vo aks-e-dil-e-aashnaa chhoD aae — Faraz Sultanpuri

"bichhaDte daamanon mein apni kuchh parchhaaiyaan rakh do sukut-e-zindagi mein dil ki kuchh be-taabiyaan rakh do kahin aisaa na ho main duur khud apne se ho jaaun meri hasti ke hangaamon mein kuchh tanhaaiyaan rakh do mire afkaar ho jaaein na farsuda zamaane mein nigaahon se tum apne in mein kuchh gahraaiyaan rakh do miraa har iztiraab-e-dil nishaan manzil kaa ban jaae tamannaaon mein meri husn ki angDaaiyaan rakh do rahe baaqi na phir suud o ziyaan kaa masala koi mire khirman mein apne haath se chingaariyaan rakh do kisi ko bakhsh do 'izzat kisi ko sim-o-zar de do mire hisse mein raah-e-ishq ki rusvaaiyaan rakh do kisi bhi ghair ki jaanib nazar uTThe 'faraaz' ab kyuun nigaahon mein tum us ki apni sab raanaaiyaan rakh do"

"ashk-e-gham aankhon ne barsaayaa bahut jaane kyuun un kaa khayaal aayaa bahut us ko diin ham ne duaaein baar-haa zindagi mein jis ne taDpaayaa bahut jis ko apnaa dil samajhte the use apnaa kam aur aap kaa paayaa bahut ban ke raaz-e-zindagi dil mein rahe zindagi mein phir bhi tarsaayaa bahut daulat o hashmat pe naazaan ho koi hai hamein to dil kaa sarmaayaa bahut dhuup ki sakhti to thi lekin 'faraaz' zindagi mein phir bhi thaa saaya bahut"

"nikal ke ghar se aur maidaan mein aa ke zaraa kuchh dekhiye tevar havaa ke koi zinda rahaa hai kab jahaan mein charaagh-e-dil ko apne khud bujhaa ke hamaari khaamushi bhi ik navaa thi mile kab sunne vaale hain navaa ke pashimaan ek muddat tak rahaa hai koi dar se mujhe apne uThaa ke ye dil hai dil ise siine mein hargiz kabhi rakhnaa na tum patthar banaa ke 'faraaz' aksar rahaa kartaa hai tanhaa andhere mein charaagh-e-dil jalaa ke"

"ik dil ki khaatir itne to fitne kabhi na the hote har ik qadam pe ye dhoke kabhi na the phulon ki taazgi mein udaasi hai shaam ki saae ghamon ke itne to gahre kabhi na the baad-e-sabaa se puchhiye aakhir hai baat kyaa chehre gulon ke is qadar utre kabhi na the daaman mein har sahar ke jo manzar hai shaam kaa naqshe jahaan ke aise to dekhe kabhi na the apni taraf bhi dekhaa to haael vo ho gae aankhon mein ban ke khvaab jo utre kabhi na the"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"tirgi shama bani raahguzar mein aai saaat ik aisi bhi kal apne safar mein aai jis jagah chehra hi meyaar-e-vafaa Thahraa hai khaak hi khaak vahaan dast-e-hunar mein aai teri nazron mein thi duniyaa to yahi kyaa kam thaa hashr ye hai ki tu duniyaa ki nazar mein aai baar-haa yaaron ne saahil se kahaa thaa ham hain baar-haa naav magar apni bhanvar mein aai zindagi samjhun ise yaa ki ise maut kahun vo jo mehmaan ki surat mire ghar mein aai yuun bhi taarikh ki taarikh raqam hoti hai nikli taarikh mahal se to khanDar mein aai khvaab hi khvaab ki taabir huaa to jaanaa zindagi kyuun kisi aankhon ke asar mein aai shama jalte hi bujhi aur dhuaan aisaa uThaa lazzat-e-shaam yahaan khvaab-e-sahar mein aai zindagi kuchh hai 'ataa' sher-o-adab hai kuchh aur ye do-rangi ki vabaa kaisi hunar mein aai"

"jaagte hi nazar akhbaar mein kho jaati hai zindagi dard ke ambaar mein kho jaati hai naa-khudaa aql ke patvaar uThaataa hai ki jab kashti-e-dil miri manjdhaar mein kho jaati hai be-sabab sochne vaale kabhi sochaa tu ne aagahi kasrat-e-afkaar mein kho jaati hai uDte rahte hain khayaalaat ke jugnu phir bhi baat kyuun parda-e-izhaar mein kho jaati hai us ke kaamon kaa hai rangin khushaamad pe madaar aur mehnat miri isaar mein kho jaati hai hurmat-e-parda zaruri hai 'ataa-ji' varna chiiz jaisi bhi ho baazaar mein kho jaati hai"

"khaamushi ke batn se ye guftani paidaa hui main ba-zaahir chup huaa aur shaaeri paidaa hui is tarah saabit huaa gham aur khushi kaa imtizaaj hanste hanste us ki aankhon mein nami paidaa hui jurm ki paadaash mein ham khaak par pheinke gae so yahaan par intiqaaman zindagi paidaa hui khauf ne hi maslahat ki raah bhi ijaad ki main andheron se Daraa aur raushni paidaa hui dil mein kab utri kisi ke be-maaani guftugu baat karne se to bas aavaaz hi paidaa hui"

"jis din se meraa khvaab suhaanaa badal gayaa us din se zindagi kaa fasaana badal gayaa sunne lagaa huun jab se nasihat baDon ki main jaari thaa jo labon pe taraana badal gayaa pahchaan kaa havaala bhi baaqi nahin rahaa chehre ke saath aaina-khaana badal gayaa uThti nahin hai aankh bhi ab aasmaan ki samt jab se gali kaa chaand puraanaa badal gayaa tahzib jin ke ghar ki 'alaamat thi kal talak afsos aaj un kaa gharaanaa badal gayaa 'azmat kaa taaj sar pe hai 'akhilesh' ke sajaa aisi havaa chali ki zamaana badal gayaa itni sharaafaton mein kami aa gai hai aaj pahle thaa jo libaas puraanaa badal gayaa ahl-e-vafaa ne jis ki thi taarikh ki raqam 'faaruq' 'ishq kaa vo fasaana badal gayaa"

"bahut khajil hain ki ham raaegaan bhi zinda rahe jahaan pe tu bhi nahin thaa vahaan bhi zinda rahe ajiib shart hai is be-yaqin mizaaj ki bhi ki tu bhi paas ho teraa gumaan bhi zinda rahe tujhe pe zid hai magar is tarah nahin hotaa ki tu bhi zinda rahe daastaan bhi zinda rahe vo kaun log the jin kaa vajud jism se thaa ye kaun hain jo pas-e-jism-o-jaan bhi zinda rahe jo ye na ho to sukhan kaa koi javaaz nahin zamir zinda rahe to zabaan bhi zinda rahe ye kaaenaat faqat manfaat kaa naam nahin koi yahaan pe baraae ziyaan bhi zinda rahe adam mein jo bhi nahin thaa vo sab vajud mein thaa ye ham hi the jo kahin darmiyaan bhi zinda rahe"