tamaam 'umr kisi pesh-o-pas mein rahnaa paDaa — Arman Khan Arman

"'aql-o-daanish ko yaqinan maat honi chaahiye 'ishq-e-vaahid mein yahi khairaat honi chaahiye sar qalam kar de sitamgar dast-o-baazu kaaT de be-takalluf haq-ba-jaanib baat honi chaahiye paDh sakein naa-aafrida gulshanon ke 'andalib bebasi safhaat-dar-safhaat honi chaahiye chaar-su maqtal hi maqtal dasht-o-sahraa karbalaa gar yahi din hai to phir ab raat honi chaahiye"

"sad bahaaron se laala-zaar hai dil fasl-e-gul hai ki khaar-khaar hai dil shaam-dar-shaam ik nae Dhab se zakhm-juyaa-e-nau-bahaar hai dil khuub vaaqif hai raaz-e-hasti se sab ke sinon mein be-qaraar hai dil hausla chaahiye rafugar mein reza-reza hai taar-taar hai dil kitne 'armaan' dafn hain is mein naqsh-e-faani mein ik mazaar hai dil"

"vaqf kar di zindagi sab ne zamaane ke liye ab kise fursat kisi se dil lagaane ke liye talkhiyaan khun-e-jigar ki shaa'iri mein ghol kar chand misre' laaein hain ham bhi sunaane ke liye bhaap ban kar uD gae jo log paani ki tarah aag se khelaa kiye the aashiyaane ke liye kuchh to meri chaahaton kaa vo bharam rakhtaa bhalaa ek rasta chhoD detaa aane jaane ke liye"

"pahle vo parindon ko ham-zabaan banaataa hai baa'd jaal bunne ko rassiyaan banaataa hai aaj ik samundar ne jis se dushmani kar li vo to sirf saahil par kashtiyaan banaataa hai jis pe dars-e-hasti kaa imtihaan guzraa ho vo qalam se kaaghaz par talkhiyaan banaataa hai subh hone se pahle shor phail jaataa hai kaun raat bhar itni siskiyaan banaataa hai dil to khair dil Thahraa bebasi mein kis kis par raaz khol detaa hai raaz-daan banaataa hai khaak-e-dasht-e-imkaan se ik diyaa banaa kar ke vahshat-o-tazabzub ki aandhiyaan banaataa hai"

"bichhaD ke us se agarche mujhe qaraar nahin ye aur baat mujhe us kaa intizaar nahin nazar to pher mire kaaghazi badan ki taraf abhi ye zarb-e-musalsal se taar-taar nahin 'ajib shahr-e-tamannaa ke raaste hain yahaan har ek samt likhaa hai ki saazgaar nahin nashaat-e-fasl-e-bahaaraan ki ho gai aamad shikoh-e-chashm-e-giraan-baar taabdaar nahin vo manzilein hain 'abas jin ke raaste hain tamaam vo raah raah nahin jo ki khaar-khaar nahin"

"'ghaalib' ke kabhi 'mir' ke divaan se chehre mushkil se samajh aate hain aasaan se chehre dil shahr-e-tamannaa hai muhaafiz hain nigaahein rahte hain yahaan be-sar-o-saamaan se chehre parchhaaiyon ki qaid mein dam toD rahe hain saahir ki kisi nazm ke 'unvaan se chehre haalaat se laDne kaa hunar siikh rahe hain muskaan lapeTe hue sunsaan se chehre har samt andheraa hai tamaashaa-e-kuhan hai maayus hain insaan se insaan se chehre kyon haath mein arjun ke dhanush kaanp rahaa hai lashkar mein hain dushman ke dil-o-jaan se chehre"

"phir khuun mein vahshat raqsaan hai tajdid sitam karne ke liye ik taaza zakhm ki khvaahish hai ik sadma kam karne ke liye ham din-bhar duniyaa-daari mein hans hans ke baatein karte hain phir saari raat pighalte hain ik ashk raqam karne ke liye vo vasl ki jis ne ham donon ko yaksar be-buniyaad kiyaa ab fursat hai aa mil baiThein us vasl kaa gham karne ke liye ik kaari zakhm ki chaahat ne kyaa kyaa na hamein gulzaar kiyaa ham kis kis se mansub hue ik hijr baham karne ke liye insaan ke jiine marne ke majburi ke mukhtaari ke ye saare khel zaruri hain taamir adam karne ke liye"

