Ghazal

ye hai to sab ke liye ho ye zid hamaari hai

is ek baat pe duniyaa se jang jaari hai

uDaan vaalo uDaanon pe vaqt bhaari hai

paron ki ab ke nahin hauslon ki baari hai

· · ·

tu samajhtaa hai ki rishton ki duhaai deinge

ham to vo hain tire chehre se dikhaai deinge

ham ko mahsus kiyaa jaae hai khushbu ki tarah

ham koi shor nahin hain jo sunaai deinge

· · ·

apne saae ko itnaa samjhaane de

mujh tak mere hisse ki dhuup aane de

ek nazar mein kai zamaane dekhe to

buDhi aankhon ki tasvir banaane de

· · ·

khul ke milne kaa saliqa aap ko aataa nahin

aur mere paas koi chor darvaaza nahin

vo samajhtaa thaa use paa kar hi main rah jaaungaa

us ko meri pyaas ki shiddat kaa andaaza nahin

· · ·

sab ne milaae haath yahaan tirgi ke saath

kitnaa baDaa mazaaq huaa raushni ke saath

shartein lagaai jaati nahin dosti ke saath

kiije mujhe qubul miri har kami ke saath

· · ·

kitnaa dushvaar thaa duniyaa ye hunar aanaa bhi

tujh se hi faasla rakhnaa tujhe apnaanaa bhi

kaisi aadaab-e-numaaish ne lagaain shartein

phuul honaa hi nahin phuul nazar aanaa bhi

· · ·

bhalaa ghamon se kahaan haar jaane vaale the

ham aansuon ki tarah muskuraane vaale the

hamin ne kar diyaa elaan-e-gumrahi varna

hamaare pichhe bahut log aane vaale the

· · ·

apne andaaz kaa akelaa thaa

is liye main baDaa akelaa thaa

pyaar to janm kaa akelaa thaa

kyaa miraa tajraba akelaa thaa

· · ·

main aasmaan pe bahut der rah nahin saktaa

magar ye baat zamin se to kah nahin saktaa

kisi ke chehre ko kab tak nigaah mein rakkhun

safar mein ek hi manzar to rah nahin saktaa

· · ·

shaam tak subh ki nazron se utar jaate hain

itne samjhauton pe jiite hain ki mar jaate hain

phir vahi talkhi-e-haalaat muqaddar Thahri

nashshe kaise bhi hon kuchh din mein utar jaate hain

· · ·

lahu na ho to qalam tarjumaan nahin hotaa

hamaare daur mein aansu zabaan nahin hotaa

jahaan rahegaa vahin raushni luTaaegaa

kisi charaagh kaa apnaa makaan nahin hotaa

· · ·

vo mere ghar nahin aataa main us ke ghar nahin jaataa

magar in ehtiyaaton se taalluq mar nahin jaataa

bure achchhe hon jaise bhi hon sab rishte yahin ke hain

kisi ko saath duniyaa se koi le kar nahin jaataa

· · ·

haadson ki zad pe hain to muskuraanaa chhoD dein

zalzalon ke khauf se kyaa ghar banaanaa chhoD dein

tum ne mere ghar na aane ki qasam khaai to hai

aansuon se bhi kaho aankhon mein aanaa chhoD dein

· · ·

main is umiid pe Duubaa ki tu bachaa legaa

ab is ke baad miraa imtihaan kyaa legaa

ye ek mela hai vaada kisi se kyaa legaa

Dhalegaa din to har ik apnaa raasta legaa

· · ·

dukh apnaa agar ham ko bataanaa nahin aataa

tum ko bhi to andaaza lagaanaa nahin aataa

pahunchaa hai buzurgon ke bayaanon se jo ham tak

kyaa baat hui kyuun vo zamaana nahin aataa

· · ·

zaraa saa qatra kahin aaj agar ubhartaa hai

samundaron hi ke lahje mein baat kartaa hai

khuli chhaton ke diye kab ke bujh gae hote

koi to hai jo havaaon ke par katartaa hai

· · ·

apne chehre se jo zaahir hai chhupaaein kaise

teri marzi ke mutaabiq nazar aaein kaise

ghar sajaane kaa tasavvur to bahut baad kaa hai

pahle ye tai ho ki is ghar ko bachaaein kaise

· · ·

apne har har lafz kaa khud aaina ho jaaungaa

us ko chhoTaa kah ke main kaise baDaa ho jaaungaa

tum giraane mein lage the tum ne sochaa hi nahin

main giraa to masala ban kar khaDaa ho jaaungaa

· · ·

kyaa dukh hai samundar ko bataa bhi nahin saktaa

aansu ki tarah aankh tak aa bhi nahin saktaa

tu chhoD rahaa hai to khataa is mein tiri kyaa

har shakhs miraa saath nibhaa bhi nahin saktaa

· · ·

tumhaari raah mein miTTi ke ghar nahin aate

isi liye to tumhein ham nazar nahin aate

mohabbaton ke dinon ki yahi kharaabi hai

ye ruuTh jaaein to phir lauT kar nahin aate

· · ·

andheraa zehn kaa samt-e-safar jab khone lagtaa hai

kisi kaa dhyaan aataa hai ujaalaa hone lagtaa hai

vo jitni duur ho utnaa hi meraa hone lagtaa hai

magar jab paas aataa hai to mujh se khone lagtaa hai

· · ·

mohabbat naa-samajh hoti hai samjhaanaa zaruri hai

jo dil mein hai use aankhon se kahlaanaa zaruri hai

usulon par jahaan aanch aae Takraanaa zaruri hai

jo zinda ho to phir zinda nazar aanaa zaruri hai

· · ·

aate aate miraa naam saa rah gayaa

us ke honTon pe kuchh kaanptaa rah gayaa

raat mujrim thi daaman bachaa le gai

din gavaahon ki saf mein khaDaa rah gayaa

· · ·

chaand kaa khvaab ujaalon ki nazar lagtaa hai

tu jidhar ho ke guzar jaae khabar lagtaa hai

us ki yaadon ne ugaa rakkhe hain suraj itne

shaam kaa vaqt bhi aae to sahar lagtaa hai

· · ·