vaada-e-vasl hai lazzat-e-intizaar uThaa — Abdullah Kamal

"itnaa yaqin rakh ki gumaan baaqi rahe ek zaraa kaar-e-jahaan baaqi rahe baaqi rahe yaadon ki ik qaus-e-quzah yaani miri jaa-e-amaan baaqi rahe shorish-e-khun raqs-e-junun khatm na ho qahqaha-e-ham-nafasaan baaqi rahe aataa rahe yuun hi sadaa mausam-e-gul silsila-e-dil-zadagaan baaqi rahe qaafla-e-gham guzraan ki bhi sunaa hausla-e-ham-safaraan baaqi rahe qaid-e-qafas shor-e-nafas kis ke liye kis ke liye rishta-e-jaan baaqi rahe aankhon se chhin jaaein ik ik khvaab magar us ki talab dil kaa dhuaan baaqi rahe"

"lafzon mein ik nae safar kaa kartaa hai aaghaaz badan nuqta nuqta phail ke mujh ko detaa hai aavaaz badan har-pal TuuT bikharnaa khadsha Thes lage to kaanp uThtaa hai shisha shisha ruup liye hai patthar kaa dam-saaz badan uDtaa baadal Dhalti chhaayaa ik ik pal mein sau sau kaayaa uDte roz-o-shab se aage kartaa hai parvaaz badan anjaani an-dekhi sadaaein aksar dastak de jaati hain mujh ko barahna kar detaa hai aksar ye ghammaaz badan kitne haatim bhaTke barson lauh-e-tilism-e-raaz liye phir bhi ik asraar kaa sahraa phir bhi hai ik raaz badan ik ik taar nafas se ab tak lipTi hai us lams ki khushbu ik din shaayad Takraayaa thaa mujh se koi shahnaaz badan"

"apni aankhon ko umidon se sajaae rakhnaa jalti raaton mein koi khvaab bachaae rakhnaa lauT kar aaungaa phir gaanv tumhaare ik din apne darvaaze pe ik diip jalaae rakhnaa ajnabi jaan ke patthar na svaagat ko baDhein apni galiyon ko miraa naam bataae rakhnaa suune saavan mein sataaegi bahut purvaai dard ko dil mein magar apne dabaae rakhnaa hijr ki tira-shabi Thahri hai taqdir-e-visaal meri yaadon ke sitaaron ko jagaae rakhnaa khush-naqaabi kaa bharam TuTne paae na 'kamaal' gham ko honTon ke tabassum mein chhupaae rakhnaa"

"us ki jaam-e-jam aankhein shisha-e-badan meraa us ki band muTThi mein saaraa baankpan meraa main ne apne chehre par sab hunar sajaae the faash kar gayaa mujh ko saada pairahan meraa dil bhi kho gayaa shaayad shahr ke saraabon mein ab miri tarah se hai dard be-vatan meraa ek dasht-e-khaamoshi ab miraa muqaddar hai yaad be-sadaa teri zakhm be-chaman meraa aao aaj ham donon apnaa apnaa ghar chun lein tum navaah-e-dil le lo khitta-e-badan meraa roz apne khvaabon kaa khuun kartaa rahtaa huun haae kin ghanimon se aa paDaa hai ran meraa gaanv ki havaaon ne phir sandesa bhejaa hai muntazir tumhaaraa hai khushbuon kaa ban meraa"

"khush-shanaasi kaa sila karb kaa sahraa huun main kaun pahchaane ki ik dasht-e-tamannaa huun main sard paani ki zabaan chaaTti rahti hai mujhe kohar mein Duubaa huaa koi jazira huun main apni viraan si aankhon ko sajaa lo mujh se phir na haath aaungaa uDtaa huun sapnaa huun main bhuul jaaoge mujhe tum bhi sahar hone tak aakhir-e-shab kaa koi TuTtaa lamha huun main TuTaa-phuTaa hi sahi phir bhi kashish rakhtaa huun mujh se mahzuz to ho lo ki khilaunaa huun main ek dushnaam hai ye tarz-e-taaaruf mujh ko yaaro is shahr kaa derina shanaasaa huun main"

"apne hone kaa ik ik pal tajraba karte rahe nok-e-neza par bhi ham raqs-e-anaa karte rahe ik musalsal jang thi khud se ki ham zinda hain aaj zindagi ham teraa haq yuun bhi adaa karte rahe haath mein patthar na thaa chehre pe vahshat bhi na thi phir vo kyaa thaa jis pe ham yuun qahqaha karte rahe kuchh na kuchh to pesh-e-manzar mein bhi shaayad thaa kahin kuchh pas-e-manzar bhi ham aab-o-havaa karte rahe be-talab baDhtaa rahaa har lamha qarz-e-jaan kaa bojh be-sabab hi har nafas khud ko adaa karte rahe duur tak phailaa diye kohsaar jangal vaadiyaan rizq aankhon ko diyaa har pal nayaa karte rahe tum to ai khushbu havaao us se mil kar aa gaiin ek ham the zakhm-e-tanhaai haraa karte rahe zahr khud bote rahe ujli havaaon mein 'kamaal' chand saanson ko bhi ham be-zaaiqa karte rahe"

