Ghazal

dard-e-dil ki unhein khabar na hui

koi tadbir kaargar na hui

koshishein ham ne kiin hazaar magar

ishq mein ek mo'tabar na hui

· · ·

taabaan jo nur-e-husn ba-simaa-e-ishq hai

kis darja dil-pazir tamaashaa-e-ishq hai

arbaab-e-hosh jitne hain bimaar-e-aql hain

un ke liye zarur mudaavaa-e-ishq hai

· · ·

husn-e-be-mehr ko parvaa-e-tamannaa kyaa ho

jab ho aisaa to ilaaj-e-dil-e-shaidaa kyaa ho

kasrat-e-husn ki ye shaan na dekhi na suni

barq larzaan hai koi garm-e-tamaashaa kyaa ho

· · ·

phir bhi hai tum ko masihaai kaa daavaa dekho

mujh ko dekho mire marne ki tamanna dekho

ham na kahte the banaavaT hai ye saaraa ghussa

hans ke lo phir vo unhon ne hamein dekhaa dekho

· · ·

apnaa saa shauq auron mein laaein kahaan se ham

ghabraa gae hain be-dili-e-hamrahaan se ham

kuchh aisi duur bhi to nahin manzil-e-muraad

lekin ye jab ki chhuT chalein kaarvaan se ham

· · ·

dekhnaa bhi to unhein duur se dekhaa karnaa

sheva-e-ishq nahin husn ko rusvaa karnaa

ik nazar bhi tiri kaafi thi pa-e-raahat-e-jaan

kuchh bhi dushvaar na thaa mujh ko shakebaa karnaa

· · ·

didani hain dil-e-kharaab ke rang

aah us chashm-e-pur-hijaab ke rang

fasl-e-gul mein paDein to khuub khilein

khirqa-e-zohd par sharaab ke rang

· · ·

paiham diyaa pyaala-e-mai barmalaa diyaa

saaqi ne iltifaat kaa dariyaa bahaa diyaa

us hila-ju ne vasl ki shab ham se ruuTh kar

nairang-e-rozgaar kaa aalam dikhaa diyaa

· · ·

chhup ke us ne jo khud-numaai ki

intihaa thi ye dilrubaai ki

maail-e-ghamza hai vo chashm-e-siyaah

ab nahin khair paarsaai ki

· · ·

pairav-e-maslak-e-taslim-o-razaa hote hain

ham teri raah-e-mohabbat mein fanaa hote hain

sharm kar sharm ki ai jazba-e-taasir-e-vafaa

tere haathon vo pashimaan-e-jafaa hote hain

· · ·

badal-e-lazzat-e-aazaar kahaan se laaun

ab tujhe ai sitam-e-yaar kahaan se laaun

pursish-e-haal pe hai khaatir-e-jaanaan maail

jurat-e-koshish-e-izhaar kahaan se laaun

· · ·

sitam ho jaae tamhid-e-karam aisaa bhi hotaa hai

mohabbat mein bataa ai zabt-e-gham aisaa bhi hotaa hai

bhulaa deti hain sab ranj o alam hairaaniyaan meri

tiri tamkin-e-behad ki qasam aisaa bhi hotaa hai

· · ·

faiz-e-mohabbat se hai qaid-e-mihan

mere liye ek balaa-e-hasan

shaam-e-gharibaan ke baraabar kahaan

mazhab-e-ushshaaq mein subh-e-vatan

· · ·

ab vo farmaate hain kab main ne dikhaain aankhein

aap ne muft mein ro ro ke sujaain aankhein

muztarib ham bhi rahe raat taDap kar kaafi

dil bhi bechain rahaa un ki jo aaiin aankhein

· · ·

kyaa tum ko ilaaj-e-dil-e-shaidaa nahin aataa

aataa hai par is tarah ki goyaa nahin aataa

ho jaati thi taskin so ab fart-e-alam se

is baat ko rote hain ki ronaa nahin aataa

· · ·

ravish-e-husn-e-muraaaat chali jaati hai

ham se aur un se vahi baat chali jaati hai

us jafaa-ju se baa-imaa-e-tamannaa ab tak

havas-e-lutf-o-inaayaat chali jaati hai

· · ·

un ko jo shughl-e-naaz se fursat na ho saki

ham ne ye kah diyaa ki mohabbat na ho saki

shukr-e-jafaa bhi ahl-e-razaa ne kiyaa adaa

un se yahi nahin ki shikaayat na ho saki

· · ·

siyahkaar the baa-safaa ho gae ham

tire ishq mein kyaa se kyaa ho gae ham

na jaanaa ki shauq aur bhaDkegaa meraa

vo samjhe ki us se judaa ho gae ham

· · ·

tire dard se jis ko nisbat nahin hai

vo raahat musibat hai raahat nahin hai

junun-e-mohabbat kaa divaana huun main

mire sar mein saudaa-e-hikmat nahin hai

· · ·

duaa mein zikr kyuun ho muddaaa kaa

ki ye sheva nahin ahl-e-razaa kaa

talab meri bahut kuchh hai magar kyaa

karam teraa hai ik dariyaa ataa kaa

· · ·

aasaan-e-haqiqi hai na kuchh sahl-e-majaazi

maalum hui raah-e-mohabbat ki daraazi

kuchh lutf o nazar laazim o malzum nahin hain

ik ye bhi tamannaa ki na ho shoabada baazi

· · ·

na sahi gar unhein khayaal nahin

ki hamaaraa bhi ab vo haal nahin

yaad unhein vaada-e-visaal nahin

kab kiyaa thaa yahi khayaal nahin

· · ·

jo vo nazar basar-e-lutf aam ho jaae

ajab nahin ki hamaaraa bhi kaam ho jaae

sharaab-e-shauq ki qimat hai naqd-e-jaan-e-aziz

agar ye baais-e-kaif-e-davaam ho jaae

· · ·

har dil mein ik hujum-e-mohabbat hai aaj-kal

us shokh ki kuchh aur hi hasrat hai aaj-kal

ai sehr-e-husn-e-yaar main ab tujh se kyaa kahun

dil kaa jo haal teri badaulat hai aaj-kal

· · ·