tabdiliyaan hain umr ke jaane ke saath saath — Safdar Hamadani

"gulsitaan-dar-gulsitaan ab baaghbaan koi nahin phuul sab tanhaa khaDe hain titliyaan koi nahin dhuup achchhi lag rahi hai aaj kitne din ke baad baadalon kaa duur tak naam-o-nishaan koi nahin khushk lakDi ki tarah se jal gae saare makaan ye ajab ki saari basti mein dhuaan koi nahin naam kyaa degaa koi in be-sabab haalaat ko mehrbaan saare hain lekin mehrbaan koi nahin apne ghar se duur rah kar har qadam hai imtihaan kaun kahtaa hai yahaan par imtihaan koi nahin us ne apne shauq se dast-e-duaa kaTvaa diye us ke chehre par likhi ab daastaan koi nahin raat ki jhilon mein utregi kahaan se chaandni ham siyaah-bakhton ko bhi aisaa gumaan koi nahin kyaa khabar kyaa ho gayaa hai is muammar shakhs ko din Dhale jangal se chuntaa lakDiyaan koi nahin ik ajab saa haadsa dekhaa hai 'safdar' shahr mein khushk hain sab aashiyaan aur bijliyaan koi nahin"

"le tiri aavaaz ko qaid-e-samaaat kar liyaa haan ghazal ke ruup ko aks-e-tabaaat kar liyaa bhigti is shaam mein us ne pukaaraa hai mujhe lag rahaa hai jis tarah hajj-e-mohabbat kar liyaa sochtaa huun us se puchhun jaan-e-'safdar' kis liye aam se ik aadmi ko apni aadat kar liyaa aaj phir shaanon pe bikhri zulf hai allaah khair lag rahaa hai aaj phir ahd-e-baghaavat kar liyaa raat-din rahtaa hai us ko apni chaahat kaa khayaal us ne khud ko is tarah vaqf-e-ibaadat kar liyaa kar liyaa hai shab ki tanhaai mein milne kaa khayaal muskuraahaT ko tiri radd-e-adaavat kar liyaa is kitaab-e-ishq ki takmil 'safdar' ho gai us ne barson baad izhaar-e-mohabbat kar liyaa"

"haasil davaam kab hai bhalaa ab davaam ko ham ki taraste rahte hain un ke salaam ko nilaam ho rahaa hai adab bhi adiib bhi phailaaein shahr shahr mein ab is payaam ko talvaar kaa vajud hai talvaar-zan ke saath meaar mat banaaiye khaali niyaam ko be-shak ye baune ghaalib-e-dauraan kahein tumhein main jaantaa huun khuub tumhaare maqaam ko pahunchi hai ab zamir-faroshi uruuj par ji chaahtaa hai aag lagaa duun kalaam ko mufti adab ke diin ke mufti se kab alag kaise halaal karne lage hain haraam ko aari jo adl se ho adaalat se duur ho dozakh rasid kijiye aise imaam ko eazaaz ab adab kaa nahin chaahiye mujhe rakhiye muaaf bahr-e-khudaa is ghulaam ko ab naam par adab ke tijaarat adab ki hai 'safdar' havaa na dijiyegaa intiqaam ko"

"ji rahaa huun vasvason ke darmiyaan dam-kashida saaaton ke darmiyaan baa-amal dekhe hain kitne tang-dast be-amal in vaaizon ke darmiyaan be-samar hi ab shajar kumhlaaegaa shak ugaa hai chaahaton ke darmiyaan main ne hikmat se nikaalaa hai janaab ek rasta raaston ke darmiyaan mujh ko deti hai sadaaein raat-din ek vahshat saahilon ke darmiyaan daad mere hausle ki dijiye rah rahaa huun kufiyon ke darmiyaan doston ke saath 'safdar' is tarah jaise kaafir mominon ke darmiyaan"

