaa hai us ki mahfil se jaane kyon ashk-baar niklaa hai"

"aasmaan se hilaal niklaa hai dil se teraa khayaal niklaa hai aaina toD kar nikaalo to apnaa bas vo hi haal niklaa hai mushkilon mein bitaae saal kai tab kahin ek saal niklaa hai band dil ki dukaan kholi to gard mein Duubaa maal niklaa hai 'aam insaan aaj kaa ghar se khud ko khud se sanbhaal niklaa hai aadmi jab kabhi khulaa hai kahin koi fan yaa kamaal niklaa hai us ne jab jab zabaan kholi hai koi uljhaa savaal niklaa hai"

"dard siine mein le ke chaltaa huun gham ke saae mein roz paltaa huun meri duniyaa badal si jaati hai aaine se main jab nikaltaa huun meri saanson se uTh rahaa hai dhuaan bujh rahaa huun magar main jaltaa huun log kahte hain gir rahaa huun magar sach to ye hai ki main sanbhaltaa huun sar uThaati hai zindagi har pal har ghaDi su-e-marg chaltaa huun main agar sang huun to phir yaaro koi batlaae kyon pighaltaa huun"

"shaa'iri ki zabaan boleinge kaan duniyaa ke aaj kholeinge saath milnaa kisi kaa mushkil hai apne saae ke saath ho leinge dil mein melaa lagaa hai khalvat kaa aaj ham is mein khud ko kholeinge vasl ke phuul ham khilaaenge teri yaadon ko dil mein boleinge bahte aansu se kaam leinge ham kam se kam chehra apnaa dho leinge sar pe ehsaan raat kaa kyon hai niind aai to din mein so leinge"

"be-khataa ko sazaa to dete hain jalte dil ko havaa to dete hain ajnabi log achchhe lagte hain dekh kar muskuraa to dete hain chaahe jiine ki chaahe marne ki chaara-gar kuchh davaa to dete hain rishta ab jaise khoTaa sikka hai phir bhi is ko chalaa to dete hain chaahe milte nahin pate par vo phir bhi apnaa pata to dete hain aaina mere saamne rakh kar mujh ko mujh se milaa to dete hain mujh ko khaana-ba-dosh kar ke vo sab ke dil mein basaa to dete hain"

"ek jaadu saa kar gayaa koi dil ke andar utar gayaa koi main khamoshi se dekhtaa hi rahaa saamne se guzar gayaa koi dil ke aangan mein yaad bikhraa ke ashk aankhon mein bhar gayaa koi aaina saamne jo aayaa tab main ne dekhaa ki Dar gayaa koi meri hasrat liye hue dil mein chupke chupke sanvar gayaa koi"

"is ishq-e-junun-khez mein kyaa kyaa nahin hotaa divaana hai jo qais se lailaa nahin hotaa kuchh hashr lahad par abhi barpaa nahin hotaa aae ho to Thahro koi zinda nahin hotaa kyuun kar ye kahun husn kaa nashsha nahin hotaa hotaa to bahut hai magar itnaa nahin hotaa kuchh kahiye to sharmaa ke jhukaa lete hain gardan bhule se bhi ab vaada-e-fardaa nahin hotaa milte hain vo dil surkh hui jaati hai chuTki naazuk hain bahut khun-e-tamannaa nahin hotaa deti hai mazaa mai kaa hamein talkhi-e-tauba jab haath mein paimaana-e-sahbaa nahin hotaa vo hashr ke din kushte ko Thukraa chuke sau-baar kuchh jaan si paD jaati hai zinda nahin hotaa boli ye tamannaa jo ruke vo dar-e-dil par ghar aap kaa hai aap se pardaa nahin hotaa tiron ko jagah dete hain jo siine mein apne un logon ke ai jaan kaleja nahin hotaa sahraa se qadam ghar ki taraf khaak uThaaun kaanTe se judaa paanv kaa chhaalaa nahin hotaa baiThe nazar aate hain vahi teri gali mein jin kaa kahin duniyaa mein Thikaanaa nahin hotaa furqat mein hai kyuun nazaa ki taklif gavaaraa mar jaaein 'riyaaz' aap se itnaa nahin hotaa"

"hai jo ik maa'raka faisal nahin hone detaa jin vo ho ke mujhe botal nahin hone detaa qatl ik roz hi kartaa huun isi goshe mein aur saabit ise maqtal nahin hone detaa zid hai us ki ki har ik shaakh ho phir sabz hi sabz garche paidaa koi konpal nahin hone detaa raushni apne khayaalon hi se karni hogi koi raushan kahin mash'al nahin hone detaa chun-ki miTTi ki bhi ek apni alag khushbu hai main kahin bhi ise sandal nahin hone detaa ik parinda ki jo sahtaa hai havaaon kaa dabaao aur parvaaz ko paidal nahin hone detaa Dar hai us ko nazar aae na kahin zehn kaa 'aks vo miraa aaina saiqal nahin hone detaa tiraa qaanun hai jangal kaa ghanimat hai ki tu mire is shahr ko jangal nahin hone detaa chalo baat us ki sunein ek 'ajab mantiq se jo kisi baat ko muhmal nahin hone detaa"

"muzhda ai zauq-e-asiri ki nazar aataa hai daam-e-khaali qafas-e-murgh-e-giraftaar ke paas jigar-e-tishna-e-aazaar tasalli na huaa ju-e-khun ham ne bahaai bun-e-har khaar ke paas mund gaiin kholte hi kholte aankhein hai hai khuub vaqt aae tum is 'aashiq-e-bimaar ke paas main bhi ruk ruk ke na martaa jo zabaan ke badle dashna ik tez saa hotaa mire gham-khvaar ke paas dahan-e-sher mein jaa baiThe lekin ai dil na khaDe ho jiye khubaan-e-dil-aazaar ke paas dekh kar tujh ko chaman bas-ki numu kartaa hai khud-ba-khud pahunche hai gul gosha-e-dastaar ke paas mar gayaa phoD ke sar 'ghaalib'-e-vahshi hai hai baiThnaa us kaa vo aa kar tiri divaar ke paas kab faqiron ko rasaai bu-e-mai-khvaar ke paas to bane bu dijiye maikhaane ki divaar ke paas"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"