"chaand bhi khoyaa khoyaa saa hai taare bhi khvaabida hain aaj fazaa ke bojhal-pan se lahje bhi sanjida hain jaane kin kin logon se is dard ke kyaa kyaa rishte the hijr ki is aabaad saraa mein sab chehre naadida hain itne barson baad bhi donon kaise TuuT ke milte hain tu hai kitnaa saada-dil aur ham kitne pechida hain sun jaanaan ham tark-e-taalluq aur kisi din kar leinge aaj tujhe bhi ujlat si hai ham bhi kuchh ranjida hain kaanon mein ik sargoshi hai be-maani si sargoshi aankhon mein kuchh khvaab saje hain khvaab bhi umr-rasida hain ghar ki vo makhdush imaarat gir ke phir taamir hui ab aangan mein peD hain jitne saare shaakh burida hain is basti mein ek saDak hai jis se ham ko nafrat hai us ke niche pagDanDi hai jis ke ham girvida hain"

"raftagaan ki sadaa nahin main huun ye tiraa vaahima nahin main huun tere maazi ke saath dafn kahin meraa ik vaaqi'a nahin main huun kyaa milaa intihaa-pasandi se kyaa main tere sivaa nahin main huun ek muddat mein jaa ke mujh pe khulaa chaand hasrat-zada nahin main huun us ne mujh ko muhaal jaan liyaa main ye kahtaa rahaa nahin main huun main hi 'ujlat mein aa gayaa thaa idhar ye zamaana nayaa nahin main huun meri vahshat se Dar gae shaayad yaar baad-e-fanaa nahin main huun main tire saath rah gayaa huun kahin vaqt Thahraa huaa nahin main huun gaahe gaahe sukhan zaruri hai saamne aaina nahin main huun sarsari kyuun guzartaa hai mujh se ye miraa maajraa nahin main huun us ne puchhaa kahaan gayaa vo shakhs kyaa bataataa ki thaa nahin main huun ye kise dekhtaa hai mujh se udhar tere aage khalaa nahin main huun"

"dast-kash hon na mai-e-gul ke khush-aashaam abhi ki labaalab hain mah-o-mehr ke do-jaam abhi zehn mein saaqi hai mai-khaana hai hai jaam abhi hosh kahtaa huun ise hosh kaa kyaa kaam abhi mujh ko darkaar na hai kufr na islaam abhi sidhe sidhe hi chale aate hain paighaam abhi tu bhi baaqi tiri rahmat bhi hai baaqi saaqi rahne de hai mai-e-isyaan se baDaa kaam abhi khaal-o-gesu se hai ye silsila-e-raaz-o-niyaaz daana sad-daana ho ye daam ho sad-daam abhi ziist ke khvaab ki taabir abhi baaqi hai ibtidaa dekh chuke hai magar anjaam abhi rah-rav-e-ishq abhi duur hai mearaaj-e-habib rashk-e-manzil na huaa raah mein har gaam abhi zarra-zarra hai ik aatish-kada-e-nur kalim dekh agar tu na ho aatish-zada-e-baam abhi imtiyaaz-e-man-o-tu raaz-e-khafi hai lekin khaasgaan ke liye kahtaa huun sar-e-aam abhi aks ko zo'm hai be-misli-e-rang-o-bu kaa turfa ye hai ki muqaabil hai vo gulfaam abhi raaz-goi tiri 'aiman' hai gunaah-e-akbar maang le afv ki us kaa hai karam aam abhi"

"baad-e-shimaal chalne lagi ang ang mein lipTaa hai kaun mujh se ye patjhaD ke rang mein khvaahish ke kaarobaar se bachnaa muhaal hai utregaa tu bhi saath mire is surang mein main aandhiyon mein haath bhi pakDun tiraa to kyaa ik shaakh-e-be-siper huun havaaon ki jang mein 'raanjhaa' main 'ahd-e-nau kaa qabilon mein baT gayaa to 'hir' ban ke pi na saki zahr jhang mein garmaa sakin na chaahatein teraa kaThor jism har ek jal ke bujh gai tasvir sang mein aage 'musavvir' aag 'aqab mein hai ye sadaa pichhe na muD ke dekhnaa is dasht-e-sang mein"

"tifli piiri o naujavaani hech tiin din ki hai zindagaani hech umr-e-do-roza par ghamanD itnaa munimon ki hai lan-taraani hech raat thoDi hai aao pyaar karein subh ko hogi ye kahaani hech chaar din ki bahaar hai saari ye takabbur hai yaar-e-jaani hech dil ke haathon 'haqir' jhagDon mein meri guzri sadaa javaani hech"