tamaam 'umr vo ehsaan mujh pe kartaa rahaa — Abida Karamat

"hisaar mein liye be-naam ek vahshat thi yahi mataa' yahi zindagi ki qimat thi kahin qiyaam bhi karte to bad-gumaan rahte hamaare pair se lipTi hui vo hijrat thi tiri talaash faqat zaad-e-raah thi ham ko vagarna ham ko faqat apni hi zarurat thi tamaam 'umr vafaadaar hi rahe apne baraae zakhm tire haath pe bhi bai'at thi milein to pursish-e-ahvaal bhi zaruri thaa ye guftugu bhi koi surat-e-mohabbat thi thakan hi de ke gayaa zaat kaa safar mujh ko ki ye bhi raaegaan shaayad koi masaafat thi zamin pe bojh se apne giri thiin divaarein ye aur baat ki barsaat se shikaayat thi havaa ki zad pe hi aa kar charaagh bujhnaa thaa vagarna phir to rivaayaat se baghaavat thi"

"koi baDh kar sitam mujh par sitam-ijaad kyaa kartaa basaayaa hi nahin jis ko use barbaad kyaa kartaa sikhaayaa bolnaa us ko zabaan-e-be-zabaani se agar lab khol leti main vo phir irshaad kyaa kartaa kahaan qad naaptaa meraa bhalaa ye sher-e-kam-qaamat so meraa sher bhi paa kar siyaasi daad kyaa kartaa nikal vo khud nahin paataa shikanj-e-zaat se apni jo apni qaid mein khud ho mujhe aazaad kyaa kartaa jahaan baazu rasan-basta jahaan qadghan ho lafzon par koi zanjir kyaa hilti koi fariyaad kyaa kartaa agar fitrat ho simaabi tabiat bhi ho sailaani dar-o-divaar kyaa rakhtaa vo ghar aabaad kyaa kartaa rihaai zulm se us ke mayassar aur mumkin thi magar main ne yahi sochaa vo mere baad kyaa kartaa"

"qalam ko khuun mein gharqaab dekhte jaao zamin-e-sher ko shaadaab dekhte jaao nigaah hote hue sail-e-khun pe chup rahnaa hamaare shahr ke aadaab dekhte jaao pahunch gai hai sar-e-arsh un ki khaamoshi ki kushtagaan ko zafar-yaab dekhte jaao sajaae maathe pe apni tamaam taa'birein hamaari aankh ke sab khvaab dekhte jaao sulag rahaa hai koi aur jal rahaa hai koi gharon ki ye bhi tab-o-taab dekhte jaao har ek qabr pe likkhaa huaa hai naam yahaan hamaare mimbar-o-mehraab dekhte jaao gharaz ke sainkaDon baazaar khul gae lekin khulus ho gayaa naayaab dekhte jaao"

"‘uqde khule na mujh pe tire khad-o-khaal ke har saans chal diyaa mujhe uljhan mein Daal ke jo khud ganvaa chukaa hai kahin 'umr-e-mo'tabar vo kyaa hisaab degaa mire maah-o-saal ke aae the meri bazm mein kuchh jam sifaat log jalve na kam hue mire jaam-e-sifaal ke main kyaa huun sirf itnaa hi puchhaa thaa ek din kitne javaab degaa mujhe is savaal ke aandhi ki tarh aa ke chalaa bhi gayaa kahin kankar saa koi vo miri aankhon mein Daal ke jo bhi milaa thaa daulat-e-dil us pe vaar di rakkhaa na koi main ne khazaana sanbhaal ke vo aane vaale vaqt ke tevar samajh gayaa main rishte joDti rahi maazi ke haal ke"

"nadi ehsaas ki chaDhti rahi hai vafaa ki raah mein baDhti rahi hai kisi se jang kyaa laDki kare vo jo apne aap se laDti rahi hai bulandi par pahunch kar kyaa vo pighle pahaaDon par baraf paDti rahi hai sitaara ban ke teri raah mein hai jo afshaan maang se jhaDti rahi hai tumhaare haq mein kaise faisla duun anaa mujh se miri aDti rahi hai bachaa kar qabr se le aae jis ko dar-o-divaar mein gaDti rahi hai"

"aag ke safar mein jab raakh kaa badan hogaa ek saans lenaa bhi zindagi kaa fan hogaa jo bhi main ne sochaa thaa vo hi ab ke likkhaa hai tang aur bhi ab ke halqa-e-rasan hogaa manzilein bhi naa-maa'lum raaste bhi laa-mahdud ye safar bhi lagtaa hai baa'is-e-thakan hogaa us ne meri shaakhon ko is tarah numu bakhshi zakhm ke khileinge phuul dard kaa chaman hogaa ham ko phir zamaane tak log yaad rakkheinge sar ki hogaa neze par jism be-kafan hogaa sina-e-mohabbat mein dard jab nahin hotaa saaz be-sure honge she'r be-vazan hogaa"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"