"phir khuun mein vahshat raqsaan hai tajdid sitam karne ke liye ik taaza zakhm ki khvaahish hai ik sadma kam karne ke liye ham din-bhar duniyaa-daari mein hans hans ke baatein karte hain phir saari raat pighalte hain ik ashk raqam karne ke liye vo vasl ki jis ne ham donon ko yaksar be-buniyaad kiyaa ab fursat hai aa mil baiThein us vasl kaa gham karne ke liye ik kaari zakhm ki chaahat ne kyaa kyaa na hamein gulzaar kiyaa ham kis kis se mansub hue ik hijr baham karne ke liye insaan ke jiine marne ke majburi ke mukhtaari ke ye saare khel zaruri hain taamir adam karne ke liye"

"chaand bhi khoyaa khoyaa saa hai taare bhi khvaabida hain aaj fazaa ke bojhal-pan se lahje bhi sanjida hain jaane kin kin logon se is dard ke kyaa kyaa rishte the hijr ki is aabaad saraa mein sab chehre naadida hain itne barson baad bhi donon kaise TuuT ke milte hain tu hai kitnaa saada-dil aur ham kitne pechida hain sun jaanaan ham tark-e-taalluq aur kisi din kar leinge aaj tujhe bhi ujlat si hai ham bhi kuchh ranjida hain kaanon mein ik sargoshi hai be-maani si sargoshi aankhon mein kuchh khvaab saje hain khvaab bhi umr-rasida hain ghar ki vo makhdush imaarat gir ke phir taamir hui ab aangan mein peD hain jitne saare shaakh burida hain is basti mein ek saDak hai jis se ham ko nafrat hai us ke niche pagDanDi hai jis ke ham girvida hain"

"raftagaan ki sadaa nahin main huun ye tiraa vaahima nahin main huun tere maazi ke saath dafn kahin meraa ik vaaqi'a nahin main huun kyaa milaa intihaa-pasandi se kyaa main tere sivaa nahin main huun ek muddat mein jaa ke mujh pe khulaa chaand hasrat-zada nahin main huun us ne mujh ko muhaal jaan liyaa main ye kahtaa rahaa nahin main huun main hi 'ujlat mein aa gayaa thaa idhar ye zamaana nayaa nahin main huun meri vahshat se Dar gae shaayad yaar baad-e-fanaa nahin main huun main tire saath rah gayaa huun kahin vaqt Thahraa huaa nahin main huun gaahe gaahe sukhan zaruri hai saamne aaina nahin main huun sarsari kyuun guzartaa hai mujh se ye miraa maajraa nahin main huun us ne puchhaa kahaan gayaa vo shakhs kyaa bataataa ki thaa nahin main huun ye kise dekhtaa hai mujh se udhar tere aage khalaa nahin main huun"

"dast-kash hon na mai-e-gul ke khush-aashaam abhi ki labaalab hain mah-o-mehr ke do-jaam abhi zehn mein saaqi hai mai-khaana hai hai jaam abhi hosh kahtaa huun ise hosh kaa kyaa kaam abhi mujh ko darkaar na hai kufr na islaam abhi sidhe sidhe hi chale aate hain paighaam abhi tu bhi baaqi tiri rahmat bhi hai baaqi saaqi rahne de hai mai-e-isyaan se baDaa kaam abhi khaal-o-gesu se hai ye silsila-e-raaz-o-niyaaz daana sad-daana ho ye daam ho sad-daam abhi ziist ke khvaab ki taabir abhi baaqi hai ibtidaa dekh chuke hai magar anjaam abhi rah-rav-e-ishq abhi duur hai mearaaj-e-habib rashk-e-manzil na huaa raah mein har gaam abhi zarra-zarra hai ik aatish-kada-e-nur kalim dekh agar tu na ho aatish-zada-e-baam abhi imtiyaaz-e-man-o-tu raaz-e-khafi hai lekin khaasgaan ke liye kahtaa huun sar-e-aam abhi aks ko zo'm hai be-misli-e-rang-o-bu kaa turfa ye hai ki muqaabil hai vo gulfaam abhi raaz-goi tiri 'aiman' hai gunaah-e-akbar maang le afv ki us kaa hai karam aam abhi"

"baad-e-shimaal chalne lagi ang ang mein lipTaa hai kaun mujh se ye patjhaD ke rang mein khvaahish ke kaarobaar se bachnaa muhaal hai utregaa tu bhi saath mire is surang mein main aandhiyon mein haath bhi pakDun tiraa to kyaa ik shaakh-e-be-siper huun havaaon ki jang mein 'raanjhaa' main 'ahd-e-nau kaa qabilon mein baT gayaa to 'hir' ban ke pi na saki zahr jhang mein garmaa sakin na chaahatein teraa kaThor jism har ek jal ke bujh gai tasvir sang mein aage 'musavvir' aag 'aqab mein hai ye sadaa pichhe na muD ke dekhnaa is dasht-e-sang mein"

"tifli piiri o naujavaani hech tiin din ki hai zindagaani hech umr-e-do-roza par ghamanD itnaa munimon ki hai lan-taraani hech raat thoDi hai aao pyaar karein subh ko hogi ye kahaani hech chaar din ki bahaar hai saari ye takabbur hai yaar-e-jaani hech dil ke haathon 'haqir' jhagDon mein meri guzri sadaa javaani hech"