"sab darakht khaali hain baarishon ke mausam mein saare ghar muqaffal hain vasvason ke mausam mein aandhiyon ki baarish mein sab charaagh zinda hain jaagtaa hai yazdaan bhi rat-jagon ke mausam mein aap se shikaayat kyaa aap se gila kaisaa phir rahaa huun khud tanhaa saazishon ke mausam mein jaagte darakhton ki shaakh shaakh khaali hai koi phal ugegaa to khvaahishon ke mausam mein abr kaa koi TukDaa shahr bhar savaali hai aankh khushk dariyaa hai aansuon ke mausam mein bas isi tajassus mein raat kaa safar guzraa kaun hai jo rotaa hai chaahaton ke mausam mein ik sukut taari hai har sadaa ke chehre par paa-barahna lamhe hain saaaton ke mausam mein"

"mar jaaeinge jab ham nauhe likkheinge haakim maut hamaari dekhnaa becheinge khushk aankhon ko dekh na lein kahin zaalim log aankhon pe rumaal ko rakh kar roeinge koi na hogaa sunne vaalaa basti mein kutte shahr ke unche sur mein bhaunkeinge jo bhi adaalat adl kare is mausam mein us ko aag lagaa ke duur se dekheinge haakim ab sailaab mein marne vaalon kaa j i T se fursat ho to socheinge apne ghar ke log nahin pahchaaneinge khvaabon ko ham jab dafnaa kar lauTeinge log to shaayad paani mein hi bah jaaeinge 'safdar' saahab saanp gharon se nikleinge"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"Tuut kar ab sanvar gayaa huun main is tarah se bikhar gayaa huun main jo tire naam ki gali hai vo us gali se guzar gayaa huun main yaadein teri sameT laayaa huun aaj jab se udhar gayaa huun main khud mukarnaa sikhaa diyaa us ne phir kahaa ki mukar gayaa huun main kal talak jo na kar sakaa thaa main aaj vo kaam kar gayaa huun main yuun kahin main nahin Thahartaa par tere dar par Thahar gayaa huun main"

"bistar-e-karb pe jab niind jalaai main ne tab kisi khvaab ki buniyaad uThaai main ne zakhm aise the ki har shakhs ke aage rakkhe baat aisi thi ki khud se bhi chhupaai main ne hurmat-e-gham ke liye khud ko aziyyat bakhshi phir usi dard se taskin bhi paai main ne main ne zakhmon ko kuredaa unhein taaza rakkhaa tab kahin dasht mein ki naghma-saraai main ne apni khiDki se yunhi khud ko pukaaraa kal shab aur phir khud ko vo aavaaz sunaai main ne jaane vaale se rag-e-jaan kaa bhi rishta thaa 'samir' ye samajhne mein bahut der lagaai main ne"

"zindagi dushvaar hogi ye kabhi sochaa na thaa vo bagule gham ke uTThe jin kaa andesha na thaa saamne tum aa gae ho to bataa duun jaan-e-jaan jaise dil dhaDkaa thaa ab ki vaise dil dhaDkaa na thaa ye iraada kar liyaa thaa ham na bichhDeinge kabhi TuTeinge ik pal mein rishte ye kabhi sochaa na thaa yaad-e-maazi miT rahi hai vaqt ki raftaar se ab tasavvur mein hamaare koi bhi chehra na thaa sakht hairat ho rahi hai dekh kar apnaa vajud dhuup mein the sab ke saaye par miraa saayaa na thaa shauq-e-manzil dekh meri dekh meraa hausla shahr-e-dil ke raaston mein main kabhi Thahraa na thaa 'qalb' ko sahraa-navardi raas kyaa aati bhalaa vo kabhi aavaargi mein dar-ba-dar bhaTkaa na thaa"

"jahaan-e-dard-o-gham hai aur main huun tiraa naqsh-e-qadam hai aur main huun kisi ki aankh nam hai aur main huun vufur-e-shauq kam hai aur main huun mujhe hai daulat-e-kaunain haasil mire rab kaa karam hai aur main huun main apne aap ko pahchaantaa huun miraa apnaa bharam hai aur main huun yahi kyaa kam hai duniyaa-e-vafaa mein mujhe ehsaas-e-gham hai aur main huun kisi ki yaad kaa ehsaan hai mujh par sukun-e-dil baham hai aur main huun mujhe 'mahmud' koi Dar nahin hai miraa apnaa qalam hai aur main huun"